ዮሓኒሴ 19:21-39

²¹ዓይሁዶ ዓሶኮ ቄኤሶ ሱኡጋ ጲላፆሴ ኮራ፦ «ኔኤኒ ‹ዓይሁዴ ካኣቲኬ› ጌይ ፃኣፒፖ፤ ‹ሓይ ዓሢ ታኣኒ ዓይሁዴ ካኣቲኬ ጋዓኔ› ጌይ ፃኣፔ» ጌዔኔ።

²²ጲላፆሴ ጋዓንቴ፦ «ታኣኒ ፃኣፔሢ ማይ ፃኣፒ ሃሼ''ኔ» ጌይ ማሄኔ።

²³ፖኦሊሶንሢ ዬሱሴ ሱፄስካፓ ዖዶዞ ቦንቾ ማኣዓሢ ሌሊ ዓታዛ ዒዛኮ ሃንጎ ዓፒሎ ዔኪ ፔቴ'' ፔቴ'' ፖኦሊሶም ሄላ''ንዳጉዲ ዖይዶ ቤሲ ፓቄኔ፤ ጋዓንቴ ዬና ቦንቾ ዓፒሌላ ጊኢጊሺ ሲኪንቲባኣያ ሎፓ ሉ ሄላ''ንዳኣና ፔቴ'' ማዒ ኮሺ''ንቴ ዓፒላኬ፤

²⁴ዬያሮ ፖኦሊሶንሢ፦ «ዬና ዓፒሌላ ዖኦም ሄላ''ንዳቴያ ዒፃ ኑ ዓጋንዳኔ፤ ኑ ዳዳርዚንዱዋሴ» ዎሊ ኮይላ'' ጌዔኔ። ዬይ ያዺ ማዔሢ፦ «ታኣኮ ዓፒሎ ዔያታ ጊሽቴኔ፤ ታኣኮ ፔቴ'' ማሂ ሲኮና ዓፒሎይዳ ዱማሲ ዔሮ ባኮ ዔያታ ዓጌኔ» ጌይንቴ ማፃኣፖ ቃኣላ'' ኩማንዳጉዲ ፖኦሊሳ ዬኖ ዓጎ ባኮ ዓጌኔ።

²⁵ዬሱሴ ሱፂንቴ፥ ፑርቲሴ ዓሶ ሱፆ ሚፆ ኮይሎ''ይዳ ዒዛኮ ዒንዶና ዒንዶ ጌሮና ቄሌዮጳ ጎዖሢ ማቾ ማይራሞና ሜግዴላ ዓጮ'' ማይራማኣ ዔቂ ዓኣኔ፤

²⁶ዬሱሴ ዒዛኮ ዒንዶና ዒ ናሽካ ዒዛኮ ጊንፆ ሃንታዞንሢ ዒዛ ኮይሎ''ይዳ ዔቂ ዓኣሢ ዛጋዖ ዒንዶ ኮራ፦ «ዒንዴ! ሃይሾ፥ ኔኤኮ ናዓሢ!» ጌዔኔ።

²⁷ዬካፓ ዒዛኮ ጊንፆ ሃንታዞንሢ፦ «ኔኤኮ ዒንዳ ሃናሾ!» ዒዛም ጌዔኔ፤ ዬማፓ ዒዛኮ ጊንፆ ሃንታዞንሢ ማኣሪ ዒዞ ዔኪ ዓኣዼኔ።

²⁸ዬካፓ ዬሱሴ ቢያ ባካ ኩሜሢ ዔራዖ ማፃኣፖይዳ ፃኣፒንቴ ቃኣላ'' ኩማንዳጉዲ «ታና ዼኤቤኔ» ጌዔኔ።

²⁹ዬኖ ቤዞይዳ ፔቴ'' ሶልኪ፥ ጊኢጉዋ ዑሺ ኩንሢ ጌሦና ሜሄ ዓኣኔ፤ ዬያሮ ዒኢካ ዓኣ ዓሳ ዬያ ዑዦይዳ ዓፒላ ቱርጫ ማላ ባኣዚ'' ዓጊ ዎኦሺ ማላ ሚሢና ዔኪ ዻንጎ ባንሢ ዑኪሳዛ፥

