ዮሃኒሳ 2:6-19

⁶ኣይሁዴቲ ባንታ ጌሾ ዎጋስ ጎዔቲያ ኡሱፑን ሹቻ ባꬃቲ ሄ ቤሳን ዴዖሶና። ኢሲ ኢሲ ባꬃይ ናምዑ ዎይኮ ሄꬑ ፁጋ ኦይኬስ።

⁷ዬሱሲ ኦሳንቾታኮ፥ «ባꬃታን ሃꬄ ኩንꬂቴ» ያጊስ። ኤንቲ ባꬃታስ ዶና ጋካናው ሃꬄ ኩንꬂዶሶና።

⁸ዬሱሲ ኤንታኮ፥ «ሃዒ ዱቂዲ ያጋኑዋ ኣዋቴꬃን ፖሊሴይሳስ ኢሚቴ» ያጊስ። ኤንቲ ኢያው ኤፊዲ ኢሚዶሶና።

⁹ያጋኑዋ ኣዋቴꬃን ፖሊሴይሲ ዎይኔ ኡሺ ላሜቲዳ ሃꬃ ጋንፂ ኤኪዲ ኣዉፔ ዪዳኮ ኤሪቤና፥ ሺን ሃꬃ ኩንꬂዳ ኦሳንቾቲ ኤሮሶና። ያጋኑዋ ኣዋቴꬃን ፖሊሴይሲ ማቺው ኤኬይሳ ፄጊዲ፥

¹⁰«ኦኒካ ሎዖ ዎይኔ ኡሻ ኣሳ ኮይሮቲዲ ኡሼስ። ያቲዲ ኣሳይ ኡዪ ካሊዳፔ ጉዬ ቂራሪያ ኢሜስ። ሺን ኔኒ ሎዖ ዎይኔ ኡሻ ሃኖ ጋካናው ዎꬃ ኣጋዳሳ» ያጊስ።

¹¹ዬሱሲ ሃ ኮይሮ ማላታ ጋሊላ ቢታን ቃና ካታማን ኦꬂስ፤ ሄሳን ባ ጊታቴꬃ ቤሲስ። ኢያ ታማሬቲ ኢያ ኣማኒዶሶና።

¹²ሄሳፌ ጉዬ፥ ዬሱሲ ባ ኣዬራ፥ ባ ኢሻታራኔ ባ ታማሬታራ ኢሲፌ ቂፊርናሆሜ ካታማ ቢዲ ጉꬃ ጋላስ ጋምዒስ።

¹³ኣይሁዴቲ ቦንቺያ ፓሲካ ባሌ ጋላሳይ ማታቲን ዬሱሲ ዬሩሳላሜ ቢስ።

¹⁴ቢዲ ፆሳ ኬꬃን ቦራታ፥ ሚዛታ፥ ዶርሳታኔ ሆሌታ ባይዜይሳታኔ ባንታ ኦይዲያን ኡቲዲ ሚሼ ላሜይሳታ ዴሚስ።

¹⁵ኢ ፁርቃፌ ዶቂዲ ኣሳ ኡባ ኤንታ ሜሄታራ ፆሳ ኬꬃፌ ጎዲዲ ካሬ ኬሲስ። ሚሼ ላሜይሳታ ፃርጴዛታካ ኣꬂ ዬጊዲ ኤንታ ሚሺያ ላሊስ።

¹⁶ሆሌ ባይዜይሳታ፥ «ሃ ሆሌታ ሃይሳፌ ኬሲቴ፤ ታ ኣዋ ኬꬃ ጊያ ኦꬆፊቴ» ያጊስ።

¹⁷ኢያ ታማሬቲ ጌሻ ማፃፋን፥ «ታኒ ኔ ኬꬃስ ሚሼቲያ ሚሻይ ታና ታማዳ ፁጌስ» ጌቴቲዲ ፃፌቲዳይሳ ኣኬኪዶሶና።

¹⁸ሄሳፌ ጉዬ፥ ኣይሁዴቲ ዛሪዲ፥ «ኔ ሃይሳ ኦꬃናው ኔው ማቲ ዴዔይሳስ ኑና ኣይ ማላታ ኦꬃዳ ቤሳኔ?» ያጊዶሶና።

¹⁹ዬሱሲ፥ «ሃ ፆሳ ኬꬃ ላሊቴ፤ ታኒ ሄꬑ ጋላሳን ዛራዳ ኬፃና» ያጊስ።