ዮሓኒሴ 7:1-43

¹ዬካፓ ዬሱሴ ጌሊላ ዓጮ''ይዳ ሴካ ሃንጋ ሃንታኔ፤ ዪሁዳ ዓጮ''ይዳ ጋዓንቴ ሃንታኒ ኮይባኣሴ፤ ዓይጎሮ ጌዔቴ ዓይሁዶ ዓሶ ዎይሣ ዓሳ ዒዛ ዎዻኒ ኮዓሢሮኬ።

²ዬኖ ዎዶ''ና ዓይሁዶ ዓሶኮ ዉልሾ ዴማ'' ዴዒ ቦንቾ ኬላ'' ዑኬኔ።

³ዬያሮ ዬሱሴኮ ጌርሲንሢ ዒዛ ኮራ ሙካዖ፦ «ኔኤኮ ጊንፆ ሃንታዞንሢ ኔኤኒ ፆኦሲ ዎልቄና ማዻ ዓኮ ባኮ ዛጋንዳጉዲ ሃካፓ ኬስኪ ዪሁዳ ዓጮ'' ዓኣዼ፤

⁴ዓይጎሮ ጌዔቴ ፔጌና ዔርታኒ ኮዓ ዓሲ ማዾ'' ፔኤሲ'' ዓኣቺ ማዹዋሴ፤ ኔኤኒያ ሓያ ባኮ ቢያ ማዻ ዎዶ''ና ኔና ኔ ዓጮ''ም ፔጋሲ ዔርዛንዳያ ኮይሳኔ» ጌዔኔ።

⁵ዬያ ዔያታ ጌዔሢ ዒዛኮ ጌርሲንሢታዖ ዒዛ ጉሙርቂ ዔኪባኣሢሮኬ።

⁶ዬሱሴ ዔያቶም፦ «ታ ዎዳ'' ሃጊ ሄሊ''ባኣሴ፤ ዒንሢ ዎዳ'' ጋዓንቴ ቢያ ዎዴ ጊኢጌያኬ።

⁷ዓጫ'' ዒንሢ ዒፃኒ ዳንዳዑዋሴ፤ ታና ጋዓንቴ ዒፃኔ፤ ዓይጎሮ ጌዔቴ ታኣኒ ዓጮ''ኮ ማዻ'' ፑርታ ማዔሢ ማርካዻሢሮኬ።

⁸ዒንሢ ጋዓንቴ ቦንቾ ኬሎ''ሮ ዓኣዹዋቴ፤ ታኣኮ ዎዳ'' ሃጊ ሄሊ''ባኣሢሮ ዬኖ ቦንቾ ኬሎ'' ቤዞ ታ ዓኣዻዓኬ» ጌዔኔ።

⁹ዬያ ጌዒጋፓ ዒዚ ጌሊላይዳ ዓቴ''ኔ።

¹⁰ጋዓንቴ ዒዛኮ ጌርሲንሢ ቦንቾ ኬሎ'' ቤዞ ዓኣዼሢኮ ጊንፃ ዒዚ ዓኣሺንቲ ዬኖ ቤዞ ዴንዴኔ።

¹¹ዬኖ ቤዞይዳ ዓይሁዶ ዓሶ ዎይሣ ዓሳ፦ «ዬይ ዓሢ ዎካዳይ?» ጌዒ ጌዒ ዒዛ ኮዓኔ።

¹²ዴራ'' ዒዛ ሚርጌና ዾንካኔ፤ ዒማ''ና ፔቴ'' ፔቴ''ዞንሢ፦ «ዒዚ ኮሺ ዓሲኬ» ጋዓዛ፥ ዛላ''፦ «ያዺቱዋሴ፤ ዒዚ ዴሮ'' ዻዻቢሻኔ» ጋዓኔ።

¹³ያዺ ማዔቶዋ ዓይሁዶ ዓሶኮ ዎይሣ ዓሶ ዒጊጪሢና ዖኦኒያ ዒዛ ዛሎ'' ፔጌና ጌስቲባኣሴ።

¹⁴ዬኖ ቦንቾ ኬሎ''ኮ ሄካስካ ዬሱሴ ጌኤዦ ማኣሪ ዓኣዺ ዔርዚሢ ዓርቄኔ።

¹⁵ዓይሁዶ ዓሶ ዎይሣ ዓሳ፦ «ሓይ ዓሢ ዓሲዳፓ ዔሪባኣያታዖ ሃያ ቢያ ዎዲ'' ዔራኒ ዳንዳዔይ?» ጌዒ ጌዒ ዲቃቲ ሄርሼኔ።

¹⁶ዬያሮ ዬሱሴ፦ «ታ ዔርዛ ባካ ታና ዳኬ፥ ታ ዓዶይዳፓ ዒንጊንቴያ ማዓንዳኣፓዓቴም ታጊዳፓቱዋሴ።

¹⁷ታና ዳኬሢኮ ዓይሢፆ ኩንሣኒ ኮዓያ ዓኣቶ ሃይ ታኣኮ ዔርዚፃ ፆኦሲዳፓ ዒንጊንቴቴያ ሃሣ ታኣኒ ታ ቶኦካ''ፓ ዔኪ ኬኤዛያ ማዔቴያ ዱማሲ ዔራንዳኔ።

