ᤕᤢᤜᤢᤴᤏᤠ 8:3-33

³ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢᤖ ᤐᤳᤇᤧᤸᤗᤧ ᤔᤧᤍᤧᤶᤛᤢᤔᤠ ᤔᤧᤴᤇᤢᤔᤠ᤹ᤎᤡᤰ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤔᤏᤠᤗᤢᤵᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤧᤕᤧᤵᤛᤢ॥

⁴ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤁᤴ ᤔᤧᤴᤇᤢᤔᤠ᤹ᤀᤡᤴ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤧᤖ ᤐᤳᤇᤧᤸᤗᤧᤀᤣ ᤔᤧᤍᤧᤶᤛᤢᤀᤠᤱ ᤋᤠᤖᤢᤶᤒᤧᤒᤠᤖᤥ॥

⁵ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤔᤥᤛᤠ᤺ᤸᤗᤧᤃ ᤀᤰᤋᤱᤔᤠ ᤔᤧᤴᤇᤢᤔᤠ᤹ᤀᤡᤴ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤡᤃᤧᤀᤠᤱ ᤘᤠ᤹ᤖᤥ. ᤁᤖ ᤂᤧᤏᤧ᤹ᤃ ᤌᤣ ᤕᤠᤵᤔᤡ ᤁᤧᤔᤧᤵᤐᤣ᥅”

⁶ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤴᤏᤥ ᤌᤠ᤺ᤔᤠᤀᤠᤱ ᤁᤢᤍᤰᤗᤧᤱᤘᤠᤀᤥᤒᤠ ᤐᤠ᤺ᤴᤏᤡᤴ ᤂᤥ᤺ᤔᤠ ᤑᤠ᤹ᤀᤠᤱ ᤁᤴ ᤛᤣ᤺ᤴᤔᤧᤍᤥᤛᤢᤀᤠᤱ ᤘᤕᤧ. ᤁᤖ ᤕᤧᤛᤢ᤺ᤴ ᤌᤢ᤺ᤱᤛᤡᤱᤅᤠᤱ ᤂᤠᤶᤒᤠᤱᤅᤥ ᤌᤣᤎᤣᤀᤡ ᤁᤢᤜᤢᤰᤆᤥ᤺ᤸᤗᤧ ᤛᤠᤵᤋᤢᤖ ᤕᤢᤅᤧ॥

⁷ᤂᤧᤱᤜᤠ᤹ᤖᤧ ᤀᤧᤳᤗᤧᤱ ᤛᤣ᤺ᤴᤔᤧᤍᤥᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤐᤥᤃᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤥ ᤀᤠᤸᤗᤥ ᤌᤠᤖᤡᤰ ᤗᤠᤕᤥ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠ ᤜᤠ᤺ᤳ ᤘᤠ᤹᥅ ᤜᤠᤖᤠ᤹ ᤒᤠ ᤂᤧᤸᤗᤧᤀᤣ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤴ ᤔᤧᤴᤇᤢᤔᤠ᤹ᤀᤡᤴ ᤗᤢᤱᤅᤡᤸᤗᤧ ᤗᤧᤵᤋᤢᤖᤖᤥ॥”

⁸ᤂᤢᤏᤧ᤹ ᤕᤠᤶᤔᤥ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤂᤠᤶᤒᤠᤱᤅᤥ ᤛᤠᤵᤔᤠ ᤜᤣ᤺ᤰᤋᤢᤖᤥ॥

⁹ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤋᤢᤶᤓᤠᤰᤛᤠ ᤜᤧᤰᤁᤩᤠᤱ ᤂᤧᤴᤏᤠᤱ ᤕᤥᤒᤠᤜᤠ᤹ ᤌᤡᤰ ᤌᤡᤰ ᤗ᤹ᤖᤡᤰ ᤐᤣ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤂᤧᤵᤔᤥ ᤕᤧᤛᤢ᤺ᤴ ᤏᤢ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤗᤰ ᤕᤠ᤺ᤰᤋᤧᤳᤇᤡᤖᤥ॥

