ᤕᤢᤜᤢᤴᤏᤠ 6:2-14

²ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤍᤢᤰᤐᤠᤜᤠ᤹ ᤘᤣ᤺ᤴᤍᤢᤛᤡᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤔᤧᤏᤡ᤺ᤛᤢᤀᤠᤱ ᤔᤧᤘᤕᤧᤖᤥ॥

³ᤕᤧᤛᤢ᤺ᤴ ᤌᤥ ᤁᤥ᤺ᤰᤔᤠᤀᤥ ᤐᤣ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤢᤱᤛᤡᤱᤗᤥ॥

⁴ᤂᤧᤴ ᤕᤧᤶᤔᤥ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧ ᤆᤢᤖᤧᤀᤠᤱ ᤘᤕᤧᤖᤥ॥

⁵ᤜᤧᤰᤁᤩᤠᤱ ᤔᤏᤠᤜᤠ᤹ ᤂᤢᤏᤧ᤹ᤀᤥ ᤔᤧᤎᤠᤅᤧᤖ ᤔᤧᤒᤳᤇᤧᤒᤠ ᤕᤧᤛᤢᤖᤧ ᤏᤡ᤺ᤛᤢᤛᤡᤀᤠᤱ ᤑᤡᤗᤡᤵᤐᤧᤴ ᤛᤣ᤺ᤴᤍᤥᤛᤢ. “ᤀᤠᤸᤗ ᤀᤠᤳᤋᤡᤏᤢ ᤂᤖᤧ᤺ᤱᤅᤡᤴ ᤀᤠᤀᤡᤅᤢᤶᤔᤠᤱ ᤁᤴ ᤔᤏᤠᤜᤠ᤹ ᤀᤠᤈᤠ᤺ᤳᤋᤢᤶᤛᤡᤶᤒᤠᤒᤣ᥅”

⁶ᤂᤢᤏᤧ᤹ ᤑᤡᤗᤡᤵᤐᤧᤴ ᤁᤢᤏᤡᤱᤘᤠ᤹ ᤛᤠ᤹ᤔᤠ ᤑᤠ᤹ᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤒᤠᤖᤥ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤌᤣ ᤆᤥᤃᤢᤱ ᤁᤧᤗ᤹ᤒᤠᤴ ᤋᤃᤡᤛᤠ ᤁᤢᤏᤡᤱᤘᤠ᤹ᤀᤥ ᤘᤕᤧᤖᤥ॥

⁷ᤑᤡᤗᤡᤐᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤠᤏᤡ᤹ᤃ ᤁᤡᤵ ᤏᤧᤳᤇᤡ (᥈᥆᥆) ᤕᤠᤱᤗᤧ ᤂᤖᤧ᤺ᤱ ᤀᤠᤀᤡᤅᤢᤶᤔᤠᤱ ᤁᤴ ᤔᤏᤠᤜᤠ᤹ᤃ ᤆᤩ᤹ ᤆᤩ᤹ᤖᤰ ᤀᤠᤒᤡᤖᤢᤶᤛᤡᤶᤛᤠᤱ ᤀᤠᤴᤕᤥᤛᤢᤶᤛᤡᤶᤔᤡᤴᤗᤥ॥”

⁸ᤜᤧᤰᤁᤩᤠᤱ ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤁᤢᤜᤢ᤹ᤛᤠᤶᤒᤠ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ.

⁹“ᤁᤵᤔᤥ ᤆᤢᤰᤐᤠᤎᤡᤰᤗᤧ ᤅᤠᤛᤡ ᤜ᤺ᤰᤛᤡ᤺ ᤂᤖᤧ᤺ᤱ ᤏᤢ ᤏᤧᤳᤇᤡ ᤅᤠᤛᤠ ᤁᤳᤋᤢ᤹. ᤁᤖ ᤁᤶᤔᤩᤠᤰ ᤕᤖᤡᤰ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤕᤥᤔᤠᤛᤡᤒᤣ᥅”

¹⁰ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤢᤖᤠ ᤔᤧᤳᤋᤢᤛᤡ. “ᤁᤧᤖᤧᤰ ᤔᤏᤠᤜᤠ᤹ ᤕᤢᤱ ᤐᤠᤱᤄᤧᤶᤛᤡᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤖᤡᤰ ᤕᤠ᤺ᤴ ᤁᤧᤕᤢᤱᤒᤠ ᤏᤧᤏᤧᤒᤠ ᤋᤧᤴᤏᤥ ᤕᤢᤱᤔᤧᤒᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤵᤔᤥ ᤔᤧᤴᤇᤢᤔᤠ᤹ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤴᤏᤡ᤺ᤳᤇᤡᤱᤅᤣ ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤕᤠᤖᤡᤰ ᤔᤧᤘᤕᤧᤖᤥ॥

¹¹ᤕᤧᤛᤢᤖᤧ ᤂᤧᤴ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤜᤠ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤅᤠᤛᤠ᤺ᤴᤏᤠᤱ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤡ᤹ ᤕᤥᤕᤥ ᤜᤠ᤺ᤳᤋᤢᤛᤡᤖᤥ॥

¹²ᤂᤧᤴ ᤁᤠᤰ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤁᤠᤰ ᤁᤢᤈᤡ ᤁᤧᤏᤶᤒᤠᤜᤠ᤹ ᤛᤢᤵᤛᤧᤶᤔᤧ᤹ᤀᤥ. ᤁᤢᤈᤡᤌᤡᤰᤁᤠᤱ ᤆᤠᤔᤧᤛᤥ᤺ᤰᤏᤧᤴᤗᤖᤥ॥”

¹³ᤜᤧᤰᤁᤩᤠᤱ ᤂᤧᤴ ᤅᤠᤛᤡ ᤜ᤺ᤰᤛᤡ᤺ ᤂᤖᤧ᤺ᤱᤜᤠ᤹ ᤔᤏᤠᤜᤠ᤹ᤖᤧ ᤔᤧᤈᤀᤠᤱ ᤁᤢᤈᤡ ᤁᤧᤏᤶᤒᤠ ᤂᤖᤧ᤺ᤱᤜᤠ᤹ ᤔᤧᤛᤢᤵᤛᤢᤸᤗᤧᤃ ᤌᤡᤰ-ᤏᤧᤳ ᤏᤀᤡᤔᤠᤏᤧ ᤋᤡᤶᤛᤧ᥄

¹⁴ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤴ ᤔᤧᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠ᤺ ᤗ᤹ᤖᤡᤰ ᤏᤡᤱᤛᤠᤱ ᤆᤥ᤺ᤰᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤱᤃ ᤛᤧᤰᤂᤠᤛᤠᤱ ᤂᤢᤏᤧ᤹ᤀᤣᤖᤥ॥”