ማርቆሳ 5:6-25 - Ooratha Caaquwaa

ማርቆሳ 5:6-25

Click on verse(s) to share them!

⁶ዬሱሳ ሃኩዋን ቤዔዳ ዎዴ፥ ኣኮ ዎፂ ዪዴ ኣው ጎዪኔዳ።

⁷ሄ ቢታኒ ባሬ ኮሻ ꬎቁ ኦꬂዴ፥ «ኡባፔ ቦላ ፆሳ ናዓው፥ ዬሱሳ፥ ኔናኔ ታና ኣዬ ጋꬂ? ታና ሙሬና ማላ፥ ታኒ ኔና ፆሳ ሱንꬃን ዎሳይ» ያጌዳ።

⁸ኢ ሄዋ ኣዪሲ ጌዴ ጎፔ፥ ዬሱሲ ኣ፥ «ላ ሃ ኢታ ኣያናው፥ ሃ ቢታኒያፔ ኬሳ» ያጌዳዋሳ።

⁹ዬሱሲ ኣ፥ «ኔ ሱንꬃይ ኦኔ?» ያጊዴ ኦቼዳ። ኢ፥ «ኑኒ ጮራ ጊዲያ ዲራው፥ ታ ሱንꬃይ ሌጊዮና» ያጌዳ።

¹⁰ኢታ ኣያናቱዋ ሄ ጋዲያፔ ኬሲ ዬዴና ማላ፥ ዬሱሳ ሚኒሲዴ ዎሴዳ።

¹¹ሄ ዴሪያ ቦላን ጮራ ጉዱንꬃ ዉዲ ሄሜቴ፤

¹²ኢታ ኣያናቱ ዬሱሳ፥ «ኑና ሂኒ ጉዱንꬃ ዉዲያኮ ዬዳርኪ፤ ኡንቱንቱን ቢዴ ጌላና» ያጊዴ ዎሲና፥

¹³ዬሱሲ፥ «ቢቴ» ያጌዳ። ኢታ ኣያናቱ ቢታኒያፔ ኬሲዴ፥ ጉዱንꬃቱዋን ጌሌዲኖ፤ ላዑ ሻዓ ጊዲያ ጉዱንꬃ ዉዲ ካካ ሁጲያና ካጆቲዴ፥ ኣባን ጌሊዴ፥ ሚቴቲ ኣጌዳ።

¹⁴ጉዱንꬃ ዉዲያ ሄሚያዋንቱ ባቃቲዴ፥ ሃኔዳዋ ካታማኒኔ ካታማፔ ጋፃ ጋዲያን ኦዴዲኖ፤ ሄዋ ቤዓናው ኣሳይ ዬዳ።

¹⁵ኣሳይ ዬሱሳኮ ዪዴ፥ ጮራ ኢታ ኣያናቱ ቤኒ ኦይቄዳ ቢታኒ ባሬ ዎዛናይ ሲሚና፥ ማዩዋ ማዪዴ፥ ሄዋን ኡቴዳዋ ቤዒዴ፥ ኡባይ ያዬዳ።

¹⁶ሄዋ ቤዔዳ ኣሳቱ ኢታ ኣያናቱ ኦይቄዳ ቢታኒ ሃኔዳዋኔ ቃሲ ጉዱንꬃ ዉዲያባ ሄ ኣሳሲ ኦዴዲኖ።

¹⁷ሄዋ ዲራው፥ ኣሳይ ባሬንቱ ጋዲያፔ ዬሱሲ ባና ማላ፥ ዎሳ ዶሜዳ።

¹⁸ዬሱሲ ዎንጊሪያን ጌሊሺን፥ ኢታ ኣያናቱ ኦይቄዳ ቢታኒ ዬሱሳና ዴዓና ማላ፥ ዬሱሳ ዎሴዳ።

¹⁹ሺን ዬሱሲ ኢፂዴ ኣ፥ «ኔ ሶይ ሲማዴ፥ ጎዳይ ኔው ኣይ ማላ ዎልቃማባ ኦꬄዴንቶኔ ቃሲ ኢ ኔው ኣይ ማላ ኬኬንቶ ኔ ሶይ ኣሳው ኦዳ» ያጌዳ።

²⁰ቢታኒ ቢዴ፥ ታሙ ካታማ ጊያሳን ዩዪዴ፥ ዬሱሲ ባሬው ኣይ ማላ ዎልቃማባ ኦꬄዴንቶ፥ ኦዱዋ ዶሜዳ፤ ኢ ኦዴዳዋ ሲሴዳ ኣሳይ ኡባይ ማላሌቴዳ።

²¹ዬሱሲ ሲሚዴ፥ ዎንጊሪያን ጌሊዴ፥ ኣባ ፒኔዳዋፔ ጉዪያን፥ ጮራ ኣሳይ ኣባ ማታን ኣኮ ዩዪ ኣꬊዴ ሺቄዲኖ።

²²ያዒሮሳ ጊያዌ፥ ኣዪሁዳ ዎሳ ጎሊያ ካፓቱዋፔ ኢቱ፥ ዬሱሳ ቤዔዳ ዎዴ ኣኮ ዪ ኣ ጌዲያን ኩንዲዴ፥

²³«ታ ናታ ሃርጋዴ ሃይቃና ሃናው፤ ኢዛ ፓፃዴ ሎዖ ዴዓና ማላ፥ ያዴ ኔ ኩሺያ ኢዚ ቦላ ዎꬃሪኪ» ያጊዴ ዬሱሳ ሚኒሲዴ ዎሴዳ።

²⁴ዬሱሲ ያዒሮሳና ቤዳ፤ ኢ ቢሺን ጮራ ኣሳይ ኣ ካሊዴ ሜቶꬄዲኖ።

²⁵ታማኔ ላዑ ላይꬃ ኡባ ኢዚ ቦላፔ ሱꬃይ ጎጊያ ኢቲ ሚሺራታ ዴዓው።