ፆኦሲ ማዾ''ም ዳኪንቴዞንሢኮ ማዾ'' 19:3-34

³ጳውሎሴ፦ «ሂዳዖ ዎዚጉዴ ዋኣሢ ማስቲሢዳይ ዒንሢ ማስቴሢ?» ዔያቶ ኮራ ጋዓዛ፥ ዔያታ፦ «ዮሓኒሴ ኬኤዜ ዋኣፆ ማስቲፆናኬ» ጌዔኔ።

⁴ጳውሎሴ ጊንሣ፦ «ዮሓኒሴኮ ማስኪፃ ጎሞ ቡኡፂፆ ዔርዛያ ማዔኔ፤ ዬማና ዴሮ''ም ዒዚ ኬኤዛዖ ‹ታኣኮ ጊንፃፓ ሙካሢ ጉሙርቁዋቴ› ጌዒ ጌዒኬ፤ ያዺ ጌይንቴሢያ ዬሱሴኬ» ጌዔኔ።

⁵ዬያ ዔያታ ዋይዛዖ ጎዳ ዬሱሴ ሱ'ንፆና ዋኣፆ ማስቴኔ።

⁶ጳውሎሴያ ዔያቶ ዑፃ ኩጮ ጌሣዛ ዓያና ጌኤሺ ዔያቶ ዑፃ ኬዴ''ም፥ ዱማ ዱማ ዻንጋና ዔያታ ጌስቴኔ፤ ፆኦሲ ማሊሢያ ዔያታ ኬኤዚሢ ዓርቄኔ።

⁷ዬንሢ ዓሶንሢኮ ፓይዳ'' ታጶ ላምዖ ማዓያኬ።

⁸ዒማ''ና ጳውሎሴ ዓይሁዶ ዓሶኮ ቡኪንቶ ቤዞ ዓኣዺ ሓይሦ ዓጊኒጉዴያ ፆኦሲ ካኣቱሞ ዛሎ'' ማርሚሢና ሓሣ ዴሮ''ም ቡሊ'' ኬኤዚ ኬኤዚ ጫርቂ ዔርዜኔ።

⁹ፔቴ'' ፔቴ'' ዓሳ ጋዓንቴ ዒናፓ ዒፂሢና ጎዳሢኮ ጎይፆ ዴሮ'' ቤርታ ጫሽኪ ጫሽኪ «ኑ ዒዛ ጉሙርቃዓ» ጋዓዛ ዔያቶ ዒ ሓሺ'' ዴንዳዖ፥ ኪሪስቶሴ ጉሙርቃዞንሢ ሌሊ ዔኪ ዓኣዺ ፂራኖሴ ጌይንታ፥ ዓሶ ዔርዞ ዳልጎ ማኣሮይዳ ቢያ ኬሊ'' ዔርዛኔ።

¹⁰ጳውሎሴ ላምዖ ሌዔ ጉዴያ ዒዞ ጎይፆ ዒኢካ ማዼኔ፤ ዒማ''ና ዒሲያ ዓጮ''ይዳ ናንጋ ዓይሁዶ ዓሶንታ ዓይሁዴ ማዒባኣ ዓሶንታ ቢያ ጎዳኮ ቃኣሎ'' ዋይዛኒ ዳንዳዔኔ።

¹¹ኮሺ'' ዲቃሣ፥ ፔ ዎልቄና ማዺንታ ዓኪ ባኣዚ'' ጳውሎሴ ዛሎ''ና ፆኦሲ ማዼኔ።

¹²ዬያይዳፓ ዔቄያና ጳውሎሴኮ ዑፆ ሄሌ'' ዓፒሎንታ ማኣዓሢንታ ዓሳ ዔኪ ዔኪ ሓርጊንቴ ዓሶ ዑፆ ካንሣዛ ዶርዓሢዳፓ ዓሳ ዻቃኔ፤ ሓሣ ፑርቶ ዓያናኣ ዓሶይዳፓ ኬስካኔ።

¹³ፑርቶ ዓያኖ ዓሶይዳፓ ኬሲ'' ኬሲ'' ሃንታ ፔቴ'' ፔቴ'' ዓይሁዶ ዓሳ፦ «ጳውሎሴ ኬኤዛ፥ ዬሱሴ ሱ'ንፆና ዒንሢ ኬስካንዳጉዲ ኑ ዒንሢ ዓይሣኔ» ጌዒ ጌዒ ፑርቶ ዓያኖ ዓሶፓ ኬሳ''ኒ ማሌኔ።

