ᤕᤢᤜᤢᤴᤏᤠ 16:17-29

¹⁷ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤏᤡ᤹ ᤍᤠᤱᤒᤠᤸᤗᤧ ᤛᤵᤑᤠᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤀᤠᤃᤧᤴᤏᤡ᤺ᤛᤡᤴ ᤁᤖ ᤕᤠᤱᤛᤡ ᤛᤵᤑᤠᤀᤠᤱ ᤕᤠᤶᤔᤥ ᤕᤠᤵᤔᤡ ᤁᤧᤏᤡ᤺ᤛᤡ᤹ᤖᤥ ᤗ᤹ᤖᤡᤰ ᤌᤧᤔᤠ ᤐᤠ᤺ᤳᤋᤢᤒᤠᤒᤣ᥅ ᤐᤠᤏᤢᤍᤡᤱ ᤐᤠ᤺ᤸᤗᤥ ᤐᤣ᤺ᤰᤁᤠᤖ ᤐᤳᤋᤠ ᤗ᤹ᤖᤡᤰ ᤌᤣ ᤐᤠ᤺ᤳᤋᤢᤒᤠᤒᤣ᥅

¹⁸ᤕᤠᤱᤛᤡ ᤛᤵᤑᤠᤀᤠᤱ ᤗ᤹ᤖᤡᤰ ᤂᤢᤏᤧ᤹ ᤌᤣ ᤐᤠ᤺ᤳᤋᤢᤒᤠᤀᤡ᥅ ᤀᤠᤏᤡ᤹ ᤌᤣᤀᤠᤱ ᤁᤢᤛᤡᤱ ᤀᤠᤴᤏᤡ᤺ᤳᤋᤢᤶᤔᤡᤴᤗᤥ॥”

¹⁹ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤓᤠ ᤐᤠ᤺ᤴ ᤛᤣ᤺ᤴᤍᤥ᤺ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤠ᤹ ᤗ᤹ᤖᤡᤰ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤵᤑᤠᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤁᤧᤴᤏᤡ᤺ᤛᤡᤴᤗᤥ. ᤁᤖ ᤕᤠᤱᤛᤡ ᤛᤵᤑᤠᤀᤠᤱ ᤕᤠᤶᤔᤥ ᤕᤠᤵᤔᤡ ᤁᤧᤏᤡ᤺ᤛᤡ᤹ᤖᤥ ᤗ᤹ᤖᤡᤰ ᤐᤠ᤺ᤳᤋᤢᤱᤒᤠᤀᤥ ᤂᤡᤏᤡ᤹ ᤛᤣ᤺ᤴᤃᤧᤍᤥ᤺ᤀᤠᤛᤡᤖ ᤁᤧᤒᤳᤇᤡᤒᤡ᥅

²⁰ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤁᤧᤜᤠᤒᤡ᤹. ᤔᤣᤖᤡᤱ ᤁᤧᤎᤰᤋᤡ᤹. ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤃ ᤔᤧᤛ᤺ᤳᤗᤥ॥ ᤂᤡᤏᤡ᤹ ᤔᤣᤖᤡᤱ ᤁᤧᤎᤰᤋᤡ᤹. ᤁᤖ ᤂᤡᤏᤡ᤹ ᤔᤣᤖᤡᤱ ᤌᤰᤔᤠᤱᤃ ᤛ᤺ᤵᤔᤠᤀᤥ ᤗᤧᤱᤗᤥ॥

²¹ᤂᤧᤴ ᤕᤧᤶᤔᤡᤱᤃ ᤛᤠᤘᤠ᤺ᤴᤍᤢᤱᤅᤡᤸᤗᤧ ᤕᤠᤱᤄᤢᤒᤠ ᤔᤧᤴᤇᤢᤔᤠ᤹ᤀᤡᤴ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥ ᤁᤢᤛ᤻ᤛᤠ᤺ᤴ ᤛᤠᤘᤠ᤺ᤴᤍᤢ ᤛᤢᤖᤢᤀᤠᤱ ᤁᤠᤰ ᤛᤠᤘᤠ᤺ᤴᤍᤢᤱᤅᤡᤴ ᤏᤡᤱᤘᤠ᤹ ᤑᤣ᤺ᤳᤇᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤅᤧ᤺ᤰᤘᤠᤎᤡᤰ ᤛᤠᤘᤠ᤺ᤴᤍᤢᤒᤠᤀᤥ ᤛ᤺ᤳᤗᤥ॥

