ሮሜ ዓጮ'' ዓሶም 11:3-36

³ዒማ''ና ዔኤሊያሴ፦ «ጎዳሢዮ! ኔ ማሊፆ ኬኤዛዞንሢ ዔያታ ዎዼኔ፤ ኔኤም ዒንጎ ባኮ ዒንጊ ካኣሽኮ ቤዞዋ ሻሄም ታኣኒ ሌሊ ዓቴ''ኔ፤ ታናኣ ሓሣ ዔያታ ዎዻኒ ኮዓኔ» ጌዔኔ።

⁴ጋዓንቴ ፆኦሲ ዒዛም ማሃዖ፦ «ጎኔ ፆኦሲ ማዒባኣ፥ ባዓኣሌ ጎዖ ፆኦዞ ካኣሽኪባኣ ላንካይ ሺያ ዓሲ ታኣኮ ዓኣኔ» ጌዔኔ።

⁵ሓሢ ማዔቴያ ፆኦሲኮ ኮሹሞ ዒንጊፆና ዶኦሪንቴ ዻካ'' ዒስራዔኤሌ ዓሲ ዓኣኔ።

⁶ፆኦሲኮ ዶኦሪፃ ኮሹሞ ዒንጊፆና ማዔቶ ማዾናቱዋሴ ጌይሢኬ፤ ዎንዴ ማዾና ማዔቴ ፆኦሲኮ ኮሹሞ ዒንጊፃ ኮሹሞ ዒንጊሢ ማዒንዱዋያታንቴኬ።

⁷ዓካሪ ጋፒንፃ ዓይጎ ማዔይ? ዒስራዔኤሌ ዓሳ ዔያታ ኮዔ ባኮ ዴንቂባኣሴ፤ ዔያቶይዳፓ ዶኦሪንቴዞንሢ ጋዓንቴ ኮዔ ባኮ ዴንቄኔ፤ ዓቴ'' ዓሳ ጎኑሞ ዔራኒ ዳንዳዒባኣሴ።

⁸ዬይያ ያዺ ማዔሢ፦ «ፆኦሲ ዒኖ'' ዔያቶኮ ዶጪሴኔ፤ ዬያሮ ሃኖ'' ሄላ''ንዳኣና ዓኣፓ ዔያቶኮ ዴንቁዋሴ፤ ዋያኣ ዔያቶኮ ዋይዙዋሴ» ጌይንቲ ፃኣፒንቴሢሮኬ።

⁹ዳውቴ ሓሣ፦ «ዔያታ ሙዓኒ ቡካ ቤዛ ዓርቃ ፒሮ፤ ሓሣ ሎንሣ ዔቴ ማዒ ዔያቶ ሜታሶንጎ!

¹⁰ዓኣፓ ዔያቶኮ ዴንቁዋጉዲ ዹሞንጎ፤ ጊኢራኣ ዔያቶኮ ሜቶና ቢያ ኬሊ'' ዎቦንጎ» ጌዔኔ።

¹¹ሂንዳ ላሚ ታ ሓሣ ሂዚ ጎዖም፤ ዓይሁዶ ዓሳ ዻቢንቴሢ ናንጊና ባይቃንዳጉዲዳ? ያዺቱዋሴ! ዓይሁዶ ዓሶ ዻቢንቶ ዛሎ''ና ዓይሁዴ ማዒባኣ ዓሳ ዻቂንታ ዴንቄኔ፤ ዬይ ያዺ ማዔሢ ዔያታ ዓይሁዴ ማዒባኣ ዓሳ፦ «ዎይቲ ዔያታ ኑጉዲ ማዔይ?» ጋዓንዳጉዲኬ።

¹²ዓይሁዶ ዓሶኮ ዻቢንታ ዓጮ''ም ሚርጌ ዓንጆ ጴዺሴኔ፤ ሓሣ ዔያቶኮ ባሊቲባኣያ ማዒፃ ዓይሁዴ ማዒባኣ ዓሶም ዓንጆ ማዔኔ፤ ዎንዴ ዓይሁዶ ዓሳ ቢያ ዻቄያ ማዔቴ ዓንጃ ዎዚ ሚርጋንዳንቴዳይ?

