ሮሚያ 16:1-17

¹ኪንኪሪያ ጌቴቲያ ካታማን ዴዒያ ኣማኒያ ኣሳና ኦꬂያ ኑ ሚቻታ ፔባ ሎዖ ማጫ ኣሳ ጊዲያዋ ታኒ ሂንቴንታ ኤሪሳይ።

²ሂንቴንቱ ኢዞ ጌሻቱ ጎዳ ሱንꬃን ሞኪያዋዳን ሞኪቴ፤ ቃሲ ኢዛ ሂንቴንቱፔ ኮዪያዌ ኣያ ጊዶፔካ፥ ኢዞ ማዲቴ፤ ኣዪሲ ጎፔ፥ ኢዛ ባሬ ሁጴው ጮራ ኣሳ ማዳው፤ ቃሲ ታና ታ ሁጴዉካ ዳሪሳ ማዳው።

³ኪሪስቶሳ ዬሱሳ ኦሱዋ ታናና ኢቲፔ ኦꬂያ ጲሪስቂሊሲኔ ኢዚ ኣሲና ኣቂላሲ ታ ሳሮቶዋ ኦዲቴ።

⁴ኡንቱንቱ ታ ሼምፑዋ ዲራው፥ ባሬንቱ ሼምፑዋ ኣꬂ ኢሜዲኖ። ኡንቱንታ ታ ፃላላ ጊዴናን፥ ኣዪሁዳ ጊዴና ኣሳ ኣማኒያ ኣሳይ ኡባይካ ጋላቴ።

⁵ቃሲ ኡንቱንቱ ጎሊያ ኣማኒያ ኣሳይ ሺቂያሳ ኡዲዴ ጋኬቲያ ኣሳ ኡባ ሳሮ ጊቴ። ኢሲያ ጋዲያን ኪሪስቶሳ ኮይሮ ኣማኔዳ ታ ሲቂያ ኤፓኔቶሳው፥ ታ ሳሮቶዋ ኦዲቴ።

⁶ሂንቴንቶ ሎይꬃ ዳቡሬዳ ማይራሞ ሳሮቲቴ።

⁷ታናና ቃሾ ጎሌን ዴዔዳ ታ ዳቦ ጊዴዳ ኣዪሁዳቱዋ፥ ኣንዲሮኒቆሳኔ ዩኒያሳ ሳሮቲቴ። ዬሱሲ ኪቴዳዋንቱ ጊዶን ኡንቱንቱ ሎይꬂ ኤሬቴዳዋንታ። ቃሲ ኡንቱንቱ ኪሪስቶሳ ታፔ ካሴና ኣማኔዲኖ።

⁸ጎዳና ኢቲፔቴꬃን ዴዒያ ታ ሲቆ ላጊያ ኣምፒሊያቶሳው ታ ሳሮቶዋ ኦዲቴ።

⁹ኪሪስቶሳ ኦሱዋ ኑናና ኢቲፔ ኦꬂያ ኡርባኖሳኔ ታኒ ሲቂያ ኢስፃኩሳ ሳሮቲቴ።

¹⁰ኪሪስቶሳና ኢ ዴዒያዌ ኤሬቲና ፓጪያ ፆኔዳ ኣጴሊሳው ታ ሳሮቶዋ ኦዲቴ፤ ኣሪስፆቢሎሳ ሶይ ኣሳዉካ ታ ሳሮቶዋ ኦዲቴ።

¹¹ታ ዳቦ ጊዴዳ ኣዪሁዳዊያ ሄሮዲዮናኔ ኪሪስቶሳ ኣማኒያ ናርሲሴሳ ሶይ ኣሳ ሳሮቲቴ።

¹²ጎዳ ኦሱዋን ዳቡሪያ ቲሩፋይናኔ ቲሩፎሶ ጌቴቲያ ማጫዋንታ ሳሮቲቴ፤ ቃሲ ጎዳው ዳሮ ዳቡራዴ ኦꬂያ ሲቂያ ፔርሲሶ ሳሮቲቴ።

¹³ጎዳ ኦሱዋን ሎይꬂ ኤሬቴዳ ሩፎሳዬዉኔ ታና ባሬ ናዓዳን ማዴዳ ኣ ዳዪው ታ ሳሮቶዋ ኦዲቴ።

¹⁴ታ ሳሮቶዋ ኣሲንኪሪቶሳው፥ ፒሌጎናው፥ ሄርሜሳው፥ ፓቲሮባሳዉኔ ኡንቱንቱና ዴዒያ ኣማኒያ ኢሻቱዋ ኡባው ኦዲቴ።

¹⁵ፒሌጎና፥ ዩሎ፥ ኔሪያ፥ ኣ ሚቻቶ፥ ኦሉምፖሳኔ ኡንቱንቱና ዴዒያ ፆሳ ኣሳቱዋ ኡባ ሳሮቲቴ።

¹⁶ጌሻ ኣሳው ቤሲያ ዬሬታ ዬሬቲዴ፥ ኢቱ ኢቱዋ ሳሮቲቴ፤ ኪሪስቶሳን ኣማኒያዋንቱ ኡባቱ ሂንቴንታ ሳሮ ያጌዲኖ።

¹⁷ታናዳን ኣማኒያዋንቶ፥ ኣሳ ጊዶን ሻኮቴꬃ ሜꬊያዋንታ፥ ኣሳ ኣማኖ ꬉቦ ጊዲያዋንታኔ ሂንቴ ታማሬዳ ቲሚርቲያና ጋኬቴናዋ ታማሪሲያዋንታ ኣኬካናዳን፥ ታኒ ሂንቴንታ ዎሳይ። ኡንቱንቱኮ ሺቆፒቴ።