ᤕᤢᤜᤢᤴᤏᤠ 6:7-32

⁷ᤑᤡᤗᤡᤐᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤠᤏᤡ᤹ᤃ ᤁᤡᤵ ᤏᤧᤳᤇᤡ (᥈᥆᥆) ᤕᤠᤱᤗᤧ ᤂᤖᤧ᤺ᤱ ᤀᤠᤀᤡᤅᤢᤶᤔᤠᤱ ᤁᤴ ᤔᤏᤠᤜᤠ᤹ᤃ ᤆᤩ᤹ ᤆᤩ᤹ᤖᤰ ᤀᤠᤒᤡᤖᤢᤶᤛᤡᤶᤛᤠᤱ ᤀᤠᤴᤕᤥᤛᤢᤶᤛᤡᤶᤔᤡᤴᤗᤥ॥”

⁸ᤜᤧᤰᤁᤩᤠᤱ ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤁᤢᤜᤢ᤹ᤛᤠᤶᤒᤠ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ.

⁹“ᤁᤵᤔᤥ ᤆᤢᤰᤐᤠᤎᤡᤰᤗᤧ ᤅᤠᤛᤡ ᤜ᤺ᤰᤛᤡ᤺ ᤂᤖᤧ᤺ᤱ ᤏᤢ ᤏᤧᤳᤇᤡ ᤅᤠᤛᤠ ᤁᤳᤋᤢ᤹. ᤁᤖ ᤁᤶᤔᤩᤠᤰ ᤕᤖᤡᤰ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤕᤥᤔᤠᤛᤡᤒᤣ᥅”

¹⁰ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤢᤖᤠ ᤔᤧᤳᤋᤢᤛᤡ. “ᤁᤧᤖᤧᤰ ᤔᤏᤠᤜᤠ᤹ ᤕᤢᤱ ᤐᤠᤱᤄᤧᤶᤛᤡᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤖᤡᤰ ᤕᤠ᤺ᤴ ᤁᤧᤕᤢᤱᤒᤠ ᤏᤧᤏᤧᤒᤠ ᤋᤧᤴᤏᤥ ᤕᤢᤱᤔᤧᤒᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤵᤔᤥ ᤔᤧᤴᤇᤢᤔᤠ᤹ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤴᤏᤡ᤺ᤳᤇᤡᤱᤅᤣ ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤕᤠᤖᤡᤰ ᤔᤧᤘᤕᤧᤖᤥ॥

¹¹ᤕᤧᤛᤢᤖᤧ ᤂᤧᤴ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤜᤠ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤅᤠᤛᤠ᤺ᤴᤏᤠᤱ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤡ᤹ ᤕᤥᤕᤥ ᤜᤠ᤺ᤳᤋᤢᤛᤡᤖᤥ॥

¹²ᤂᤧᤴ ᤁᤠᤰ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤁᤠᤰ ᤁᤢᤈᤡ ᤁᤧᤏᤶᤒᤠᤜᤠ᤹ ᤛᤢᤵᤛᤧᤶᤔᤧ᤹ᤀᤥ. ᤁᤢᤈᤡᤌᤡᤰᤁᤠᤱ ᤆᤠᤔᤧᤛᤥ᤺ᤰᤏᤧᤴᤗᤖᤥ॥”

¹³ᤜᤧᤰᤁᤩᤠᤱ ᤂᤧᤴ ᤅᤠᤛᤡ ᤜ᤺ᤰᤛᤡ᤺ ᤂᤖᤧ᤺ᤱᤜᤠ᤹ ᤔᤏᤠᤜᤠ᤹ᤖᤧ ᤔᤧᤈᤀᤠᤱ ᤁᤢᤈᤡ ᤁᤧᤏᤶᤒᤠ ᤂᤖᤧ᤺ᤱᤜᤠ᤹ ᤔᤧᤛᤢᤵᤛᤢᤸᤗᤧᤃ ᤌᤡᤰ-ᤏᤧᤳ ᤏᤀᤡᤔᤠᤏᤧ ᤋᤡᤶᤛᤧ᥄

¹⁴ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤴ ᤔᤧᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠ᤺ ᤗ᤹ᤖᤡᤰ ᤏᤡᤱᤛᤠᤱ ᤆᤥ᤺ᤰᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤱᤃ ᤛᤧᤰᤂᤠᤛᤠᤱ ᤂᤢᤏᤧ᤹ᤀᤣᤖᤥ॥”

¹⁵ᤔᤏᤠᤜᤠ᤹ᤖᤧ ᤛᤠᤰᤁᤧᤸᤗᤧᤰᤁᤠᤱ ᤂᤢᤏᤡ᤹ ᤜᤠᤱ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤢᤏᤧ᤹ ᤀᤧᤰᤗᤣ᤺ᤰ ᤌᤥ ᤁᤥ᤺ᤰᤔᤠᤀᤥ ᤐᤣᤖᤥ॥

¹⁶ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤴ ᤁᤥ᤺ᤰᤔᤠᤀᤥᤗᤠᤶ ᤕᤥ ᤔᤧᤎᤩᤧᤀᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤧᤛᤢ᤺ᤴ ᤔᤧᤜᤠᤱᤄᤢᤖᤥ॥

¹⁷ᤁᤖ ᤂᤠᤍᤠᤔᤧᤛᤠᤱ ᤂᤢᤏᤧ᤹ ᤂᤧᤵᤔᤥ ᤔᤧᤕᤧᤏᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤀᤥ ᤔᤧᤗᤠ᤺ᤛᤧᤀᤠᤱ ᤏᤠᤜᤠᤱᤍᤠᤱ ᤁᤐᤷᤏᤜᤢᤔ ᤐᤠᤱᤈᤢᤶ ᤗᤧᤵᤔᤠᤱ ᤔᤧᤎᤠᤛᤡᤱᤗᤥ॥

¹⁸ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤘᤖᤰᤁᤥ ᤁᤡᤵᤔᤠ ᤁᤧᤄᤢ᤺ᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤔᤠ ᤜᤣ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤅᤡᤴ ᤐᤥᤃᤧᤖᤥ॥

¹⁹ᤂᤧᤱᤜᤠ᤹ ᤅᤠᤛᤡ-ᤋᤢᤰᤛᤡ (᥋-᥌) ᤁᤡᤗᤥᤔᤡᤋᤖ ᤔᤧᤒᤣᤀᤠᤱ ᤔᤧᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤜᤰᤆᤄᤳ ᤕᤧᤛᤢ᤺ᤴ ᤆᤫᤠ᤺ᤳᤋᤥ ᤗᤠᤱᤄᤣᤃᤧᤖ ᤂᤢᤏᤡ᤹ ᤐᤣᤛᤠᤱ ᤑᤧᤖᤧᤖ ᤐᤳᤇᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥

²⁰ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤕᤧᤛᤢᤀᤠ. ᤔᤧᤃᤡᤛᤧᤶᤔᤡᤴᤏᤧ᤹॥”

²¹ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤛ᤺ᤳᤋᤧᤖ ᤂᤢᤏᤧ᤹ ᤂ᤺ᤱᤒᤣᤀᤥ ᤔᤧᤕᤢᤰᤂᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤒᤠ ᤋᤧᤴᤏᤥ ᤂᤡᤔᤥ ᤂᤢᤏᤡ᤹ ᤂ᤺ᤱᤒᤣᤴ ᤁᤧᤖᤧᤖᤥ॥

²²ᤜᤧᤰᤁᤩᤠᤱ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤌᤡᤰᤗᤰ ᤂ᤺ᤱᤒᤣᤴ ᤏᤧᤛ᤻ᤛᤧᤒᤠ ᤔᤧᤏᤡ᤺ᤛᤢ ᤜᤧᤰᤁᤩᤠᤱ ᤕᤧᤛᤢ᤺ᤴ ᤂ᤺ᤱᤒᤣᤀᤥ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤔᤧᤗᤠ᤺ᤛᤧᤶᤒᤠ ᤁᤖ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤰ ᤔᤧᤒᤣᤒᤠ ᤐᤠ᤺ᤴᤏᤡᤴ ᤁᤢᤍᤠ᤺ᤴᤍᤡᤰᤔᤠᤖᤰ ᤁᤢᤛᤡᤱ ᤔᤧᤏᤡ᤺ᤳᤋᤢ॥

²³ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤏᤥᤃᤧᤴ ᤐᤡᤖᤢᤀᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤂᤖᤧ᤺ᤱᤜᤠ᤹ ᤔᤧᤈᤒᤠ ᤋᤧᤴᤏᤡᤸᤗᤧ ᤁᤢᤒᤣᤛᤠᤱ ᤋᤡᤒᤣᤖᤡᤕᤛ ᤕᤧᤰᤕᤰᤁᤥᤏᤢ ᤁᤢᤓᤠ ᤂ᤺ᤱᤒᤣᤜᤠ᤹ ᤂᤧᤵᤔᤥ ᤔᤧᤃᤧᤖᤧ॥