¹⁰ᤜᤧᤰᤁᤩᤠᤱ ᤕᤧᤛᤢ᤺ᤴ ᤐᤥᤃᤧᤀᤠᤱ ᤂᤧᤴ ᤛᤣ᤺ᤴᤍᤥᤛᤢ “ᤔᤠᤔᤢᤀᤣ. ᤂᤧᤏᤧ᤹ ᤐᤠ᤺ᤴ ᤁᤧᤎᤡᤰᤐᤠᤜᤠ᤹ ᤀᤠᤳᤋᤡ ᤔᤧᤒᤣᤒᤣ᥅ ᤜᤠ᤺ᤳᤗᤧᤀᤠᤱ ᤂᤧᤏᤧ᤹ ᤐᤠ᤺ᤴ ᤁᤧᤴᤎᤡᤰᤋᤧᤴᤒᤡ᥅”

¹¹ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤜᤥ᤺ᤵᤗᤥ. ᤀᤠᤍᤠᤱᤒᤣ᥄” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ᤀᤠᤱ ᤔᤧᤎᤡᤰᤏᤧᤴᤗᤥ॥ ᤐᤣᤃᤧ᤹ᤀᤥ. ᤁᤖ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤗᤠᤕᤥ ᤔᤧᤈᤥᤃᤧᤴᤏᤧ᤹ᤀᤥ॥”))

¹²ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤥ᤺ᤳᤋᤡᤀᤠᤖᤥ॥ ᤜᤠ᤺ᤳᤗᤧ ᤀᤡᤱᤃᤠ᤹ ᤏᤛᤠ᤺ᤴ ᤆᤥ᤺ᤰᤁᤠ ᤂᤧᤴᤏᤢ ᤜᤡᤱᤔᤴ ᤁᤧᤒᤡᤒᤠ ᤀᤥ᤺ᤳᤋᤡ᤺ᤴ ᤘᤠ᤹ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤂᤧᤴ ᤂᤠᤍᤠᤶᤔᤥ ᤗᤠᤱᤄᤣ᤺ᤰᤔᤠ ᤔᤧᤒᤥ᤺ᤱᤏᤧᤸᤗᤥ॥”

¹³ᤑᤖᤡᤛᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤀᤠᤒᤠᤅᤣ ᤁᤧᤕᤠ᤺ᤶᤒᤣᤀᤥ ᤁᤧᤒᤠ᤺ᤳᤋᤢ᤹ᤖᤥ ᤜᤧᤰᤁᤩᤠᤱ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠ ᤔᤧ᤺ᤴᤗᤥ॥”

¹⁴ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤒᤠ᤺ᤴᤜᤠ᤹ ᤀᤠᤒᤠᤅᤣ ᤐᤠ᤺ᤳᤋᤢᤱᤛᤠᤱ ᤂᤧᤴ ᤛᤧᤰᤂᤠᤀᤣᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤳᤋᤥᤗᤠᤶ ᤋᤩᤠᤱᤅᤠᤱ ᤀᤠᤳᤋᤠᤴ ᤐᤣ᤺ᤰᤁᤠᤖ ᤐᤳᤋᤠ ᤂᤧᤴ ᤏᤢ᤺ᤖᤡᤰᤁᤠᤱ ᤏᤡ᤺ᤛᤢᤱᤗᤥ ᤁᤖ ᤂᤡᤏᤡ᤹ᤃ ᤀᤡᤱᤃᤠ᤹ ᤀᤠᤳᤋᤥᤗᤠᤶ ᤋᤩᤠᤱᤒᤠ ᤜᤧᤰᤁᤩᤠᤱ ᤀᤠᤳᤋᤥ ᤐᤣ᤺ᤰᤁᤠᤖ ᤐᤳᤋᤠ ᤂᤧᤴ ᤌᤣᤀᤠᤱ ᤁᤧᤴᤏᤡ᤺ᤛᤢᤶᤔᤡᤴᤗᤥ॥

¹⁵ᤂᤡᤏᤡ᤹ᤃ ᤔᤧᤴᤇᤠᤶ ᤌᤡᤶ ᤁᤢᤀᤡᤛᤡ᤺ᤰᤁᤣ ᤂᤠᤛᤧᤴ ᤁᤧᤗᤥ᤺ᤴᤍᤡ᤹ᤖᤥ. ᤁᤖ ᤀᤡᤱᤃᤠ᤹ᤃ ᤀᤠᤳᤋᤡᤸᤗᤧᤴᤏᤠᤱ ᤂᤠᤛᤧᤴ ᤔᤧᤈᤥᤃᤢᤱᤅᤡᤴᤗᤥ॥

