ዬሱሲ ኪቴዳዋንቱ ኦሱዋ 20:2-13

²ሄ ጋዲያና ኣꬊዴ፥ ቃላ ኦዲዴ፥ ኣሳ ሎይꬂ ሚኒሴዳዋፔ ጉዪያን፥ ጊሪኬ ጋዴ ዬዳ።

³ኢ ሄዋን ሄዙ ኣጌና ኡቲዴ፥ ማርካቢያን ሶሪያ ባናው ቆፒሺን፥ ኣዪሁዳቱ ባሬና ዎꬋናው ኮዪያዋ ቤዒዴ፥ ማቂዶኒያና ጉዬ ሲማናው ባሬ ቆፋ ቃቼዳ።

⁴ጳዉሎሳ ሞዪዜዳዋንቱ፥ ቤሪያፔ ጳሪሃሳ ናዓ ሶሲጳፂሮሳ፥ ቴሴሎንቄፔ ኣሪስፂሮኮሳኔ ሲኮንዲሳ፥ ዴርቤፔ ጋዮሳኔ ኢሲያፔ ቲኪቆሳኔ ፂሮፊሞሳ፥ ቃሲ ፂሞቶሳ።

⁵ሄዋንቱ ሲንꬃው ቢዴ፥ ኑና ፂሮዓዳን ናጊኖ።

⁶ኑኒ ኡኪꬃ ባላ ጋላሳ ቦንቾዋፔ ጉዪያን፥ ፒሊጲሲዮሳ ጊያ ጋዲያፔ ማርካቢያን ዴንዲዴ፥ ኢቼሹ ጋላሳን ፂሮዓዳን ኡንቱንታ ጋኪዴ፥ ያኒ ላፑ ጋላሳ ኡቴዶ።

⁷ኑኒ ዎጋ ጋላሲ ኡኪꬃ ሜንꬃናው ሺቂዴዒሺን፥ ጳዉሎሲ ዎንቲና ባናው ቆፔዳ ዲራው፥ ኡንቱንቶ ቃላ ኦዲዴ፥ ቃማ ቢላሂ ጋካናው ዬዉዋ ኣዱሴዳ።

⁸ኑኒ ሺቂ ኡቴዳ ፖቂያን ጮራ ፆምፒ ዴዔ።

⁹ኤዉፂኮሳ ጊያ ኢቲ ዎዳላይ ማስኮቲያ ቦላ ኡቲዴ፥ ዳሪሲ ጌሚዒሼዳ። ጳዉሎሲ ሃሳያ ኣዱሴዳ ዎዴ፥ ኤዉፂኮሲ ጌሚዒሹዋን ሃይሬዳዌ ሄዜንꬂያ ፖቂያፔ ሳዓን ኩንዲዴ ሃይቄዳዋ ኣሳይ ዴንꬄዳ።

¹⁰ሺን ጳዉሎሲ ዎꬊዴ፥ ኣ ቦላ ጉፋኔዳ። ኣ ኢዲሚዴ፥ «ኣ ሼምፑ ኬሲቤና ዲራው ሂርጎፒቴ» ያጌዳ።

¹¹ያቲዴ ፑዴ ፖቂያ ኬሲዴ፥ ኡኪꬃ ሜንꬂዴ ሜዳ፤ ሳዓይ ዎንታና ጋካናሲ፥ ዳሮ ዎዲያ ሃሳዬዳዋፔ ጉዪያን ቤዳ።

¹²ዎዳላይ ፓፂና፥ ሶይ ኣፊዴ፥ ዳሪሲ ናሼቴዲኖ።

¹³ሺን ጳዉሎሲ ባሬና ያፔ ኑኒ ሞካና ማላ፥ ኑሲ ኦዴዳ ዲራው፥ ካሴቲዴ ማርካቢያኮ ቢዴ፥ ኣሶሳ ባናው ዴንዴዶ፤ ኣዪሲ ጎፔ፥ ጌዲያን ባናው ኢ ቆፔዳ ዲራው ኑና ሄዋዳን ኣዛዜዳ።