ᤕᤢᤜᤢᤴᤏᤠ 4:38-50

³⁸ᤀᤡᤱᤃᤠ᤹ᤀᤠᤱ ᤂᤡᤏᤡ᤹ ᤆᤠ ᤁᤧᤴᤜᤣ᤹ᤖᤢᤶᤔᤡᤴᤒᤥ ᤐᤥᤃᤢᤃᤧᤴ ᤁᤢᤈᤠ ᤛᤢᤶᤛᤧ ᤐᤠᤱᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤘᤣ᤹ᤜᤠ᤹ᤖᤧ ᤕᤠᤶᤒᤢᤎᤡᤰ ᤔᤧᤈᤥᤃᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤢᤏᤡ᤹ ᤕᤠᤶᤒᤢᤎᤡᤰᤗᤧᤴ ᤀᤡᤴᤎᤠ᤺ᤱᤅᤡᤴ ᤂᤡᤏᤡ᤹ ᤁᤧᤄᤥ᤺ᤛᤢᤶᤔᤠᤱ ᤘᤠ᤹ᤖᤥ॥”

³⁹ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤠᤰ ᤀᤠᤕᤠ᤺ᤶᤒᤰᤜᤠ᤹ ᤂᤢᤏᤧ᤹ ᤆᤧᤰᤋᤠᤱᤗᤥ ᤗ᤹ᤖᤡᤰ ᤐᤠ᤺ᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤐᤠᤱᤈᤢᤶᤗᤠᤶ ᤁᤧᤍᤠ᤺ᤒᤠ ᤕᤖᤡᤰ ᤛᤠᤔᤖᤡᤜᤠ᤹ᤖᤧ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥

⁴⁰ᤛᤠᤔᤖᤡᤜᤠ᤹ ᤂᤢᤏᤧ᤹ ᤁᤢᤍᤢᤶᤛᤧ ᤔᤧᤍᤩᤧᤀᤠᤱ ᤀᤠᤏᤡᤃᤧᤏᤢ ᤌᤡᤰᤕᤧᤴ ᤏᤡᤕᤧᤴ ᤌᤠᤖᤡᤰ ᤕᤠ᤺ᤰᤋᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤵᤔᤥ ᤏᤡᤕᤧᤴ ᤌᤠᤖᤡᤰ ᤕᤠ᤺ᤰᤋᤧᤖᤥ॥

⁴¹ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤏᤛᤠᤏᤡᤒᤠ ᤔᤧᤒᤥ᤺ᤰᤂᤧᤖᤥ॥

⁴²ᤂᤧᤱᤜᤠ᤹ᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤀᤰᤂᤣ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤂᤧᤶᤔᤏᤠᤒᤠᤸᤗᤧᤖᤰ ᤕᤧᤛᤢ᤺ᤴ ᤏᤛᤠ᤺ᤴ ᤆᤥ᤺ᤰᤔᤏᤠᤒᤠ ᤔᤧ᤺ᤴ. ᤁᤖ ᤀᤠᤸᤗᤥᤃ ᤀᤠᤏᤡᤃᤧ ᤀᤠᤒᤠᤅᤣ ᤂᤢᤏᤧ᤹ ᤁᤢᤒᤠ᤺ᤴᤜᤠ᤹ ᤂᤧᤵᤛᤢᤶᤒᤠ ᤜᤧᤰᤁᤩᤠᤱ ᤁᤴ ᤔᤏᤠ᤺ᤱᤃ ᤛᤧᤰᤂᤠᤛᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤛᤧᤴᤗᤵᤍᤠᤱᤒᤠ ᤑᤠ᤹ᤀᤠᤱ ᤀᤠᤏᤡᤃᤧ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤒᤠᤸᤗᤧ ᤆᤥᤃᤢᤸᤗᤧ ᤏᤛᤠ᤺ᤴ ᤆᤥ᤺ᤰᤔᤏᤠᤒᤠᤖᤥ॥”

⁴³ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤡᤕᤧᤴ ᤀᤣᤃᤠᤱ ᤀᤠᤒᤠᤅᤣ ᤁᤢᤗᤠᤈᤣ᤹ ᤃᤠᤗᤡᤗ ᤌᤢᤶ ᤗᤧᤵᤔᤠᤱ ᤌᤠᤛᤡᤱᤗᤥ॥

