31ᤀᤠᤏᤡᤃᤧ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧᤃ ᤕᤧ᤺ᤱᤄᤠᤍᤧᤴᤏᤥ ᤔᤴᤏᤠ᤺ᤴ ᤔᤧᤈ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤖᤧ᤺ᤱᤅᤡᤴ ᤆᤠᤔᤠ ᤐᤡᤖᤢᤛᤡᤖᤥ॥’”
32ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤥᤛᤠᤖᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤂᤖᤧ᤺ᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤴ ᤛᤧᤰᤂᤠᤒᤠ ᤂᤖᤧ᤺ᤱᤅᤡᤴ ᤐᤠᤏᤢᤍᤡᤱ ᤀᤠᤶᤒᤠᤖᤧᤏᤧ ᤁᤧᤒᤡᤖᤡᤒᤠᤖᤥ॥
33ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤁᤢᤄᤖᤧ᤺ᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠᤀᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠᤴᤏᤣᤖᤥ”
34ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤴ ᤂᤖᤧ᤺ᤱᤅᤡᤴ ᤛᤍᤠᤍᤡᤱ ᤕᤠᤵᤔᤡ ᤀᤠᤒᤡᤖᤧ᤹ᤀᤥ॥”
35ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ. ᤀᤡᤱᤃᤠ᤹ᤀᤥ ᤁᤧᤍᤠ᤺ᤒᤠᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤢᤛᤧᤳᤔᤧᤗᤠ᤺ᤰᤏᤧᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥ᤺ᤰᤐᤧᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤢᤘᤠᤔᤧᤔᤡ᤺ᤰᤏᤧᤴᤗᤥ॥
36ᤁᤖ ᤀᤡᤱᤃᤠ᤹ ᤕᤠᤵᤔᤡ ᤀᤠᤃᤧᤏᤡ᤺ᤛᤡᤛᤠᤱ ᤏᤛᤠ᤺ᤴ ᤀᤠᤃᤧᤴᤈᤥᤃᤡᤴ ᤑᤠ᤹ᤀᤠᤱ ᤛᤧᤰᤂᤠᤀᤣ ᤔᤧᤳᤏᤡᤱᤅᤠᤱ ᤘᤠ᤹ᤖᤥ॥
37ᤐᤠᤏᤢᤍᤡᤱ ᤐᤠ᤺ᤸᤗᤧ ᤐᤡᤀᤠᤒᤠᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤔᤧᤍᤠ᤹᤺. ᤜᤧᤰᤁᤩᤠᤱ ᤀᤠᤳᤋᤡᤴ ᤀᤡᤱᤃᤠ᤹ᤀᤥ ᤋᤠ᤺ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤖᤢᤱᤅᤡᤴᤗᤥ॥
38ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀᤠᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤛᤧ ᤔᤧᤴᤍᤠᤒᤧᤴᤗᤥ ᤁᤖ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤆᤥ᤺ᤰᤛᤧ ᤐᤠᤱᤄᤠᤱᤅᤠᤱ ᤋᤩᤠᤱᤒᤠᤖᤥ॥
ᤕᤢᤜᤢᤴᤏᤠ 6
ᤕᤢᤜᤢᤴᤏᤠ 6:31-38