ሮሜ ዓጮ'' ዓሶም 3:2-29

²ዓይሁዴ ዓሲ ማዒፃ ጎኔና ሚርጌ ጎይሢና ባሻያኬ፤ ዬይያ፦ ፆኦሲ ፔኤኮ ቃኣሎ'' ዓይሁዶ ዓሶም ጉሙርቂ ዒንጌሢሮኬ።

³ዓይሁዶኮ ፔቴ'' ፔቴ'' ዓሳ ጉሙርቂንቱዋያ ማዒ ጴዼቶ፦ ዔያቶኮ ጉሙርቂንቱዋያ ማዒፃ ፆኦሲ ጉሙርቂንቱዋያ ማሃ?

⁴ፔቴ''ታዖ ማሁዋሴ! «ኔ ጌስታ ጌኤዞና ጎኔ ዓሲ ማዒ ኔና ሞኦታሢ ኔ ላሣንዳኔ» ጌይንቲ ፃኣፒንቴሢጉዲ ዓሲ ቢያ ሉኡቃያ ማዔቴያ ፆኦሲ ጎኔ ጌስታያኬ።

⁵ጋዓንቴ ኑኡኮ ጎማ ፆኦሲ ፂሉ''ሞ ፔጋሲ ዻዋያ ማዔቴ፥ ኑ ዎዚ ጋዓንዳይ? ፆኦሲ ኑ ጎሞሮ ኑና ሜቶይዳ ዓጌቶ ፒዜ ዒ ዎጋያቱዋሴ ጌይሢዳ? ዬያ ታ ዓሲ ማሊሢ ጎይሢ ጋዓኔ።

⁶«ፆኦሲ ፒዜ ዎጋያቱዋሴ» ጋዓኒ ፔቴ''ታዖ ዳንዳዒንቱዋሴ፤ ያዺ ማዔቶ ፆኦሲ ዓጮ''ይዳ ሃጊ ዎዲ'' ዎጋንዳይ?

⁷ጋዓንቴ ታኣኮ ሉኡዚ ዓሲ ማዒፃ ፆኦሲኮ ጎኑሞ ፔጋሲ ቦንቾ ዼኤፑሞዋ ዻውዋያ ማዔቶ ዓካሪ ታኣኒ ሉኡዚ ዓሲ ማዒ ዎጊንታሢ ዓይጌንዴሮዳይ?

⁸ፔቴ'' ፔቴ'' ዓሳ፦ «ኮሺ ባኣዚ'' ኑ ዴንቃኒ ፑርታ ባኣዚ'' ኑ ማዾም» ጌዒ ጌዒ ታኣኒ ዔርዛያ ማሊሲ ታና ዾንካኔ፤ ዬያሮ ዔያቶ ዑፃ ዎጊንታንዳ ዴኤፆ ዎጋ ፒዜኬ።

⁹ዬያይዴቴ ኑኡኒ፥ ዓይሁዶ ዓሳ ዓይሁዶ ማዒባኣ ዓሶይዳፓ ባሻኔ ጌይሢዳ? ፔቴ''ታዖ ያዺቱዋሴ! ዓይሁዶ ዓሶ ማዔቴያ ዓይሁዴ ማዒባኣ ዓሳ ሓሣ ዓሲ ቢያ ጎሜና ማዔሢ ቤርታዺ ታ ኬኤዜኔ።

¹⁰ጌኤዦ ማፃኣፖይዳ፦ «ፔቴ''ታዖ ፂሎ'' ዓሲ ባኣሴ፤

¹¹ዒኔና ጶቂሣ ዓሲያ ባኣሴ፤ ዒናፓ ፆኦሲ ኮዓ ዓሲ ፔቴ''ታዖ ባኣሴ።

¹²ቢያሢ ጎኑሞ ጎይፃፓ ዻቢ ዣኣሌኔ፤ ፔቴ''ታዖ ኮሺ ማዾ ማዻ ዓሲ ባኣሴ።

¹³ዓሲ ባይዛ፥ ፑርታ ጌኤሲ ጌስታኒ ዻንጋ ዔያቶኮ ጉሪ ዱኡፒ ዔቴጉዲኬ፤ ዻንጋ ዔያቶኮ ጌሻያኬ፤ ጌኤዛ ዔያቶኮ ሾኦሺ ዻዓሢጉዲኬ፤