¹⁸ፔ ቶኦካ''ፓ ኬኤዛሢ ፔ ቦንቾ ኮዓኔ፤ ዳኬሢ ቦንቾም ማዻሢ ጋዓንቴ ጎኑሞ ዓኣያኬ፥ ሉኡዙሞዋ ዒዛይዳ ባኣሴ።

¹⁹ሙሴ ዒንሢም ዎጌ ዒንጊባይ? ጋዓንቴ ዒንሢዳፓ ዎጎ ኩንሣይ ዖኦኒያ ባኣሴ። ዒንሢ ዓይጎሮ ታና ዎዻኒ ኮዓይ?» ጌዔኔ።

²⁰ዴራ''ኣ፦ «ሓይ ኔ፥ ፑርቶ ዓያና'' ዓርቄሢ ሃይ! ዖ ኔና ዎዻኒ ኮዔይ?» ጌዔኔ።

²¹ዬሱሴ ዔያቶም፦ «ታኣኒ ፔቴ'' ማዾ ማዼኔ፤ ዒንሢ ቢያሢ ዬኖ ማዼ''ሎ ዲቃቲ ሄርሼኔ።

²²ሙሴ ዓቲንቴ ቤርቲ ቲቂሢ ዎጌ ዒንሢም ዒንጌኔ፤ ዬይ ዎጋ'' ዒንጊንቴሢ ዒንሢኮ ዓዶንሢዳፓ ማዓንዳኣፓዓቴም ሙሴይዳፓቱዋሴ፤ ዓካሪ ዒንሢ ሃውሾ ኬሎ''ናታዖ ዓሲኮ ዓቲንቴ ቤርቲ ቲቲቃኔ።

²³ዓካሪ፥ ሙሴ ዎጋ'' ዓቱዋጉዲ ዓሲ ሃውሾ ኬሎ''ና ዓቲንቴ ቤርቲ ቲቂንታያ ማዔቴ ታኣኒ ሃውሾ ኬሎ''ና ዓሲ ሼምፖ ዻቂሼሢሮ ዓይጎሮ ታ ዑፃ ዒንሢ ጎሪ''ንታይ?

²⁴ዓሲ ዛጊ፥ ዱማሲ ዎጊፆይዳፓ ፒዜ ዎጌ ዎጉዋቴ» ጌዔኔ።

²⁵ዬሩሳላሜ ዓሶይዳፓ ፔቴ'' ፔቴ''ዞንሢ፦ «ዓይሁዶ ዓሶኮ ሱኡጋ ዎዻኒ ኮዓ ዓሢ ሃያቱዋዓዳ?

²⁶ሓይሾ ዒዚ ሃሢ ፔጌና ኬኤዛኔ፤ ዔያታ ዒዛ ኮይላ'' ፔቴ''ታዖ ዔኤቢ ጌይባሴ፤ ሓይ ዓሢ ሜሲሔ ማዔሢ ዎይሣ ዓሳ ጎናሲ ዔዔሬሞ?

²⁷ጋዓንቴ ኑኡኒ ሃይ ዓሢ ዓንካፓታቴ ዔራኔ፤ ሜሲሔ ሙካኣና ዓንካፓታቴያ ዔራንዳያ ዖኦኒያ ባኣሴ» ጌዔኔ።

²⁸ዬያሮ ዬሱሴ ጌኤዦ ማኣሮይዳ ዔርዛዖ ዑኡዞ ፔኤሲ'' ዼ'ግዲ፦ «ታና ዒንሢ ዔራኔ፤ ታኣኒ ዓንካፓ ሙኬቴያ ታና ዒንሢ ዔራኔ፤ ጋዓንቴ ታኣኒ ታ ቢታንቶና ሙኪባኣሴ፤ ታና ዳኬሢ ጎኑሞ ዓኣያኬ፤ ዒንሢ ዒዛ ዔሩዋሴ።