³⁰ዬሱሴ ዬኖ ዑዤሎ ፁንፄስካፓ፦ «ዓካሪ ኩሜኔ» ጋዓዖ፥ ቶኦኮ'' ዛላሲ ፔ ሼምፓሢ ዓኣሢ ዒንጌኔ።

³¹ዬያ ባኮኮ ጊንፃፓ ዓይሁዶኮ ዎይሣ ዓሳ ሱፂንቴ ዓሶኮ ዞኦሎ'' ሜንሢ፥ ሱፆና ሚፆይዳፓኣ ዔያቶ ኬይሳንዳጉዲ ጲላፆሴ ኮራ ሺኢቄኔ፤ ዬያ ዔያታ ሂዴሢ ዓይሁዶ ዓሶኮ ሓውሾ ኬሎ''ም ጊኢጊንቲ ኬሊ'' ማዔሢሮ ሃሣ ዬና ኬሌ''ላ ዼኤፒ ቦንቾ ኬሊ'' ማዔሢሮ ዔያቶኮ ሓውሾ ኬሎ''ና ሌዛ ሱፆና ሚፆይዳ ዴዑዋጉዲኬ።

³²ዬያሮ ፖኦሊሶንሢ ዴንዲ ዬሱሴና ዎላ'' ሱፂንቴ ዓሶንሢኮ ዞኦሎ'' ሜንሤኔ፤

³³ዬካፓ ዬሱሴ ባንሢ ዔያታ ሙካዖ ዒዚ ቤርታዺ ሓይቄያ ማዔሢ ዛጊ ዞኦሎ'' ዒዛኮ ዔያታ ሜንሢባኣሴ።

³⁴ጋዓንቴ ፖኦሊሶንሢዳፓ ፔቴ''ስኬይ ዒዛኮ ጎኦቦ'' ዎርሢና ጫርጋዛ ቤዞማና ጎኦባ''ፓ ሱጉሢና ዋኣሢና ኬስኬኔ።

³⁵ዬያ ዛጌሢ ዒንሢ ጉሙርቃንዳጉዲ ማርካዼኔ፤ ማርካታኣ ዬይ ጎኔኬ፤ ዒ ኬኤዜ ባካ ጎኔ ማዔሢ ዒዚ ዔራኔ።

³⁶ዬይ ያዺ ማዔሢ ማፃኣፖይዳ፦ «ዒዛኮ ሜጌፃፓ ፔቴ''ታዖ ሜቃዓኬ» ጌይንቴሢ ኩማንዳጉዲኬ።

³⁷ሃሣ ሜሌ'' ማፃኣፔይዳ፦ «ዒዛ ጫርጌዞንሢ ሃጊ ዒዛ ዛጋንዳኔ» ጋዓኔ።

³⁸ዓይሁዶ ዓሶኮ ዎይሣ ዓሶ ዒጊጪሢና ዬሱሴ ዓሲ ዒ ማዔሢ ዔርዙዋዖ ናንጋ፥ ዓርማቲያሴ ዓጮ'' ዓሢ፥ ዮሴፔ ዬሱሴኮ ሌዞ ዔካኒ ጲላፆሴ ኮራ ሺኢቃዛ፥ ጲላፆሴ ዒዛ ዔኮንጎ ጌዔኔ፤ ዬያሮ ዮሴፔ ዴንዲ ሌዞ ዔኬኔ።

³⁹ሓያኮ ቤርታ ዹሞና ዬሱሴ ኮራ ሙኬ፥ ኒቆዲሞሴ ጎዖሢ ዶንጊታሚ'' ዶሎዜ ማዓንዳ ካርቤ ዋላንጎና ዎላ'' ሲኢሪ ዔኪ ሙኬኔ።