ፆኦሲ ማዾ''ም ዳኪንቴዞንሢኮ ማዾ'' 23:1-24

¹ዬካፓ ጳውሎሴ ዎጎ ዎጋ ዓሶ ጊዥ ጌዒ ዛጋዖ፦ «ዒሾንሢዮቴ! ሓኖ'' ሄላ''ንዳኣና ቢያ ዎዴ ፆኦሲ ቤርቶይዳ ታ ናንጌሢ ኮሺ ማሊሢናኬ» ጌዔኔ።

²ቄኤሶ ቢያኮ ሱኡጋሢ፥ ሓናኒያ ጋዓንቴ ጳውሎሴኮ ዻንጎ ባዓንዳጉዲ ኮራ ዔቂ ዓኣ ዓሶ ዓይሤኔ።

³ዬማ''ና ጳውሎሴ ሃናኒያም፦ «ኔኤኒ ቦኦሪንታሢና ዑፃ ሜኤቺንቴ ኮጫሦ! ኔና ፆኦሲ ጳርቃንዳኔ፤ ዎጌ ጎይሢና ዎጋኒ ሓካ ኔ ዴዒ ዓኣዖ ዎጌባኣ ጎይሢና ታና ጳርቃንዳጉዲ ኔ ዓይሣ?» ጌዔኔ።

⁴ዒኢካ ዓኣ ዓሳ ጳውሎሴ ኮራ፦ «ቄኤሶ ቢያኮ ሱኡጋሢ ማዔ፥ ፆኦሲም ማዻሢ ኔ ጫጫሽካ?» ጌዔኔ።

⁵ጳውሎሴያ፦ «ዒሾንሢዮቴ! ቄኤሶኮ ቢያ ዒ ሱኡጌ ማዔሢ ታ ዔሪባኣሢሮኬ፤ ጌኤዦ ማፃኣፖይዳ ‹ኔ ዴሮ''ኮ ሱኡጋሢ ዑፆይዳ ፑርታ ጌኤሲ ጌስቲፖ› ጌይንቲ ፃኣፒንቴኔ» ጌዔኔ።

⁶ጳውሎሴ ዒኢካ ዓኣ ዓሶይዳፓ ሄካሢ ፔርሴ ዓሲ፤ ዛላ'' ሶዶቄ ዓሲ ማዔሢ ዔራዖ፦ «ዒሾንሢዮቴ! ታኣኒ ፔርሴ ዓሶ ፃጳፓ ሾይንቴያ ፔርሴ ዓሲኬ፤ ሓይሾ ሓሢ ታኣኒ ዎጎ ዓሶ ቤርቶ ሺኢኬሢ ሓይቄ ዓሲ ዔቃንዳያታሢ ጉሙርቃሢሮኬ» ጌዒ ዑኡዞ ፔኤሲ'' ዼ'ጊዲ ዎጎ ዎጋ ዓሶ ባኣካ'' ኬኤዜኔ።

⁷ጳውሎሴያ ዬያ ኬኤዛዛ ፔርሴ ዓሶና ሶዶቄ ዓሶና ባኣካ'' ዣላ ማዢንቴም ዎጎ ዎጋ ዓሳ ላምዖ ፓቂንቴኔ።

⁸ዓይጎሮ ጌዔቶ ሶዶቄ ዓሳ፦ «ሓይቢፓ ዔቂሢ ባኣሴ፤ ፆኦሲኮ ኪኢታንቻኣ ባኣሴ፤ ዓያናኣ ባኣሴ» ጋዓዛ፥ ፔርሴ ዓሳ ጋዓንቴ «ዬይ ባካ ቢያ ዓኣኔ» ጌዒ ጉሙርቃኔ።

⁹ዬያሮ ዼኤፒ ዣላ ዔቄኔ፤ ፔርሴ ፃጳፓ ማዔ ፔቴ'' ፔቴ'' ሙሴ ዎጎ ዔርዛ ዓሳ ዔቃዖ፦ «ኑኡኒ ሓያ ዓሢዳ ፔቴታዖ ፑርታ ባኣዚ'' ዴንቂባኣሴ፤ ዓያና ሓሣ ፆኦሲኮ ኪኢታንቻ ዒዛም ኬኤዜያ ናንዳኔ ኑ ዓይጎ ዔራንዳይ?» ጌዒ ማርሜኔ።

¹⁰ዣላሢ ዶዲ ዶዲ ዴንዴሢሮ ዓሳ ጳውሎሴ ሾኦሊ ላኣሉዋጉዲ ፖኦሊሶ ዓይሣሢ ዒጊጫዖ፦ «ኬዲ'' ዓሶ ባኣካ''ፓ ጳውሎሴ ጎቺ ኬሲ'' ዔኪ ዬዒ፥ ፖኦሊሳ ዓኣ ቤዞ ዔኪ ዓኣዹዋቴ!» ጌዒ ፖኦሊሶ ዓይሤኔ።

¹¹ዬኖ ዋንቴሎ ጎዳሢ ጳውሎሴኮ ኮይሎ''ይዳ ዔቃዖ፦ «ዒጊጪፖ! ዬሩሳላሜይዳ ታኣም ኔ ማርካዼሢጉዲ ሓሣ ሮሜይዳኣ ኔ ታኣም ማርካዻንዳያ ኮይሳኔ» ጌዔኔ።