¹⁴ዻንጋ ዔያቶኮ ፑርታ ጋዳማ ሌሊ ጋዳንቃያኬ።

¹⁵ዔያታ ዓሲ ዎዻኒ ሩራያኬ፤

¹⁶ዔያታ ዴንዳ ቤዞ ቢያይዳ ባይሲንታና ሜቶናኮ ካራኬ።

¹⁷ዎዲ'' ኮሺ ናንጎንዶቴያ ዔያታ ዔሩዋያኬ።

¹⁸ፔቴ''ታዖ ፆኦሲ ዔያታ ዒጊጩዋሴ» ጌይንቲ ፃኣፒንቴኔ።

¹⁹ዎጎኮ ዓይሢፃ ኮይሳሢ ዎጌና ዎርቃ ዓሲም ማዔሢ ኑ ዔራኔ፤ ዬያ ዛሎ''ና ዓሳ ቶላ''ኒ ጎዖንዶ ባኣዚ'' ባይዚ ዻንጎ ፔኤሲ'' ዓርቃንዳኔ፤ ዓጫ'' ቢያ ፆኦሲ ቤርታ ዻቢንቴያ ማዓንዳኔ።

²⁰ዬያሮ ዓይጎ ዓሲያ ፆኦሲ ቤርታ ሙሴ ዔርዜ ዎጎ ኩንሥሢና ፂሉ''ዋሴ፤ ዎጋ ዻዋሢ፦ ዓሲ ጎሜና ማዒፆኬ።

²¹ሓሢ ጋዓንቴ ፆኦሲ ዓሲ ፂሊ''ሳ ጎይፃ ዎጋፓ ዱማዺ ጴዼኔ፤ ዬይያ፦ ሙሴ ዔርዜ ዎጎና ፆኦሲ ማሊፆ ኬኤዛ ዓሶ ዛሎ''ና ማርካዺንቴኔ።

²²ዬያሮ ፆኦሲ ዖናኣ ዱማሱዋዖ ዬሱስ ኪሪስቶሴ ጉሙርቃዞንሢም ቢያ ፂሉ''ሞ ዒንጋኔ።

²³ዓይጎሮ ጌዔቶ ዓሲ ቢያ ጎሜ ማዺ ፆኦሲ ዔያቶም ዒንጌ ቦንቻፓ ዓቴ''ኔ።

²⁴ዬያሮ ዓሳ ዬሱስ ኪሪስቶሴ ማዼ ዻቂሺፆ ማዾ''ና ፆኦሲ ፔ ኮሹሞና ዒንጌ ዒንጊፆና ፂላ''ኔ።

²⁵ፆኦሲ ዬሱስ ኪሪስቶሴ፡ ጎሞ ዛሎ ዒንጎ ባኣዚ'' ማሂ ዒንጌሢ' ዒዛ ጉሙርቃሢ ቢያ ዒዛ ሱጉፆና ዔያቶኮ ጎማፓ ማኣሪንቲሢ ዴንቃንዳጉዲኬ፤ ፆኦሲ ዬያ ማዼሢ' ቤርታ ዓኣ ጎሞ ጊቢ'' ዳንዳዒሢና ባኣያ ማሂ ፔኤኮ ፂሉ''ሞ ጎይፆ ዻዋኒኬ።

²⁶ሓሣኣ ዎዶ''ና ፆኦሲ ፂሎ'' ዎጋያ ማዒፆ ዻዋሢ' ዬሱሴ ጉሙርቃዞንሢ ቢያ ፂሊ''ሲፆናኬ።

²⁷ዓካሪ ኑኡኒ ሄርሺንታንዳ ባኣዚ'' ዓይጌ ዓኣይ? ዓይጎናኣ ኑ ሄርሺንታ ባኣዚ'' ባኣሴ፤ ኑ ሄርሺንቱዋኣሢ ዓይጎ ዛላናዳይ? ዎጎ ኑ ማዺ ኩንሣሢሮዳ? ዔይዔ፤ ኪሪስቶሴ ጉሙርቂሢ ዎጌናኬ።

²⁸ዬያሮ ፆኦሲ ዓሲ ፂሎ'' ማሂ ዛጋሢ፦ ዎጌ ማዾ ኩንሤምቱዋንቴ ጉሙርቄቶ ማዔሢ ኑ ዔራኔ።

²⁹ፆኦሲ፡ ዓይሁዶ ዓሶ ፆኦሲ ሌሊዳ? ዓይሁዶ ማዒባኣ ዓሶኮ ፆኦሲቱዋዓዳ? ጎኔና ዓይሁዶ ማዒባኣ ዓሶኮዋ ፆኦሲኬ።