ዬሱሲ ኪቴዳዋንቱ ኦሱዋ 17:24-33

²⁴«ኣላሚያኔ ኣላሚያን ዴዒያ ኡባባ ሜꬌዳ ፆሳይ ሳሉዋኔ ሳዓ ጎዳይ፥ ኣሳይ ኬፄዳ ጌሻ ጎሊያን ዴዔና።

²⁵ኣዬንቶ ፓጬዳ ኣሳዳን፥ ኣሳ ኩሺያ ኢ ፄሌና፤ ኣዪሲ ጎፔ፥ ኢ ባሬ ሁጴው ዴዑዋ ሼምፑዋኔ ኡባባ ኣሳ ኡባው ኢሜዳ።

²⁶ፆሳይ ኣሳ ዛሪያ ኡባ ኢቲ ኡራፔ ሜꬊዴ፥ ጋዲያ ኡባን ዎꬄዳ፤ ኢ ባሬ ሁጴው ኡንቱንቱ ዴዓና ዎዲያኔ ሳዓ ካሴ ዛዋዬዳ።

²⁷«ኢ ሄዋ ኦꬄዳዌ ኡንቱንቱ ኦይቂ ኦይቂ ፄሊዴ፥ ባሬና ኮዪዴ፥ ኦኒ ኤሪ ዴማናዋንቴሻ ጊያዋና፤ ጊዶፔኔ፥ ፆሳይ ኑፔ ኦሲኔ ሃኮ ጊዴና።

²⁸ኣዪሲ ጎፔ፥ ሂንቴንቱፔ ኢቲ ኢቲ ኤራንቻቱ፥ ‹ኑኒ ኣ ናና› ጌዳዋዳን፥ ኑኒ ኣኒ ፓፃ ዴዔቶኔ ቃፄቴቶ።

²⁹ሲሚ ኑኒ ፆሳ ናና ጊዴዳ ዲራው፥ ፆሳይ ኣሳ ጪንጫቴꬃኒኔ ቆፋን ዎርቃፔ ዎይ ቢራፔ ዎይ ሹቻፔ ኦሴቴዳዋ ማላቴ ያጊዴ፥ ቆፓናው ቤሴና።

³⁰ሄዋ ዲራው፥ ፆሳይ ኣሳይ ኤሪቤና ዎዲያ ኣꬄዳ፤ ሺን ሃዒ ኡባሳን ኣሳይ ኡባይ ናጋራፔ ሲማና ማላ ኣዛዜዳ።

³¹ኣዪሲ ጎፔ፥ ፆሳይ ዎዲያ ኬሪ ዎꬄዳ፤ ሄ ዎዲያን ባሬ ዶሬዳ ኡራን ሳዓን ዴዒያ ኣሳ ኡባ ቦላ ፂሎ ፒርዳ ኢ ፒርዳና፤ ኣሳ ኡባው ሃይቁዋፔ ዬሱሳ ዴንꬄዳዋን ሄዋ ቱማዬዳ» ያጌዳ።

³²ኡንቱንቱፔ ኢቲ ኢቲ ኣሳቱ ሃይቁዋፔ ዴንዱዋባ ጳዉሎሳፔ ሲሲዴ፥ ኣ ቦላ ቂሊጬዲኖ፤ ሺን ሃራ ኣሳቱ ኣ፥ «ኑኒ ሃዋ ኔፔ ጉጂዴ ሲሳና ኮዬቶ» ጌዲኖ።

³³ሄዋ ዲራው፥ ጳዉሎሲ ኡንቱንቱ ጊዶፔ ኬሴዳ።