²²ᤂᤡᤏᤡ᤹ ᤗᤠᤃᤡᤀᤠᤱ ᤒᤠ ᤜᤧᤰᤁᤣ ᤐᤥ᤺ᤱ–ᤀᤠᤸᤗᤥᤃ ᤔᤣᤖᤡᤱ ᤁᤧᤎᤰᤋᤡ᤹. ᤁᤖ ᤀᤡᤱᤃᤠ᤹ ᤕᤠᤶᤔᤥ ᤂᤡᤏᤡ᤹ ᤋᤢᤶᤛᤧ ᤋᤠᤀᤠᤸᤗᤧ ᤂᤡᤏᤡ᤹ ᤁᤧᤛ᤺ᤳᤋᤡ᤹ᤖᤥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤛ᤺ᤵᤔᤠᤴ ᤏᤠᤵᤔᤠᤀᤠᤱ ᤋᤣ᤹ᤔᤠ ᤁᤧᤴᤇᤢᤰᤋᤡᤴᤗᤥ॥

²³ᤂᤧᤴ ᤕᤧᤴᤏᤥ ᤂᤡᤏᤡ᤹ ᤌᤣᤀᤠᤱ ᤕᤠᤵᤔᤡ ᤛᤣ᤺ᤴᤃᤧᤴᤍᤥ᤺ᤛᤡᤴᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤔᤡᤱᤅᤥ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤧᤒᤡᤖᤡ᤹ᤖᤥ॥

²⁴ᤀᤠᤸᤗᤥ ᤌᤠᤖᤡᤰ ᤀᤰᤂᤣᤗ᤹ᤖᤡᤰ ᤀᤠᤔᤡᤱᤅᤥ ᤌᤣᤀᤠᤱ ᤔᤧᤴᤏᤠ᤺ᤰᤁᤣ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤏᤠ᤺ᤰᤋᤧᤶᤔᤧ᤹ ᤜᤧᤰᤁᤩᤠᤱ ᤁᤧᤄᤥ᤺ᤛᤢᤶᤔᤠᤱ ᤁᤧᤛ᤺ᤳᤋᤡ᤹ᤖᤥ॥

²⁵ᤀᤠᤸᤗᤥᤃ ᤀᤡᤱᤃᤠ᤹ ᤐᤠ᤺ᤶᤑᤪᤧᤶᤔᤥ ᤐᤠ᤺ᤳᤋᤠᤖ ᤘᤠ᤹ᤀᤠᤛᤠᤱ ᤋᤠ᤺ᤴᤍᤡ ᤁᤧᤍᤠ᤺ᤒᤠ ᤕᤧᤶᤔᤥᤃ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤠᤴᤗᤥ. ᤁᤖ ᤀᤠᤶᤒᤠᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤍᤥ᤺ᤵᤔᤠᤀᤣ ᤔᤧᤳᤏᤡᤱᤗᤥ॥

²⁶ᤂᤧᤴ ᤕᤧᤶᤔᤥ ᤂᤡᤏᤡ᤹ᤀᤣ ᤀᤡᤱᤃᤠ᤹ ᤀᤠᤔᤡᤱᤅᤥ ᤁᤧᤏᤠ᤺ᤰᤋᤢᤶᤗᤥ॥ ᤀᤡᤱᤃᤠ᤹ ᤂᤡᤏᤡ᤹ ᤗᤠᤃᤡ ᤐᤠᤏᤢᤍᤡᤱ ᤐᤠ᤺ᤴ ᤏᤠ᤺ᤰᤋᤢᤱ ᤐᤡᤏᤡᤱ ᤑᤠ᤹ᤀᤠᤱ ᤔᤧᤒᤠ᤺ᤳᤋᤠᤴᤗᤥ॥

²⁷ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤠᤱᤒᤠᤴ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶ ᤜᤧᤰᤁᤩᤠᤱ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤳᤋᤡᤒᤠᤸᤗᤧ ᤆᤥᤃᤢᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤒᤠᤅᤣ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡ᤹ᤖᤥ॥

²⁸ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤩᤠᤱᤒᤠᤖᤥ॥ ᤀᤠᤸᤗᤥᤃ ᤀᤡᤱᤃᤠ᤹ ᤕᤠᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤖᤢᤱᤅᤠᤱ ᤐᤠᤏᤢᤍᤡᤱ ᤐᤠ᤺ᤸᤗᤥ ᤏᤢ᤺ᤱᤅᤠ ᤐᤣ᤺ᤰᤁᤠᤖ ᤐᤳᤋᤠᤖᤥ॥”

²⁹ᤜᤧᤰᤁᤩᤠᤱ ᤕᤧᤛᤢ᤺ᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤸᤗᤥᤃ ᤂᤧᤏᤧ᤹ ᤐᤠ᤺ᤴᤑᤪᤧᤶᤔᤡᤴ ᤀᤥᤃᤵ ᤔᤧᤴᤈᤥ᤺ᤰᤁᤣ ᤁᤢᤍᤥ᤺ᤵᤔᤥ ᤁᤧᤒᤠ᤺ᤳᤗ ᤁᤧᤒᤳᤗᤥ॥