¹³ሓሢ ሓያ ታ ኬኤዛሢ ዒንሢ፥ ዓይሁዴ ማዒባኣ ዓሶምኬ፤ ዒንሢ፥ ዓይሁዴ ማዒባኣ ዓሶም ታ ኬኤዛንዳጉዲ ዳኪንቴሢሮ ታ ማዻ ማዾ''ና ዎዛዻኔ።

¹⁴ሓያ ታ ማዻሢ ታ ፃጶ ማዔ ዓይሁዴ ዓሶ፦ «ዔያታ ዎይቲ ኑጉዲ ማዔይ?» ጌይሳኒኬ፤ ዬያይዲፆና ጎዖንቴ ዔያቶይዳፓ ፔቴ'' ፔቴ''ዞንሢ ታ ዻቂሻንዳያ ናንዳኔ።

¹⁵ፆኦሲ ዔያቶ ሃሼ''ሢሮ ሜሌ'' ዓሳ ፆኦሲና ቡካያ ማዔቴ ፆኦሲ ዔያቶ ፔ ዓሲ ማሂ ዔካ ዎዶ''ና ዎዎይታንዳያ ዒንሢም ማላይ? ዬይ ሓይቢዳፓ ዔቂሢጉዴያኬ!

¹⁶ፔቴ'' ቆኦሮ ሙኑቃኮ ካራ''ፓ ዔኪ ፆኦሲም ዱማዼያ ማሆናቴ ሙኑቃ ጉቤ ፆኦሲም ዱማዼያ ማዓኔ። ዬያጉዲ ሃሣ ፔቴ'' ሚሢኮ ፃጳ ፆኦሲም ዱማዼያ ማዔቴ ካኣፓኣ ዱማዼያ ማዓኔ።

¹⁷ማኣሮ ካራ'' ቱኮ''ና ሪሚቶ ሚፆኮ ካኣፖ ማዔ ዓይሁዶ ዓሳ ሜቂ ኬዴ'' ቤዛ ጌሦና፥ ካዮ ሪሚቶ ካኣፖጉዲ ማዔ፥ ዒንሢ ዓይሁዴ ማዒባኣ ዓሳ ዔያቶም ዒንጊንታ ዓንጆ ዒንሢያ ዴንቃያ ማዔኔ።

¹⁸ዬያሮ ዒንሢ ዓይሁዴ ማዒባኣ ዓሳ ሜቂ ኬዴ'' ካኣፖ፥ ዓይሁዶ ዓሶይዳ ዖቶርቂፖቴ፤ ዒንሢ ካኣፒ ሌሊ ማዔሢሮ ፃጳ ዒንሢ ኬዲ ዓርቄኔ፤ ዒንሢ ፃጶ ኬዲ ዓርቂባኣሢሮ ሄርሺንታንዳያ ዒንሢም ኮይሱዋሴ።

¹⁹ጋዓንቴ፦ «ካኣፓ ሜቂ ኬዴ''ሢ ኑኡኒ ዔያቶ ቤዛ ጌላንዳጉዲ ጌይኬ» ዒንሢ ጋዓንዳኣናንዳኔ።

²⁰ያዺ ዒንሢ ጋዓኒ ጎኔኬ፤ ጋዓንቴ ዔያታ ሜቂ ኬዴ''ሢ ኪሪስቶሴ ጉሙርቁዋዖ ዓቲፆና ማዓዛ ዒንሢ ዶዲ ዒኢካ ዴዔሢ ኪሪስቶሴ ጉሙርቂፆናኬ፤ ያዺ ማዔሢሮ ዒዒጊጫንዳፓዓቴም ዖቶርሙሞ ዒንሢ ኮይሱዋሴ።

²¹ዓይጎሮ ጌዔቴ ፆኦሲ ቤርታ ማዢንቶ ካኣፖ ማዔ፥ ዓይሁዶ ዓሶም ሚጪንቲባኣያ ማዔቴ ዒንሢማኣ ሚጪንታዓኬ።

²²ዓካሪ ፆኦሲኮ ሚጪንቶና ሚጪንቶ ዒፂፆና ዛጉዋቴ፤ ሚጪንቶ ዒፂፃ ዒዛኮ ሜቂ ኬዴ''ዞንሢም ማዓዛ፥ ሚጪንቶ ዒ ዒንሢ ሚጪንታኔ፤ ዬያ ዒ ማዻንዳሢ' ዒዛ ጉሙርቂፆና ዶዲ ዒንሢ ናንጌቴኬ፤ ዶዲባኣቴ ጋዓንቴ ዒንሢያ ሜቂ ኬዳ''ንዳኔ።

²³ዓይሁዶ ዓሳ ኪሪስቶሴ ጉሙርቂፆ ዒፂፆ ሃሺ'' ማዔቴ ቤርታ ዔያታ ዓኣ ቤዞ ማማዓንዳኔ፤ ዎይቲ ጌዔቴ ፆኦሲ ዔያቶ ቤርታ ዓኣ ቤዞ ማሃኒ ዳንዳዓኔ።

²⁴ዒንሢ፥ ዓይሁዴ ማዒባኣ ዓሳ፤ ዒንሢ ካዮ ሪሚቶ ካኣፖ ማዒ ዓኣያታዖ ዒንሢኮ ቤዞ ማዒባኣ፥ ቱኮ''ና ሪሚቶ ሚፆይዳ ዓይሢንታኒ ዳንዳዔቴ ቱኮ''ና ሪሚቶ ካኣፖ ማዔ ዓይሁዶ ዓሳ ቤርታ ዔያታ ዓኣ ቤዞ ማዓኒ ዎይቲ ዔያቶም ዳንዳዒንቲንዱዋይ!