¹²ሳዓ ካራዛ ዓይሁዶ ዓሳ ቡኪንታዖ፦ «ጳውሎሴ ኑ ዎዹዋዖ ሙኡዚ''ያ ሙዒ ዑሽኮ ባኣዚ''ያ ዑሽካዓ» ጌዒ ጫኣቄኔ።

¹³ዬኖ ጌዒ ፑርቶ ማሊፆና ዎላ'' ዞርቴ ዓሶኮ ፓይዳ'' ዖይዲታሚ''ፓ ዑሣኬ።

¹⁴ዔያታ ቄኤሶኮ ሱኡጎና ጪሞና ኮራ ዓኣዻዖ፦ « ‹ጳውሎሴ ኑኡኒ ዎዹዋዖ ሙኡዚ'' ሙዒንዱዋሴ› ጌዒ ጫኣቄኔ፤

¹⁵ዬያሮ ዒንሢ ዎጎ ዎጋ ዓሶና ዎላ'' ጌስታዖ፥ ኮሺ'' ዒንሢ ዖኦጫንዳ ባኣዚ'' ዓኣያ ማሊሲጋፓ፥ ጳውሎሴ ዒንሢም ዒዚ ዔኪ ዬዓንዳጉዲ ፖኦሊሶ ዓይሣሢ ዖኦጩዋቴ። ኑኡኒያ ዒዚ ሃካ ዒንሢ ቤርቶ ሄላ''ንዳሢኮ ቤርታ ዒዛ ዎዻኒ ጊኢጌኔ» ጌዔኔ።

¹⁶ጋዓንቴ ጳውሎሴኮ ዔኤዚማቲ ማዓ፥ ናይስኬያ ዬኖ ፑርቶ ዞርቶና ማሊፄሎ ዋይዜሢሮ ፖኦሊሳ ዓኣ ቤዞ ዴንዲ ጌላዖ ሓይሶ ጳውሎሴም ኬኤዜኔ።

¹⁷ጳውሎሴያ ፄኤቶ ፄኤቶ ፖኦሊሶ ዓይሣዞንሢዳፓ ፔቴ''ሢ ዔኤላ''ዖ፦ «ሓይ ናዓሢ ሮሜ ዓጮ'' ፖኦሊሶ ዓይሣሢም ኬኤዛ ባኣዚ'' ዓኣያታሢሮ ዒዛ ቤርቶ ሺኢሼ» ጌዔኔ።

¹⁸ፄኤቶ ፖኦሊሶ ዓይሣሢ ናዓሢ ዔኪ ሮሜ ዓጮ'' ፖኦሊሶ ዓይሣሢ ኮራ ጌላዖ፦ «ቱኡዞ ዓሢ፥ ጳውሎሴ፡ ሓይ ናዓሢ ኔኤም ኬኤዛ ባኣዚ'' ዓኣሢሮ ኔ ቤርቶ ዒዛ ሺኢሻንዳጉዲ ታና ሺኢቄኔ» ጌዔኔ።

¹⁹ሮሜ ዓጮ'' ፖኦሊሶ ዓይሣሢ ናዓሢኮ ኩጮ ዓርቂ ዶጪሳዖ፦ «ኔ ታኣም ኬኤዛ ባካ ዓይጎዳይ?» ጌዒ ዒዛ ዱማሲ ዖኦጬኔ።

²⁰ናዓሢያ ዒዛም ኬኤዛዖ፦ «ዓይሁዶ ዓሳ ጳውሎሴ ዛሎ'' ባኮ ዶዲሺ ዖኦጫያ ማሊ ዚሮ ዎጎ ዎጋ ዓሶ ቤርቶ ኔ ዔያቶም ሺኢሻንዳጉዲ ኔና ዖኦጫኒ ዎላ'' ዞርቴኔ፤

²¹ጋዓንቴ ኔ ዔያቶም ዔኤዒፖ፤ ዓይጎሮ ጌዔቶ ዔያታ ‹ዒዛ ኑ ዎዹዋዖ ሙኡዚ''ያ ሙዓዓ፥ ዑሽኮ ባኣዚ''ያ ዑሽካዓ› ጌዒ ዎላ'' ዞርቲ ጫኣቄ ዖይዲታሚ''ፓ ባሼ ዓሲ ዒዛ ዎዻኒ ካቲ'' ዓኣኔ፤ ሓሢ ዔያታ ካፓሢ ኔ ዑኡዞ ሌሊኬ» ጌዔኔ።

²²ሮሜ ዓጮ'' ፖኦሊሶ ዓይሣሢያ፦ «ሓያ ኔ ታኣም ኬኤዜ ባኮ ሜሌ'' ዖኦማኣ ኬኤዚፖ» ጋዓዖ ናማሢ ዳኬኔ።

²³ዬካፓ ሮሜ ዓጮ'' ፖኦሊሶ ዓይሣሢ ፄኤቶ ፄኤቶ ፖኦሊሶ ዓይሣዞንሢዳፓ ላምዖንሢ ዔኤላ''ዖ፦ «ዹሞኮ ዖኦሻ ዎዴ ማዓዛ ቂሳሪያ ዓጮ'' ዴንዳንዳ ላምዖ ፄኤታ ዱማ ዱማ ዖልዚ ዓሲ፥ ላንካይታሚ'' ፓሮና ዖላ ዓሲ ሃሣ ላምዖ ፄኤታ ዎርሢና ዖላ ዓሲ ጊኢጊሺ፥

²⁴ጊንሣ ጳውሎሴማኣ ፓሮ ጊኢጊሻዖ ዓጮ'' ዎይሣ ፒልኪሴ ባንሢ ኮሺና ሄሊ''ሱዋቴ» ጌዔኔ፤