¹⁴ዬኖ ማዻሢ' ዓይሁዶ ቄኤሶኮ ሱኡጋሢ፥ ዓስቄዋ ጎዖሢኮ ላንካይ ናይስኬንሢኬ።

¹⁵ጋዓንቴ ፑርቶ ዓያናሢ፦ «ዬሱሴ ታ ዔራኔ! ጳውሎሴ ዛሎ''ዋ ታ ዔራኔ! ሓይ ዒንሢ ዖናንሢዳዖ?» ዔያቶ ኮራ ጌዔኔ።

¹⁶ዒማ''ና ፑርቶ ዓያና'' ዓርቄ ዓሢ ኮኦሚ ጩኡሊ'' ዓርቂ ዓርቂ ዔያቶ ባሼኔ፤ ዬካፓ ዔያታ ሱጉቲ፥ ኪፃዺ ሓሣ ዓፒላ''ኣ ዔያቶኮ ዳርዔም ጋራፓ ጳሽኪ ኬስኪ ዴንዴኔ።

¹⁷ዬይ ባካ ዔፕሶኔይዳ ናንጋ፥ ዓይሁዴ ማዒባኣ ዓሶና ዓይሁዶ ዓሶናም ዋይዚንቴሢሮ ቢያሢ ዒጊጬኔ፤ ጎዳ ዬሱሴኮዋ ሱ'ንፃ ሚርጌና ቦንቺንቴያ ማዔኔ።

¹⁸ኪሪስቶሴ ጉሙርቃ ዓሶይዳፓ ሚርጌሢ ፑርቶ ማዾ'' ፔኤኮ ፔጌና ቡኡፂ ቡኡፂ ሙካኔ።

¹⁹ሚርጌ ማርሾ ማርሻ ዓሳ ፔኤኮ ማርሻሢ ማፃኣፖ ቡኩሲ ዴሮ'' ቤርታ ታሚና ሚቼኔ፤ ዬያ ማፃኣፖኮ ሚኢሻ ዶንጊታሚ'' ሺያ ሹቺ ቢራ ማዓያኬ።

²⁰ዬያይዲ ጎዳሢኮ ቃኣላ'' ሚርጌና ዳልጊ ዳልጊ ሓሣ ባሺ ባሺ ዴንዴኔ።

²¹ዬይ ቢያ ማዔሢኮ ጊንፃ ጳውሎሴ ሜቄዶኒያና ዓካይያ ዓጮ'' ጊዴና ጌዒ ዬሩሳላሜ ዓኣዻኒ ፔ ማሊሢና ማላዖ፦ «ዒኢካ ታ ሄሌ''ስካፓ ሮሜ ዓጮ'' ዓኣዻንዳያ ኮይሳኔ» ጌዔኔ።

²²ዬያሮ ዒዛና ዎላ'' ማዻ ዓሶይዳፓ ላምዖንሢ፥ ፂሞቴዎሴና ዔራስፆሴና ሜቄዶኒያ ዓጮ'' ዳኪ ዒዚ ፔኤሮ ዒሲያይዳ ዻካ'' ኬሊ'' ዴዔኔ።

²³ዬማና ጎዳሢ ጎይፆ ዛሎ''ና ዔፕሶኔይዳ ዼኤፒ ዣላ ዔቄኔ።

²⁴ፔቴ'' ዴሜፂሮሴ ጌይንታ ሚኢሼ ዹዓስኬይ ዓርፄሚሴ ጌይንታ ሺኢጲፆ ማኣሮ ማላ ባኣዚ'' ቢራ ዓንጊና ዹይ ማዢ ማዢ ቢሮ'' ዹዓ ዓሶም ሚርጌ ባኣዚ'' ዴንቂሳኔ።

²⁵ዬይ ዓሢ ዬያቶ፥ ቢሮ'' ዹዓ ዓሶና ዔያቶጉዴያ ማዾ'' ማዻ ሜሌ'' ዓሶ ቡኩሳዖ፦ «ዓሲዮቴ! ኑኡኒ ቆሎ ዴንቃሢ ሓኖ' ማዾ''ና ማዔሢ ዒንሢ ዔራኔ፤