¹⁶ᤁᤖ ᤀᤡᤱᤃᤠ᤹ ᤂᤠᤛᤧᤴ ᤆᤥᤃᤢᤱᤏᤧ ᤑᤠ᤹ᤃᤪ ᤀᤠᤄᤠᤛᤧᤴᤏᤡᤴ ᤛᤧᤰᤂᤠᤀᤣ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤖᤰ ᤜᤥ᤺ᤵᤐᤠᤖᤥ॥ ᤀᤡᤱᤃᤠ᤹ᤏᤢᤃ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤘᤠ᤹ᤖᤥ॥

¹⁷ᤂᤡᤏᤡ᤹ ᤛᤠᤶᤕᤥᤌᤡᤶᤔᤥ ᤏᤧᤵᤑᤢ ᤔᤏᤠᤜᤠ᤹ᤖᤧ ᤌᤡᤰ ᤐᤠ᤺ᤴᤏᤥ ᤋᤱᤛᤡᤀᤠᤱ ᤋᤥ᤺ᤴᤍᤡ ᤐᤡᤛᤢᤏᤧ ᤑᤠ᤹ᤃᤪ ᤂᤧᤴ ᤋᤥ᤺ᤴᤍᤡᤴ ᤛᤧᤰᤂᤠᤀᤣ ᤐᤥ᤺ᤱᤗᤥ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳᤗᤥ॥

¹⁸ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤱᤗᤥ. ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧᤀᤠᤱ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤖᤥ॥”

¹⁹ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤖ ᤁᤧᤏᤧᤒᤠ ᤐᤠᤏᤢᤍᤡᤱ ᤁᤧᤶᤒᤠᤃ ᤀᤠᤳᤋᤥ ᤘᤠ᤹ᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤃ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤴᤏᤡ᤺ᤳᤋᤡᤴ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ॥ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤏᤡ᤺ᤳᤋᤡᤸᤗᤧᤃ ᤀᤠᤶᤒᤠᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤔᤧᤴᤗᤥ॥”

²⁰ᤕᤧᤛᤢᤖᤧ ᤁᤴ ᤐᤠ᤺ᤴᤜᤠ᤹ ᤔᤠᤱᤜᤡᤶᤔᤥ ᤜᤢᤰᤛᤥᤕᤠᤱ ᤕᤠᤰᤔᤏᤠᤒᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤏᤡᤛᤠᤶ ᤜᤢ᤹ᤖᤢᤛᤡᤖ ᤐᤳᤇᤧᤸᤗᤧ ᤐᤠ᤺ᤳᤋᤢᤒᤠᤖᤥ. ᤁᤖ ᤂᤢᤏᤧ᤹ᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤴᤍᤧᤶᤛᤢᤴᤗᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤕᤧᤶ ᤔᤧᤴᤍᤠᤀᤣ ᤘᤕᤧᤖᤥ॥

²¹ᤕᤠᤱᤛᤡ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤐᤣ᤺ᤰᤁᤠᤀᤠᤱ ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤒᤠᤅᤣ ᤗᤠᤕᤥᤀᤥ ᤁᤧᤛᤩᤧ᤹ᤀᤡᤖᤥ॥ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤣᤴᤏᤥ ᤂᤡᤏᤡ᤹ ᤋᤠ᤺ᤔᤠ ᤁᤧᤴᤇᤢᤰᤋᤡᤴᤗᤥ॥”

²²ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤛᤣ᤺ᤴᤔᤧᤍᤥ᤺ᤛᤡᤱ. “ᤕᤧᤛᤢ᤺ᤴ ᤀᤠᤒᤠᤅᤣ ᤛᤧᤳᤇᤡᤱᤒᤠᤒᤡ᥅ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤣᤴᤏᤥ ᤋᤠ᤺ᤔᤠ ᤁᤧᤴᤇᤢᤰᤋᤡᤴᤗᤥ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠᤒᤡ᥅”

²³ᤂᤢᤏᤧ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤒᤠ ᤁ᤹ᤕᤥᤒᤠᤏᤡᤱᤗᤥ. ᤁᤖ ᤀᤡᤱᤃᤠ᤹ ᤌᤥᤗᤠᤶᤒᤠᤀᤠᤖᤥ॥ ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤏᤡᤱᤗᤥ ᤁᤖ ᤀᤡᤱᤃᤠ᤹ᤃ ᤔᤧ᤺ᤴᤏᤠ᤹ᤖᤥ॥

