ሮሚያ 1:13-30

¹³ታናዳን ኣማኒያዋንቶ፥ ታኒ ኡባ ዎዴ ሂንቴንቱኮ ባናው ቆፓዲ። ሺን ታና ዲጊያባይ ዴዒያዋ ሂንቴ ኤራናው ቤሴ፤ ታኒ ሃራይ ኣቶ ኣዪሁዳ ጊዴና ሃራ ኣሳፔካ ኣይፊያ ዴሜዳዋዳን፥ ሂንቴንቱፔካ ኣይፊያ ዴማናው ኮያይ።

¹⁴ታኒ ኣሳ ኡባው፥ ጊሪኬ ኣሳዉኔ ታማሪቤና ኣሳው ቃሲ ኣꬎ ኤራንቻቶኔ ኤያቶ ቃንፃና ኣጩ ዴዔ።

¹⁵ሄዋ ዲራው፥ ታው ዳንዳዬቴዳ ኬናን ሮሜን ዴዒያ ሂንቴንቱሲካ ሚሺራቹዋ ቃላ ኦዳናው ኣሞታይ።

¹⁶ሚሺራቹዋ ቃላይ ታና ዬላዬና፤ ኢ ኣማኒያ ኡባ፥ ካሴቲዴ ኣዪሁዳ ኣሳ ቃሲ ኣዪሁዳ ጊዴና ኣሳ ኣሻናው ፆሳፔ ዪያ ዎልቃ።

¹⁷ኣዪሲ ጎፔ፥ ፆሳ ማፃፋይ፥ «ፂሉ ፆሳን ኣማኔቲዴ ዴዓና» ያጊያዋዳን፥ ፆሳይ ኣሳ ኮይሮፔ ዉርሴꬃ ጋካናው፥ ኣማኑዋን ፂሊሲያዋ ሚሺራቹዋ ቃላይ ቆንጪሴ።

¹⁸ቱማቴꬃይ ኤሬታናዋ ባሬንቱ ኢታ ሃኖታን ዲጊያ ናጋራ ኦሱዋ ኡባ ቦላኒኔ ኣሳ ኢታ ኦሱዋ ኡባ ቦላን፥ ፆሳ ሃንቁ ሳሉዋፔ ዎꬊዴ ቆንጫና።

¹⁹ኡንቱንቱ ፆሳባ ኤራና ዳንዳዪያዌ ኡንቱንቶ ቆንጬ፤ ኣዪሲ ጎፔ፥ ፆሳይ ኡንቱንቶ ቆንጪሴዳ።

²⁰ቤቴና ኣ ሃኖታይ፥ ሄዌካ ኣ ሜꬊና ዎልቃይኔ ኣ ፆሳቴꬃይ ኢቲፔ ፆሳይ ሃ ኣላሚያ ሜꬌዳዋፔ ዶሚዴ፥ ኡንቱንቶ ቆንጪዴ ቤቴዳ፤ ኡንቱንቱ ሄዋ ፆሳይ ሜꬌዳባፔ ቤዓናው ዳንዳዪያ ዲራው፥ ኡንቱንቶ ጋሶዪያባይ ባዋ።

²¹ኣዪሲ ጎፔ፥ ኡንቱንቱ ፆሳ ኤሮፔካ፥ ኣው ቤሲያ ቦንቹዋ ኢሚቤይኪኖ፤ ቃሲ ኣ ጋላቲኪኖ። ሺን ኡንቱንቱ ኣላሌ ኬሴናባ ቆፒኖ፤ ቃሲ ኡንቱንቱ ኣኬኬና ዎዛናይ ꬉሜዳ።

²²ኡንቱንቱ ባሬንታ ኣꬌዳ ኤራንቻ ጊኖ፤ ሺን ኡንቱንቱ ኤያ።

²³ኡንቱንቱ ሃይቄና ፆሳሲ ጎዪኒያዋ ኢፂዴ፥ ሃይቂያ ኣሳ ሜꬌታ፥ ካፋቱዋ ሜꬌታ፥ ዶዓቱዋ ሜꬌታኔ ቲራን ጎሼቲያዋንቱ ሜꬌታ ሜꬌቴዳዋንቱሲ ጎዪኔዲኖ።

²⁴ሄዋ ዲራው፥ ኡንቱንቱ ኢቱ ኢቱዋና ፖኮባ ኦꬃና ማላ፥ ፆሳይ ኡንቱንቱ ዎዛናይ ኣሞቲያ ቱናባ ኦꬃናዳን ኡንቱንታ ኣጌዳ።

²⁵ኣዪሲ ጎፔ፥ ኡንቱንቱ ፆሳ ቱማቴꬃ ዎርዱዋን ላሜዲኖ፤ ቃሲ ሜꬌዳ ፆሳ ኣጊዴ፥ ኢ ሜꬌዳባው ጎዪኔዲኖኔ ኦꬄዲኖ። ፆሳይ ሜꬊናው ጋላቴቴዳዋ። ኣሜንዒ።

²⁶ሄዋ ዲራው፥ ፆሳይ ኡንቱንቱ ፖኮባ ኣሞታና ማላ፥ ኡንቱንታ ኣጌዳ፤ ሃራይ ኣቶ ኡንቱንቱ ማጫዋንቱ ባሬንቶ ቤሲያዋ ኣጊዴ፥ ቤሴናዋ ሃኔዲኖ።

²⁷ሃዋዳንካ፥ ኣቱማ ኣሳይ ቃሲ ባሬንቶ ቤሲያዋዳን ማጫዋንቱና ጋኬቲያዋ ኣጊዴ፥ ኢቱ ኢቱዋና ጋኬታናው ኮዬዲኖ፤ ኣቱማ ኣሳይ ኢቱ ኢቱዋና ፖኮባ ኦꬂዴ፥ ባሬንቱ ኦꬄዳ ባላን ባሬንቶ ቤሲያ ፒርዳ ኣኬዲኖ።

²⁸ኡንቱንቱ ፆሳ ኤራናው ዶሴናን ኢፄዳዋ ኬና ፆሳይ ኡንቱንቱ ቤሴናዋ ኦꬃና ማላ፥ ኡንቱንቶ ፓꬄና ቆፋ ኢሜዳ።

²⁹ኡንቱንቱን ቱናቴꬃይ፥ ኢታቴꬃይ፥ ዮራቴꬃይኔ ኢታ ሃኖታይ ኩሜዳ፤ ቃሲ ኡንቱንቱን ቃናቲ፥ ሼምፑዋ ዎꬊያ ቆፋይ፥ ፓሉማይ፥ ጪሙሳይኔ ኢታ ቆፋይ ኩሜዳ፤ ቃሲ ኡንቱንቱ ሶቂያዋንታ፥

³⁰ዚጊሪያዋንታ፥ ፆሳ ኢፂያዋንታ፥ ቦሪያዋንታ፥ ኦቶሬቲያዋንታ፥ ጬቄቲያዋንታ፥ ኢታባ ኦꬃናው ኮዪያዋንታኔ ባሬንቱ ኣዎኔ ኣቲው ኣዛዜቴናዋንታ፥