²⁶ሓይ ጳውሎሴ ጎዖሢ ‹ዓሲ ኩቺና ማዢንቴ ማላሢ ካኣሽኮ ባኣዚ''ቱዋሴ› ጌዒ ጌዒ ዔፕሶኔ ዓጮ''ይዳ ሌሊቱዋንቴ ዻካ'' ዓጪ ሌሊ ዓታዛ ዒሲያ ዓጮ'' ቢያይዳ ዋኣዼ ዓሲ ዒዚ ጎኔኬ ጌይሲ፤ ሓሣ ኪሪስቶሴ ጉሙርቃንዳጉዲ ማሄቶዋ ዒንሢ ዒንሢ ቶኦኪና ዛጌሢና ዋይዜሢና ጉዲኬ።

²⁷ዬያ ዛሎ''ና ሓይ ኑኡኮ ማዻ'' ቦሂንታንዳኔ ጌይሢኬ፤ ሓሣ ዬያ ሌሊቱዋንቴ ዒሲያና ዓጮ'' ቢያሢናይዳ ዓኣ ዓሳ ቢያ ካኣሽካ፥ ዼኤፖ ዓርፄሚሴ ሺኢጲፆ ማኣሬላ ጉሪ ማዒ ዓታኒኬ፤ ዒዞኮ ዼኤፑማኣ ማይ ጋፓኒኬ» ጌዔኔ።

²⁸ዓሳ ዬያ ዋይዛዖ ዻጋዺ፦ «ዔፕሶኔይዳ ዓኣ ዓርፄሚሴ ሺኢጲፆ ማኣራ ዼኤፒኬ!» ጌዒ ጌዒ ዒላቴኔ።

²⁹ካታሜላ ዬያ ዣላሢዳፓ ዔቄያና ካራ ባይዜኔ፤ ዴራ'' ሜቄዶኒያ ዓጮ'' ሾይንቲ ማዔ ላምዖ ጳውሎሴኮ ላጎንሢ፥ ጋይዮሴና ዓሪስፂሮኮሴና ዓርቂ ጎቺ ጎቺ ዴራ'' ቡኪንታ ቤዞ ዔኪ ጳሽኬኔ።

³⁰ጳውሎሴ ዬማና ዴሮ'' ባንሢ ዓኣዻኒ ኮዔንቴ ኪሪስቶሴ ጉሙርቃ ዓሳ ዒዛ ላኣጌኔ።

³¹ዒሲያ ዓጮ''ይዳ ዓኣ ዎይሣ ዓሶይዳፓ ፔቴ'' ፔቴ'' ዒዛ ናሽካዞንሢ ጳውሎሴ ኮራ ዓሲ ዳኪ፦ «ኔኤኒ ዓሳ ቡኪንታ ቤዞ ዓኣዺ፥ ዒኢካ ኔ ጴዹዋጉዲ» ጌዒ ዒዛ ሺኢቄኔ።

³²ዒማ''ና ዴሮ'' ባኣኮ''ይዳ ዼኤፒ ዣላ ዓኣሢሮ ባሼሢ ዓይጎሮ ቡኪንቶቴያ ፔቴ''ታዖ ዔሩዋሴ፤ ዬያይዳፓ ዔቄያና ፔቴ'' ዓሲ ፔቴ'' ባኣዚ'' ጌዒ ዒላታዛ፥ ሜሌ''ሢ ሜሌ ባኣዚ'' ጌዒ ጌዒ ዒላታኔ።

³³ፔቴ'' ፔቴ'' ዓይሁዶ ዓሳ ዒስኪንዲሬ ጌይንታ ዓሢ ዔቂ ጌስታንዳጉዲ ሂዖሢጉዲ ዎኦቲ ዴሮ'' ቤርቶ ሺኢሼኔ፤ ዛሎ'' ዓሳ ሓሣ ዒዚ ኮሺ'' ማርማንዳጉዲ ዒዛ ዞሬኔ፤ ዬያሮ ዒስኪንዲሬ ዴራ'' ዚቲ ጋዓንዳጉዲ ኩቺና ቤኤዛዖ ጌኤዞ ማሃንዳ ጌኤሲ ጌስታኒ ጊኢጊንቴኔ።

³⁴ጋዓንቴ ዒስኪንዲሬ ዓይሁዴ ዓሲ ማዔሢ ዴራ'' ዔራዖ፦ «ዔፕሶኔይዳ ዓኣ ዓርፄሚሴ ዼኤፒኬ!» ጌዒ ቢያሢ ፔቴ'' ዑኡሲና ሚርጌ ኔጊ ዒላቴኔ።