ዬሱሲ ኪቴዳዋንቱ ኦሱዋ 11:16-28

¹⁶ጎዳይ፥ ‹ዮሃኒሲ ሃꬃን ፃማቄዳ፤ ሺን ሂንቴንቱ ጌሻ ኣያናን ፃማቄታኒታ› ያጌዳ ቃላ ታኒ ሃሳያዲ።

¹⁷ፆሳይ ኑሲ ጎዳ ዬሱሲ ኪሪስቶሳ ኣማኔዳዋንቱሲ ኢሜዳ ኢሞታ ማላ ኣዪሁዳ ጊዴናዋንቶካ ቃሲ ኢሞፔ፥ ሲሚ ፆሳ ዲጋናው ታኒ ኦኔ?» ያጌዳ።

¹⁸ኡንቱንቱ ሃዋ ሲሴዳ ዎዴ ባሬንቱ ፓሉማ ኣጊዴ፥ «ያቲና፥ ፆሳይ ኣዪሁዳ ጊዴናዋንቱካ ቃሲ ናጋራፔ ሲሚዴ ዴዓናዳን፥ ኡንቱንታ ቃዴዳ» ያጊዴ ፆሳ ጋላቴዲኖ።

¹⁹ኢስፂፋኖሳ ቦላ ጋኬዳ ዋዪያ ጌዱዋን ላሌቴዳ ኣማኒያዋንቱ ቃላ ኣዪሁዳቱዋ ፃላላፔ ኣቲን፥ ሃራሲ ኢቱዋሲኔ ኦዴናን፥ ፒንቄ፥ ቆጲሮሳኔ ኣንፆኪያ ጋካናው ዩዬዲኖ።

²⁰ሺን ቆጲሮሳፔኔ ቄሬናፔ ዬዳ ኢቲ ኢቲ ኣማኒያ ኣሳቱ ኣንፆኪያ ቢዴ፥ ጎዳ ዬሱሳ ዎንጋላ ሚሺራቹዋ ኦዲዴ፥ ጊሪኬ ኣሳሲካ ኦዴዲኖ።

²¹ጎዳ ዎልቃይ ኡንቱንቱና ዴዔ፤ ቃሲ ጮራ ኣሳይ ኣማኒዴ፥ ጎዳኮ ሲሜዲኖ።

²²ሃ ዬዉ ዬሩሳላሜን ዴዒያ ኣማኒያ ኣሳሲ ሲሴቲና፥ ኣማኒያ ኣሳይ ባርናባሳ ኣንፆኪያ ኪቴዳ።

²³ባርናባሲ ኣንፆኪያ ቤዳ ዎዴ፥ ፆሳ ኣꬎ ኬካቴꬃ ኦሱዋ ቤዒዴ ናሼቴዳ፤ ኡንቱንቱ ኡባይ ጎዳን ባሬንቱ ኩሜንꬃ ዎዛናፔ ሚኒ ዴዓናዳን፥ ኡንቱንታ ዞሬዳ።

²⁴ኣዪሲ ጎፔ፥ ባርናባሲ ጌሻ ኣያናይኔ ኣማኑ ኩሜዳ ሎዖ ኣሳ፤ ሄ ጋሱዋን ጮራ ኣሳይ ጎዳኮ ዬዲኖ።

²⁵ሄዋፔ ጉዪያን፥ ባርናባሲ ሳዖላ ኮያናው ፄርሴሴ ቤዳ።

²⁶ያቲዴ ሳዖላ ዴሜዳ ዎዴ፥ ኣንፆኪያ ኣሄዳ። ባርናባሲኔ ሳዖሊ ኣማኒያ ኣሳና ኢቲ ላይꬃ ኩሜንꬃ ኡቲዴ፥ ጮራ ኣሳ ታማሪሴዲኖ፤ ካሊያዋንቱ ኣንፆኪያን ኣማኒያ ኣሳ ጌቴቲዴ፥ ኮይሮ ፄሴቴዲኖ።

²⁷ናባቱ ዬሩሳላሜፔ ኣንፆኪያ ሄ ዎዴ ዎꬌዲኖ።

²⁸ኡንቱንቱ ጊዶፔ ኣጋቦሳ ጊያዌ ዴንዲዴ፥ ሳዓ ኡባን ዎልቃማ ኮሻይ ዴንዳናዋ ኣያና ዎልቃን ቲምቢቲያ ኦዴዳ፤ ሄዌ ሃኔዳዌ ቃላዉዴዮሳ ካዉቴꬃ ዎዲያና።