²⁵ታ ዒሾንሦ! ታ ሚሾንሦ! «ኑ ዔራኬ» ጌይ ሄርሺንቲፖቴ፤ ፔቴ'' ዓኣሺንቴ ባኣዚ'' ታ ዒንሢም ኬኤዛንዳኔ፤ ዬና ዓይጎዳይ ጌዔቴ ዒስራዔኤሌ ዓሶኮ ጉሙርቆ ዒፂፃ ጋፒንሢ ሄላ''ንዳኣናቱዋንቴ ዔኤሊ''ንቴ፥ ዓይሁዴ ማዒባኣ ዓሳ ቢያ ፆኦሲ ባንሢ ሙካንዳያ ሄላ''ንዳኣናኬ።

²⁶ዓካሪ፤ ዒስራዔኤሌ ዓሳ ቢያ ዻቃንዳሢ፦ «ዻቂሻሢ ፂዮኔፓ ኬስካንዳኔ፤ ያይቆኦቤ ዜርፆኮ ጎሞ ባይዛንዳኔ፤

²⁷ጎሞ ታ ዔያቶኮ ባይዛ ዎዶ''ና ዔያቶና ዎላ'' ታ ጫኣቃንዳ ጫኣቁማ ያዺኬ» ጌይንቲ ፃኣፒንቴ ጎይፆናኬ።

²⁸ዒስራዔኤሌ ዓሳ ኮዦ ሓይሶ ዋይዜዖ ዔኮ ዒፂፆና ዒንሢ ዓይሁዴ ማዒባኣ ዓሶም ዻቂንታ ማዓንዳጉዲ ፆኦሲኮ ዔያታ ሞርኬ ማዔኔ። ጋዓንቴ ዶኦሪንቲፆ ዛሎ''ታቴ ዔያታ ዓዶንሢ ዛሎ''ና ፆኦሲኮ ዒጊኖኬ።

²⁹ፆኦሲ ዶኦሪ ሓሣ ኮሹሞ ዒንጊፆዋ ዒንጌሢኮ ጊንፃ ዒ ማዼ ማዾ''ና «ዓይጋ ታ ሂዴይ!» ጌይ ማሉዋሴ።

³⁰ዒንሢ፥ ዓይሁዴ ማዒባኣ ዓሳ ቤርታ ፆኦሲም ዓይሢንቱዋያኬ፤ ሓሢ ጋዓንቴ ዓይሁዴ ዓሳ ዓይሢንቲባኣ ዛሎ''ና ፆኦሲ ማኣሪፆ ዒንሢ ዴንቄኔ።

³¹ፆኦሲ ዒንሢ ማኣሬሢ ዔያታ ዛጋዖ ፆኦሲም ዓይሢንቱዋያ ማዔኔ፤ ጋፒንፃ ጋዓንቴ ዒንሢ ማኣሬ ጎይፆ ዔያቶዋ ማኣራንዳኔ።

³²ዓይጎሮ ጌዔቴ ፆኦሲ ዓሲ ቢያ ማኣራኒ ጋዓዖ፥ ዓሲ ቢያ «ዓይሢንቱዋያኬ» ጌይ ሃሼኔ፤

³³ፆኦሲኮ ኮሹሞና ሃኣማቶና ሃሣ ዔራቶና ዖኦኒያ ዔሩዋያኬ! ዒ ዎጋ ዎጊፃ «ዎዚምዳይ?» ጌይንቱዋያኬ፤ ዒ ማዻ ጎይፃኣ ዔርቱዋያኬ!

³⁴ፆኦሲ ማሊሢ ዔራይ ዖኦኒያ ባኣሴ፤ ዒዛ ዞራ ዓሲያ ባኣሴ፤

³⁵ታልዖ ማሃንዳጉዲ፥ ዒዛም ታልዔ ዓሲያ ባኣሴ።

³⁶ዎይቲ ጌዔቴ ቢያ ባኮ ማዤሢ ዒዛኬ፤ ቢያ ባኮ ናንጊሻሢያ ዒዛኬ፥ ዒዛም ናንጋያኬ፤ ናንጊና ቦንቾ ዒዛም ማዖንጎ፤ ዓኣሜን።