²⁹ታኣኒ ጋዓንቴ ዒዛ ኮራፓ ሙኬሢሮ ሃሣ ዒዚ ታና ዳኬሢሮ ታ ዒዛ ዔራኔ» ጌዔኔ።

³⁰ዒማ''ና ዔያታ ዒዛ ዓርቃኒ ኮዔያታንቴ ዎዳ'' ዒዛኮ ሃጊ ሄሊ''ባኣሢሮ ዖኦኒያ ዒዛ ዓርቂባኣሴ።

³¹ጋዓንቴ ዴሮ''ይዳፓ ሚርጌ ዓሲ ዒዛ ጉሙርቂ ዔካዖ፦ «ሜሲሔ ሙካ ዎዶ''ና ሓይ ዓሢ ማዼ ፆኦሲ ዎልቆና ማዺንቴ ዓኮ ባኮይዳፓ ባሼ ማዻንዳ?» ጌዔኔ።

³²ዴራ'' ዬሱሴ ዾንካሢ ፔርሴ ዓሳ ዋይዜኔ፤ ዬያሮ ቄኤሶኮ ሱኡጎና ፔርሴ ዓሶና ዬሱሴ ዓርቃኒ ጌኤዦ ማኣሮ ካፓ ዓሶ ዳኬኔ።

³³ዬማና ዬሱሴ፦ «ዒንሢና ዎላ'' ዻካ'' ዎዴ ታ ዴዓንዳኔ፤ ዬካፓ ታና ዳኬሢ ባንሢ ታ ዓኣዻንዳኔ፤

³⁴ዒንሢ ታና ኮዓንዳኔ፤ ጋዓንቴ ዒንሢ ታና ዴንቃዓኬ፤ ታኣኒ ዓኣ ቤዞ ዒንሢ ሙካኒ ዳንዳዒንዱዋሴ» ጌዔኔ።

³⁵ዬያሮ ዓይሁዶ ዓሶ ዎይሣ ዓሳ ዎሊ ኮይላ''፦ «ኑኡኒ ዒዛ ዴንቁዋጉዲ ሃይ ዓሢ ዓንኮ ዓኣዻኒዳይ? ጎዖንቴ ጊሪኬ ዓጮ'' ዓሶ ባኣካ'' ላኣሊንቲ ዓኣ፥ ዓይሁዶ ዓሶ ባኣኮ'' ዓኣዺ ጊሪኮ ዓሶ ዔርዛኒሞ?

³⁶‹ዒንሢ ታና ኮዓንዳኔ፤ ጋዓንቴ ዒንሢ ታና ዴንቃዓኬ፤ ታኣኒ ዓኣ ቤዞዋ ዒንሢ ሙካኒ ዳንዳዒንዱዋሴ› ጌይፃ ዒዛኮ ዎዚ ጌይሢዳይ?» ጌዔኔ።

³⁷ቦንቾ ኬሎ''ኮ ጋፒንፆ ማዔ፥ ዼኤፖ ኬሎ''ና ዬሱሴ ዔቂጋፓ ዑኡዞ ዼ'ግዲ፦ «ዋኣሢ ዼኤቤይ ዓኣቶ ሃኒ ታ ኮራ ሙኪ ዑሽኮንጎ፤

³⁸ታና ጉሙርቂ ዔካሢኮ ጌኤዦ ማፃኣፓ ጋዓሢጉዲ ናንጊና ናንጊ ዋኣሢ ጋራፓ ዓልቃንዳኔ» ጌዔኔ።

³⁹ዬያ ዒ ጌዔሢ ዒዛ ጉሙርቃዞንሢ ዔካንዳ ዓያኖ ዛሎ''ኬ። ዓይጎሮ ጌዔቴ ዬሱሴ ሃይቂ ሌካ ዔውታ ዎዳ'' ሄሊ''ባኣሢሮ ዓያኖ ጌኤዣ ሃጊ ዒንጊንቲባኣያኬ።

⁴⁰ዴሮ''ኮ ባኣኮ''ይዳፓ ፔቴ'' ፔቴ''ዞንሢ ዬያ ቃኣሎ'' ዋይዛዖ፦ «ሙካንዳኔ ጌይንቴ ፆኦሲ ማሊፆ ኬኤዛሢ ጎኔና ሃያኬ» ጌዔኔ።

⁴¹ዛላ'' ሃሣ፦ «ሓይ ሜሲሔኬ» ጌዔኔ። ዓቴ'' ዓሳ ጋዓንቴ፦ «ሜሲሔ ሙካሢ ጌሊላ ዓጮ''ይዳፓዳ?

⁴²ሜሲሔ ዳውቴ ዜርፃፓ ሾይንታንዳሢና ዳውቴ ካታሞ ቤኤቴሌሄሜይዳፓ ሙካንዳሢ ጌኤዦ ማፃኣፖይዳ ፃኣፒንቲባኣዓዳ?» ጌዔኔ።

⁴³ዬያሮ ዒዛ ዛሎ''ና ዴሮ'' ባኣካ'' ፓቂንቲሢ ማዢንቴኔ።