ᤕᤢᤜᤢᤴᤏᤠ 6:47-61

⁴⁷ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤧᤴᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤘᤠ᤹ᤖᤥ॥

⁴⁸ᤀᤡᤱᤃᤠ᤹ᤀᤣ ᤛᤧᤰᤂᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ॥

⁴⁹ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤕᤧ᤺ᤱᤄᤠᤍᤧᤴᤏᤥ ᤔᤴᤏᤠ ᤔᤧᤈᤛᤠᤱ ᤔᤧᤛᤩᤧᤖᤥ॥

⁵⁰ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤂᤖᤧ᤺ᤱᤅᤡᤴ ᤁᤵᤔᤥ ᤘᤠ᤹ᤖᤥ. ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤴ ᤆ᤺ ᤂᤧᤴ ᤔᤧᤛᤡ᤺ᤏᤧᤴᤗᤥ॥

⁵¹ᤀᤡᤱᤃᤠ᤹ᤀᤣ ᤂᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ॥ ᤜᤠ᤺ᤳᤗᤧ ᤁᤴ ᤂᤖᤧ᤺ᤱᤅᤡᤴ ᤆ᤹᤺ ᤂᤧᤱᤃ ᤛᤍᤠᤍᤡᤱ ᤜᤡᤱᤗᤥ॥ ᤁᤴ ᤂᤖᤧ᤺ᤱᤅᤡᤱᤃ ᤏᤠᤛᤡᤱᤃᤧᤴ ᤀᤠᤎᤰᤁᤡᤴᤏᤣᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤁᤴᤏᤡᤴ ᤐᤡᤖᤢᤱᤛᤡᤱᤗᤥ॥”

⁵²ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤗᤢᤶᤔᤥ “ᤁᤴ ᤔᤏᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰᤁᤠᤱ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤆᤠᤔᤠ ᤑᤠ᤹ᤀᤠᤱ ᤐᤡᤔᤠ ᤀᤠᤛᤢᤰᤐᤠᤒᤣ᥅” ᤔᤧᤒᤠ᤺ᤳᤋᤢᤖ ᤐᤠ᤺ᤴᤎᤱ ᤆᤥ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥

⁵³ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤧᤴᤇᤠᤶᤛᤠ᤺ᤸᤗᤧ ᤁᤢᤎᤰᤁᤡᤴ ᤔᤧᤴᤈᤠᤀᤣ ᤏᤢ ᤁᤢᤔᤠᤰᤂᤡ᤹ᤀᤡᤴ ᤔᤧᤴᤎᤢᤱᤅᤣ ᤌᤠᤖᤡᤰ ᤂᤡᤏᤡ᤹ᤀᤥ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤘᤠ᤹ᤏᤧᤴᤗᤥ॥

⁵⁴ᤁᤖ ᤀᤡᤱᤃᤠ᤹ ᤀᤠᤎᤰᤁᤡᤴ ᤁᤧᤈᤠᤒᤠ ᤏᤢ ᤀᤠᤔᤠᤰᤂᤡ᤹ ᤁᤧᤎᤢᤱᤒᤠᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤴ ᤁᤢᤏᤢᤵᤔᤠ ᤕᤧᤴᤏᤥ ᤀᤡᤱᤃᤠ᤹ ᤁᤢᤜᤡᤱᤘᤧᤳ ᤆᤥᤃᤢᤱᤗᤥ॥

⁵⁵ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤎᤰᤁᤡᤴ ᤜᤧᤰᤁᤩᤠᤱ ᤀᤠᤔᤠᤰᤂᤡ᤹ᤀᤡᤴ ᤛᤧᤰᤂᤠᤒᤠ ᤆᤠᤔᤠ ᤌᤢᤱᤔᤠ ᤆᤠᤖᤥ॥

⁵⁶ᤀᤡᤱᤃᤠ᤹ ᤀᤠᤎᤰᤁᤡᤴ ᤁᤧᤈᤠᤒᤠᤴ ᤏᤢ ᤀᤠᤔᤠᤰᤂᤡ᤹ ᤁᤧᤎᤢᤱᤒᤠᤴ ᤀᤡᤱᤃᤠ᤹ᤀᤥ ᤘᤠ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤧ᤹ᤀᤥ ᤘᤠ᤹ᤀᤠᤖᤥ॥

⁵⁷ᤜᤡᤱᤔᤴᤍᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤐᤠᤱᤄᤠᤱ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤸᤗᤧ ᤜᤡᤱᤅᤠᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤀᤠᤎᤰᤁᤡᤴ ᤁᤧᤈᤠᤒᤠᤴᤏᤠᤱ ᤀᤡᤱᤃᤠ᤹ ᤆᤥᤃᤢᤱᤅᤡᤸᤗᤧ ᤜᤡᤱᤗᤥ॥

⁵⁸ᤁᤴ ᤀᤠᤎᤰᤁᤡᤴᤏᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤂᤖᤧ᤺ᤱᤗᤥ॥ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤔᤴᤏᤠ᤺ᤴ ᤔᤧᤈᤀᤠᤱ ᤔᤧᤛᤩᤧ ᤁᤖ ᤁᤴ ᤂᤖᤧ᤺ᤱᤅᤡᤴ ᤁᤧᤈᤠ᤺ᤒᤠᤱᤃ ᤛᤍᤠᤍᤡᤱ ᤜᤡᤱᤗᤥ॥”

⁵⁹ᤕᤧᤛᤢᤖᤧ ᤁᤴ ᤐᤠ᤺ᤴᤏᤡᤴ ᤁᤐᤷᤏᤜᤢᤶᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤜᤢ᤹ᤖᤢᤛᤡᤸᤗᤧ ᤐᤠ᤺ᤳᤋᤢᤒᤠᤖᤥ॥

⁶⁰ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤖᤡᤰ ᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤐᤠ᤺ᤴᤏᤡᤱᤃ ᤁᤧᤛᤠᤰᤐᤠ ᤏᤡᤛᤠᤶᤗᤥ॥ ᤁᤴ ᤜᤠ᤺ᤳᤗᤧ ᤏᤠ᤺ᤵᤔᤠ ᤛᤢᤰᤋᤢᤒᤣ᥅”

⁶¹ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤢᤏᤢᤰᤏᤢᤰ ᤔᤧᤗ᤹ᤖᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤂ᤺ᤛᤢᤒᤡ᥅