²⁴ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤗᤠᤕᤥᤜᤠ᤹ᤀᤥ ᤁᤧᤛᤩᤧ᤹ᤀᤡᤖᤥ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤖᤥ॥ ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤴ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤏᤡᤸᤗᤧᤃ ᤂᤡᤏᤡ᤹ ᤛᤧᤰᤂᤠᤀᤣ ᤀᤠᤒᤠᤅᤣ ᤗᤠᤕᤥᤜᤠ᤹ᤀᤥ ᤁᤧᤛᤩᤧ᤹ᤀᤡ॥”

²⁵ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤋᤃᤡᤏᤢᤀᤣ ᤔᤧᤳᤏᤡᤱᤗ ᤘᤠ᤹ᤀᤠᤒᤠᤴᤏᤣ ᤂᤢᤏᤧ᤹ᤀᤠᤖᤥ॥

²⁶ᤀᤡᤱᤃᤠ᤹ᤃ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤕᤖᤡᤰ ᤐᤠ᤺ᤵᤔᤠ ᤏᤢ ᤂᤡᤏᤡ᤹ ᤑᤧ᤺ᤰᤔᤠ ᤐᤠ᤺ᤴ ᤁᤳᤋᤢᤱᤗᤥ॥ ᤁᤖ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤴ ᤛᤧᤰᤂᤠᤀᤣ ᤆᤥ᤺ᤰᤗᤥ ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶ ᤂᤧᤵᤛᤢᤱᤒᤠ ᤐᤠ᤺ᤴᤏᤡᤴᤗᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ ᤔᤧᤳᤋᤢᤱᤛᤡᤱᤗᤥ॥”

²⁷ᤕᤧᤛᤢᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

²⁸ᤂᤧᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤧᤴᤇᤠᤶᤛᤠ᤺ᤴ ᤌᤠ᤺ᤱ ᤁᤧᤒᤰᤂᤢᤶᤔᤡᤸᤗᤧ ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥ᤺ᤛᤢᤶᤗᤥ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤒᤠᤅᤣ ᤔᤧᤒᤠ᤺ᤳᤋᤠᤴ ᤁᤖ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤜᤢ᤹ᤖᤠᤱᤒᤠ ᤐᤠ᤺ᤴᤗᤰ ᤐᤠ᤺ᤳᤋᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥ᤺ᤛᤢᤶᤗᤥ॥

²⁹ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤱᤃ ᤛᤍᤠᤍᤡᤱ ᤀᤡᤱᤃᤠ᤹ᤏᤢ ᤘᤠ᤹ᤖᤥ॥ ᤂᤢᤏᤧ᤹ᤃ ᤀᤠᤵᤑᤠᤸᤗᤧᤀᤠᤱ ᤀᤡᤱᤃᤠ᤹ ᤀᤣ᤺ᤰ ᤔᤧᤸᤗᤧᤳᤋᤣ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤍᤠᤍᤡᤱ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤕᤠ᤺ᤶᤒᤰ ᤆᤥᤃᤢᤱᤗᤥ॥

³⁰ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ᤀᤥ ᤏᤛᤠ᤺ᤴ ᤔᤧᤈᤥᤃᤢᤖᤥ॥”

³¹ᤕᤧᤛᤢᤖᤧ ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ᤀᤥ ᤆᤰᤔᤧᤸᤗ᤹ᤀᤣ ᤁᤧᤒᤳᤇᤡ᤹ᤏᤧ ᤑᤠ᤹ᤃᤪ ᤛᤧᤰᤂᤠᤀᤣ ᤀᤠᤜᤢ᤹ᤛᤠᤶᤒᤠ ᤁᤧᤒᤥ᤺ᤰᤂᤡ᤹ᤖᤥ॥

³²ᤜᤧᤰᤁᤩᤠᤱ ᤛᤧᤰᤂᤠ᤺ᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤛᤧᤰᤂᤠ᤺ᤸᤗᤧ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤡ᤹ᤖᤥ॥”

³³ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤡᤃᤧᤖᤥ॥ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤀᤠᤳᤋᤡᤸᤗᤧᤴᤏᤠᤱ ᤁᤢᤕᤥ᤺ᤰᤐᤠ ᤔᤧᤶᤒᤥ᤺ᤱᤅᤣ ᤘᤕᤡᤃᤧᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤆᤥ᤺ᤰᤕᤢᤶᤓᤥ ᤁᤧᤄᤥ᤺ᤛᤢᤶ ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤵᤐᤠᤒᤣ᥅”