ᤕᤢᤜᤢᤴᤏᤠ 5:25-45

²⁵ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤸᤗ ᤕᤧᤶᤔᤡᤴ ᤋᤠᤖ ᤐᤳᤗᤥ. ᤁᤧᤛᤡ᤺ᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤀᤡᤰᤗᤠ᤺ᤴ ᤔᤧᤄᤧᤵᤛᤢ᤹ ᤜᤧᤰᤁᤩᤠᤱ ᤁᤢᤀᤡᤰᤗᤠ᤺ᤴ ᤁᤧᤄᤧᤶᤒᤠᤜᤠ᤹ ᤔᤧᤜᤡᤱᤗᤥ ᤜᤧᤰᤁᤩᤠᤱ ᤛᤧᤰᤂᤠᤀᤣ ᤂᤧᤴ ᤕᤧᤶᤔᤡᤱᤃ ᤀᤠᤸᤗᤥᤀᤣᤖᤥ॥

²⁶ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤠᤰ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤸᤗᤧ ᤁᤢᤒᤢᤴᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛ᤻ᤛᤠ᤺ᤴᤏᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤆᤥᤃᤢᤀᤠᤱ ᤘᤠ᤹ᤖᤥ॥

²⁷ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤠᤰ ᤔᤧᤴᤇᤠᤶ ᤛᤢᤘᤠᤱ ᤛᤶᤍᤠᤱ ᤂᤠᤛᤧᤴ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤢᤰ ᤐᤡᤖᤢᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤔᤧᤴᤇᤠᤶᤛᤠ᤺ᤖᤥ॥

²⁸“ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹. ᤛᤧᤰᤂᤠᤀᤣ ᤀᤰᤋᤱᤒᤠ ᤕᤧᤶ ᤋᤠᤖ ᤐᤳ. ᤂᤧᤴ ᤕᤧᤶᤔᤥᤃ ᤀᤡᤵᤐᤢᤱᤅᤥᤒᤠ ᤁᤠᤰ ᤁᤢᤛᤡᤘᤧᤳᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤀᤡᤰᤗᤠ᤺ᤴ ᤔᤧᤄᤧᤵᤛᤢᤀᤠᤱ

²⁹ᤂᤧᤱᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱ–ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹. ᤁᤖ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥”

³⁰ᤀᤡᤱᤃᤠ᤹ ᤀᤠᤒᤠᤅᤣᤃ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤁᤠᤴᤗᤥ. ᤁᤖ ᤀᤡᤱᤃᤠ᤹ ᤂᤧᤵᤛᤢᤱᤒᤠ ᤁᤢᤀᤡᤛᤡ᤺ᤰᤗᤰ ᤂᤠᤛᤧᤴ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤆᤥᤃᤢᤱᤒᤠ ᤂᤠᤛᤧᤴᤏᤡᤴ ᤛᤠᤶᤕᤥᤏᤡᤒᤠ ᤆᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤀᤡᤸᤗᤧ ᤌᤠᤵᤋᤢᤒᤠ ᤌᤣᤀᤠᤱ ᤔᤧᤈᤥ᤺ᤰᤁᤠᤴ. ᤁᤖ ᤕᤠᤵᤔᤡ ᤁᤧᤒᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰᤗᤰ ᤆᤥᤃᤢᤱᤗᤥ॥

³¹“ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤀᤠᤒᤠᤅᤣ ᤋᤥ᤺ᤴᤍᤡ ᤐᤡᤖᤢᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤍᤥ᤺ᤴᤍᤡᤴ ᤛᤧᤰᤂᤠ ᤔᤧᤒᤥ᤺ᤱᤏᤧᤸᤗᤥ॥

³²ᤁᤖ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤒᤠᤱᤃ ᤘᤣ᤹ᤎᤡᤰ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤥ᤺ᤴᤍᤡᤱᤃ ᤛᤧᤰᤂᤠ ᤆᤥ᤺ᤰᤗᤥ॥”

³³ᤛᤧᤰᤂᤠᤀᤣ ᤂᤡᤏᤡ᤹ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤖᤥ ᤁᤢᤒᤠ᤺ᤴ ᤂᤧᤶᤛᤧ ᤁᤧᤒᤠᤱᤄᤢᤶᤛᤡᤶ ᤜᤧᤰᤁᤩᤠᤱ ᤛᤧᤰᤂᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤋᤥ᤺ᤴᤍᤡ ᤐᤡᤖᤢᤀᤠᤱ ᤘᤠ᤹ᤖᤥ॥

³⁴ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧᤴ ᤋᤥ᤺ᤴᤍᤡ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴᤗᤥ. ᤁᤖ ᤁᤴ ᤁᤠᤰ ᤐᤠ᤺ᤴᤜᤠ᤹ᤃ ᤂᤡᤏᤡ᤹ ᤛᤧᤴᤗᤵ ᤁᤧᤄᤥ᤺ᤛᤢᤶᤗ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤖᤥ॥

³⁵ᤕᤢᤜᤢᤴᤏᤠ᤺ᤱᤃ ᤛᤣᤔᤡ ᤁᤢᤀᤡᤛᤡ᤺ᤰ ᤁᤧᤍᤡ᤺ᤵᤐᤠ ᤏᤢ ᤀᤥ᤺ᤳᤋᤡ ᤁᤧᤒᤡᤒᤠ ᤘᤕᤧ ᤜᤧᤰᤁᤩᤠᤱ ᤛᤵᤑᤠᤎᤡᤰᤛᤠᤱ ᤂᤢᤏᤧ᤹ ᤁᤢᤀᤥ᤺ᤳᤋᤡ᤺ᤴ ᤂᤡᤏᤡ᤹ ᤛᤡᤖᤠ᤹ ᤌᤠᤅᤧᤖᤥ.