⁴⁴(ᤀᤠᤸᤗ ᤕᤧᤛᤢᤖᤧ ᤀᤠᤒᤠᤅᤣ ᤀᤰᤂᤣᤗ᤹ᤖᤡᤰ ᤋᤃᤡ ᤐᤠ᤺ᤳᤋᤢᤀᤠᤱ ᤘᤕᤧ “ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤂᤢᤏᤧ᤹ ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤶᤒᤡᤖᤢᤴᤗᤥ॥”)

⁴⁵ᤕᤧᤛᤢ᤺ᤴ ᤃᤠᤗᤡᤗ ᤁᤧᤖᤧᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤢᤖᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤖᤢᤛᤗᤧᤶᤔᤥ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤔᤧᤒᤣᤀᤠᤱ ᤔᤧᤘᤕᤧᤸᤗᤧ ᤕᤧᤛᤢᤖᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤘᤕᤧᤖᤥ॥

⁴⁶ᤂᤢᤏᤧ᤹ ᤕᤠᤶᤔᤥ ᤃᤠᤗᤡᤗᤒᤠ ᤁᤠᤏᤠ ᤐᤠᤱᤈᤢᤶᤔᤥ ᤐᤣ॥ ᤂᤧᤵᤔᤥ ᤂᤢᤏᤧ᤹ ᤆᤫᤠ᤺ᤳᤋᤡᤴ ᤆᤧᤸᤗᤧᤰᤛᤣ᤹ ᤌᤡ᤺ ᤆᤥᤃᤢᤀᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤗᤳᤇᤠ ᤛᤢᤜᤠᤱᤕᤢᤰᤐᤠᤸᤗᤧ ᤁᤢᤛ᤻ᤛᤠ᤺ᤴ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤛᤠ᤹ᤖᤡᤰ ᤋᤢᤃᤧᤀᤠᤱ ᤏᤧᤛ᤻ᤛᤧᤖᤥ॥

⁴⁷ᤂᤧᤸᤗᤧ ᤕᤧᤛᤢ᤺ᤴ ᤕᤜᤢᤍᤡᤕᤠᤗᤠᤶ ᤃᤠᤗᤡᤗᤀᤥ ᤁᤧᤖᤧ ᤋᤩᤧ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤂᤧᤵᤔᤥ ᤁᤢᤍᤢᤶᤛᤧ ᤐᤣ॥ ᤂᤧᤸᤗᤧ ᤕᤧᤛᤢ᤺ᤴ ᤋᤢᤔᤢ ᤜᤧᤰᤁᤩᤠᤱ ᤁᤐᤷᤏᤜᤢᤶᤔᤥ ᤕᤧ᤹ᤀᤠᤱ ᤛᤡ᤺ᤔᤠᤗᤡᤱᤎᤥ ᤁᤧᤃᤧᤵᤐᤠᤀᤠᤱ ᤁᤧᤏᤧᤒᤠ ᤀᤠᤛ᤻ᤛᤠ᤺ᤴ ᤘᤣ᤺ᤴᤍᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤖᤥ॥

⁴⁸ᤕᤧᤛᤢᤖᤧ ᤂᤧᤴ ᤛᤢᤜᤠᤱᤕᤢᤰᤐᤧᤴ ᤔᤧᤳᤋᤢ. “ᤂᤡᤏᤡ᤹ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤴᤏᤡᤀᤣ ᤌᤠᤖᤡᤰ ᤀᤠᤵᤑᤠᤸᤗᤧᤀᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ॥”

⁴⁹ᤂᤧᤴ ᤛᤢᤜᤠᤱᤕᤢᤰᤐᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠ᤺ᤴ ᤔᤧᤴᤇᤡ᤺ᤀᤣᤛᤠ ᤕᤧ᤹ᤀᤥ॥”

⁵⁰ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤣᤃᤧ᤹ᤀᤥ. ᤁᤧᤛ᤻ᤛᤠ᤺ᤴ ᤜᤡᤱᤗᤥ॥” ᤜᤧᤰᤁᤩᤠᤱ ᤂᤧᤸᤗᤧᤀᤠᤱ ᤕᤧᤛᤢᤖᤧ ᤁᤢᤒᤠ᤺ᤴᤏᤡᤴ ᤏᤛᤠ᤺ᤴ ᤆᤥᤃᤢᤀᤠᤱ ᤌᤠᤛᤡᤱᤗᤥ॥