²⁴ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤜᤥ᤺ᤵ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤕᤠᤶᤔᤥ ᤂᤧᤴ ᤔᤏᤠᤜᤠ᤹ ᤂᤧᤴ ᤂ᤺ᤱᤒᤣᤜᤠ᤹ᤀᤥ ᤔᤧᤗᤠ᤺ᤛᤧᤀᤠᤱ ᤏᤠᤜᤠᤱᤍᤠᤱ ᤁᤐᤷᤏᤜᤢᤶᤔᤥ ᤕᤧᤛᤢᤖᤧ ᤁᤢᤃᤥ᤺ᤳᤇᤧ ᤔᤧᤒᤣᤖᤥ॥

²⁵ᤂᤧᤱᤜᤠ᤹ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤔᤧᤃᤧᤖᤧᤸᤗᤧ ᤕᤧᤛᤢ᤺ᤴ ᤔᤧᤍᤢᤔᤢᤀᤠᤱ ᤛᤣ᤺ᤴᤔᤧᤍᤥᤛᤢ “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤠᤵᤑᤠᤸᤗᤧ ᤁᤵᤔᤥ ᤁᤧᤓᤧᤖᤧᤒᤣ᥅”

²⁶ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤴ ᤁᤧᤏᤡ᤺ᤛᤢᤶᤔᤠᤱ ᤔᤧ᤺ᤴ. ᤁᤖ ᤂᤠᤄᤠ ᤂᤖᤧ᤺ᤱᤅᤡᤴ ᤁᤧᤈᤠᤶᤔᤠᤱᤏᤧ ᤕᤠᤵᤔᤡ ᤁᤧᤃᤥ᤺ᤳᤋᤡᤒᤠᤖᤥ॥

²⁷ᤂᤡᤏᤡ᤹ ᤆᤠᤃᤧᤛᤥ᤺ᤰᤐᤠᤀᤠᤱ ᤁᤧᤒᤣ᤺ᤰᤐᤠ ᤁᤢᤈᤠᤖᤧ ᤗᤠᤃᤡ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤐᤡᤏᤡᤱᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤌᤠᤖᤡᤰ ᤁᤧᤎ᤺ᤵᤐᤠ ᤁᤢᤈᤠᤀᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤠ ᤜᤧᤰᤁᤣ ᤆᤥ᤺ᤰᤛᤧᤀᤣ ᤀᤡᤱᤃᤠ᤹ ᤕᤢᤰ ᤐᤡᤖᤠᤱᤅᤠᤱ ᤘᤠ᤹ᤖᤥ॥

²⁸ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤧ ᤌᤣ ᤆᤥᤃᤢᤶᤒᤧᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤒᤣ᥅”

²⁹ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤱᤃ ᤂᤢᤏᤧ᤹ ᤐᤠᤱᤄᤢᤒᤠ ᤔᤏᤠ᤺ᤴ ᤏᤛᤠ᤺ᤴ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢ᤹ᤖᤥ॥”

³⁰ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤀᤠᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴ ᤁᤧᤈᤥᤃᤢᤀᤠᤱ ᤀᤠᤏᤡᤃᤧ ᤏᤛᤠ᤺ᤴ ᤆᤥ᤺ᤰᤁᤠᤛᤡᤃᤧᤒᤠᤒᤣ᥅ ᤀᤠᤏᤡᤃᤧ ᤗᤠᤃᤡ ᤂᤧᤏᤧ᤹ ᤌᤣ ᤁᤧᤈᤥᤃᤢᤒᤣ᥅

³¹ᤀᤠᤏᤡᤃᤧ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧᤃ ᤕᤧ᤺ᤱᤄᤠᤍᤧᤴᤏᤥ ᤔᤴᤏᤠ᤺ᤴ ᤔᤧᤈ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤖᤧ᤺ᤱᤅᤡᤴ ᤆᤠᤔᤠ ᤐᤡᤖᤢᤛᤡᤖᤥ॥’”

³²ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤥᤛᤠᤖᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤂᤖᤧ᤺ᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤴ ᤛᤧᤰᤂᤠᤒᤠ ᤂᤖᤧ᤺ᤱᤅᤡᤴ ᤐᤠᤏᤢᤍᤡᤱ ᤀᤠᤶᤒᤠᤖᤧᤏᤧ ᤁᤧᤒᤡᤖᤡᤒᤠᤖᤥ॥