³⁶ᤁᤖ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤕᤢᤜᤢᤴᤏᤠ᤺ᤸᤗᤧ ᤁᤢᤍᤥ᤺ᤴᤍᤡᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤋᤥ᤺ᤴᤍᤡ ᤘᤠ᤹. ᤂᤧᤱᤃ ᤆᤥᤃᤢᤱᤗ ᤘᤠ᤹ᤀᤠᤒᤠ ᤀᤠᤶᤒᤠᤖᤧ ᤆᤥ᤺ᤰᤔᤠ ᤛᤢ᤺ᤵᤔᤠ ᤑᤠ᤹ᤀᤠᤱ ᤐᤡᤖᤠᤱᤒᤠ ᤕᤠ᤺ᤶᤒᤰᤁᤡᤸᤗᤧᤀᤣ ᤐᤠᤏᤢᤍᤡᤱ ᤀᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤠᤱᤒᤠ ᤑᤠ᤹ᤀᤠᤱ ᤋᤥ᤺ᤴᤍᤡ ᤁᤧᤒᤡᤖᤡᤖᤥ॥

³⁷ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤀᤠᤱ ᤘᤠ᤹ᤖᤥ॥ ᤂᤡᤏᤡ᤹ ᤀᤠᤵᤑᤠᤸᤗᤧᤀᤠᤱ ᤁᤢᤒᤠ᤺ᤴ ᤔᤧᤱᤄᤧᤶᤔᤣ ᤏᤢ ᤂᤢᤏᤧ᤹ ᤔᤧᤴᤏᤡᤀᤣ ᤁᤧᤘᤕᤡ᤹ᤖᤥ॥

³⁸ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ᤀᤥ ᤔᤧᤘᤠ᤹ᤏᤧᤴᤗᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠᤱᤄᤢᤒᤠ ᤔᤏᤠ᤺ᤴ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ॥

³⁹ᤂᤡᤏᤡ᤹ᤃ ᤛᤠᤶᤕᤥᤛᤠᤵᤗᤠ᤺ᤴ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤖᤢᤶᤗᤥ ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢᤶᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶ. ᤁᤖ ᤂᤧᤴ ᤛᤠᤶᤕᤥᤛᤠᤵᤗᤠ᤺ᤸᤗᤧᤀᤣ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤖᤡ᤹ᤖᤥ॥

⁴⁰ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤡᤱᤃᤠ᤹ᤀᤥ ᤋᤠ᤺ᤔᤠᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠ ᤏᤡᤱᤘᤠ᤹ ᤁᤧᤴᤈᤥᤃᤢᤶᤔᤡᤴᤗᤥ॥

⁴¹“ᤀᤡᤱᤃᤠ᤹ᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤏᤠᤖᤠ ᤔᤧᤓᤥ᤺ᤛᤢᤖ ᤔᤧᤗ᤹ᤀᤠᤴᤗᤥ॥

⁴²ᤁᤖ ᤂᤡᤏᤡ᤹ ᤀᤠᤰᤋᤱᤒᤠ ᤁᤧᤈᤥᤃᤡ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤏᤡᤱᤗᤥ॥ ᤂᤡᤏᤡ᤹ ᤏᤡᤱᤘᤠ᤹ᤀᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤶᤔᤧᤳᤋᤢᤶᤔᤡᤴᤒᤠᤴ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ॥

⁴³ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤢᤰ ᤐᤡᤖᤠᤱᤅᤠᤱ ᤐᤠᤱᤄᤠᤱᤛᤠᤱ ᤕᤠᤵᤔᤡ ᤗᤠᤱᤃᤧᤴᤍᤠ᤺ᤰᤋᤡᤴᤗᤥ ᤁᤖ ᤘᤣ᤹ᤜᤠ᤹ ᤜᤠ᤺ᤳᤗᤧᤀᤠᤱ ᤕᤢᤰ ᤔᤧᤶᤒᤡᤀᤣ ᤀᤠᤒᤠᤅᤣ ᤂᤢᤏᤡ᤹ ᤕᤢᤰᤁᤥ ᤁᤧᤍᤠ᤺ᤒᤠᤜᤠ᤹ ᤂᤡᤏᤡ᤹ ᤗᤠᤱᤃᤧᤍᤠ᤺ᤰᤋᤢᤶᤛᤡᤶᤗᤥ॥

⁴⁴ᤂᤡᤏᤡ᤹ ᤀᤠᤒᤠᤅᤣ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤒᤡᤀᤠᤛᤡ. ᤁᤖ ᤌᤡᤰᤗᤰ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠ ᤔᤡᤱᤛᤥ ᤀᤡᤱᤎᤠ᤺ᤱᤅᤡᤱᤃ ᤁᤧᤱᤃᤥ᤺ᤳᤋᤢᤶᤔᤡᤴ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤛᤢᤰᤋᤡᤒᤣ᥅”

⁴⁵“ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤍᤃᤡ ᤀᤠᤵᤋᤡᤰ ᤔᤧᤃᤢ᤺ᤳᤏᤡᤱᤅᤡᤴᤗᤥ. ᤁᤖ ᤂᤡᤏᤡ᤹ ᤏᤡᤱᤛᤠᤱ ᤁᤧᤈᤥᤃᤢᤶᤒᤠ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤸᤗᤧᤀᤣ ᤂᤡᤏᤡ᤹ ᤀᤠᤵᤋᤡᤰ ᤁᤧᤃᤢ᤺ᤳᤋᤡ᤹ᤖᤥ॥