1मिनु नोले सोलोमनम इस्राएल ङा खाल्पा, इस्राएल ङा थर थर ङा ठेयब मुर नु इस्राएली आन खिं खिं ङा मुर आन कली दाऊद आ सहर, सियोन रे परमप्रभु यावे आ कबल पशो सन्दोस चाक्चा कली यरूसलेम सहरम बुक्चा कली ब्रेप्पाइक्मी बाक्त।
2मिनु एथानीम माइश्शो ७ महिना ङा चाड नाक्ती, इस्राएल ङा मुर नेल्ल पिप सोलोमन आ ङोंइती बुक्मा बाक्त।
3मिनु इस्राएल ङा खाल्पा नेल्ल जाक्ने थुम्मे नोले, चढ़ेबपुकीमी परमप्रभु यावे आ सन्दोस कुरमे बाक्त।
4मिनु चढ़ेब नु लेवीपुकीमी परमप्रभु यावे आ सन्दोस नु ग्रुम्तीक ताम्बुम बाक्शो परमप्रभु आ मारेइ मारेइ कुरशा, इर लदमे बाक्त।
5मिनु पिप सोलोमन इस्राएल ङा मुर नेल्ले नु मेको आ ङोंइती बुक्ब नेल्लेम, सन्दोस आ ङोंइती हिक्ने मचाप्चा ङा पा भेडा नु ब्यफ क्योरशा चढ़ेमे बाक्त। २सामुएल ६:१३
6मिनु नोले चढ़ेबपुकीम परमप्रभु यावे आ कबल पशो सन्दोस खिं ङा नेल्ल क्येङा चोव़खो बाक्तीकेम चाक्शा करूब आस फ्रां आगाम वोदमे बाक्त। २सामुएल ६:१७; १राजा ६:२७
7मारदे हना मेको करूब आस फ्रांम सन्दोस नु कुरतीक कोक्के कली सुम्शो बाक्सा बाक्त।
8मेको कुरतीक कोक्के थम लाइश्शो बाक्तीके, मेको आन सुर नेल्ल क्येङा चोव़खो बाक्तीक आ ङोंइती रे तांइसीबाक्मा बाक्त। तन्न नेल्ल क्येङा चोव़खो बाक्तीक आ लाङगा रे मतांइसी बाक्मा बाक्त। मेको मुल सम्म मेकेर बाक्नीम। प्रस्थान २५:१३-१५
9मिनु होरेब डांडाम परमप्रभु यावेमी इस्राएली आन कली इजीप्त रे ग्रुंइची ना कबल पशो बाक्त। मेना मोसामी मेको कबल पशो लोव़ मुशा ब्रेक्शो फुल्लु निक्शी सन्दोसम कुर पा वोदा बाक्त। मेको सन्दोसम फुल्लु निक्शी ङा लाक्शा अर्को मारेइ मबाक्माक्त। प्रस्थान २५:२१; ब्यवस्था १०:५
10मिनु चढ़ेब नेल्ल क्येङा चोव़खो बाक्तीक रे ग्रूमानु, परमप्रभु यावे आ खिं गोस्सुम ब्रीमाक्त।
11मिनु मेकेर गोस्सुम सुम्तीके चढ़ेबपुकीम गेय पने मचाप्मे बाक्त। मारदे हना परमप्रभु यावे आ छेङछेङम आ खिं ब्रीशो बाक्माक्त। प्रस्थान ४०:३४-३५
12मिनु सोलोमनमी “परमप्रभु यावे क्येर गोस्सुम बाक्ब देंशो बाक्ब। प्रस्थान २०:२१
13गो इन कली गेना हना यो बाक्चा कली गारचा ङा खिं का सेल्ता” देंमाक्त।
14मिनु पिपमी लेश्शा कोव़शा, इस्राएल ङा बुक्शो मुर नेल्ल आन कली आसीक गेमी बाक्त। मेना मेकोपुकी चहिं राप्शो बाक्मा बाक्त।
15मिनु मेकोमी “परमप्रभु यावे, इस्राएली आन परमप्रभु ठेयब बाक्ल। मेकोमी आं आफ दाऊद नु कबल पा, मुल मेको खाप्तु।
16मारदे हना मेकोमी ‘गो आं मुर आन कली इजीप्त रे ग्रुंइशा चाक्गु रे मुल सम्म इस्राएल ङा तेकोइ थर ङा मुर आन सहरम आं नें बाक्ल, दे आं खिं सेल्चा कली मयोव़ङु। तन्न गो आं मुर इस्राएली आन कली सासन पचा कली दाऊद कली योव़ता’ देंत।
17आं आफ दाऊदमी परमप्रभु यावे, इस्राएली आन परमप्रभु आ नें कली मान पा खिं का सेल्चा मिम्शो बाक्त। २सामुएल ७:-
18तन्न परमप्रभु यावेमी आं आफ दाऊद कली ‘गे आं नें कली मान पा खिं का सेल्चा मिम्ताक्वी, मेको रिम्शो बाक्त।
19मो हना यो गे मेको खिं मसेल्नेवे। तन्न इ तौमी आं नें कली मान पा खिं का सेल्ब’ देंशो बाक्तीनी।
20मुल परमप्रभु यावेमी ‘गो पाइनुङ’ देंशो लोव़ खाप्तु। गो आं आफ दाऊद आ पा ङा पिप दुम्शो बाक्नुङ। मिनु परमप्रभु यावेमी ‘पाइनुङ’ देंशो खोदेंशो पा गो इस्राएल ङा पिप दुम्ती। मिनु परमप्रभु यावे, इस्राएली आन परमप्रभु आ नें कली मान पा एको खिं सेल्ता।
21गो मेकेर परमप्रभु यावे आ कबल पशो सन्दोस बाक्तीके का सेल्ता। परमप्रभु यावेमी इं किकी पिपी आन कली इजीप्त रागी रे ग्रुंइशा चाक्गानु, मेकोपुकी नु कबल पशो बाक्माक्त” देंमाक्त।
22मिनु सोलोमनम इस्राएल ङा बुक्शो मुर नेल्ल आन दातेम परमप्रभु यावे कली चढ़ेतीक आ ङोंइती राप्शा, आ गुइ सरीङ गे क्युक्गा बाक्त।
23मिनु मेकोमी “परमप्रभु यावे, इस्राएली आन परमप्रभु इर स्वर्गम नु रागीम इन खोदेंशो अर्को तेकोइ परमप्रभु मबाक्नीम। इन कली आन थुं नेल्लेमी नोले खोइक्ब, इन गेय पाइब आन कली पशो कबल खाप्शा, मेको आन कली गेना हना यो दाक्नीनी।
24गे इन गेय पाइब, आं आफ दाऊद नु पशो कबल खाप्तीनी। मुलाक्ती ‘गो पाइनुङ’ देंशो कबल थमा पा खाप्तीनी।
25मोपतीके परमप्रभु यावे, इस्राएली आन परमप्रभु इन गेय पाइब आं आफ दाऊद नु पशो कबल खाप्पीन। गे मेको नु कबल पा ‘गेना हना यो इ तौ चच रे इस्राएलम पिप दुम्नीम। तन्न मेकोपुकी इ खोदेंशो पा आं ङोंइती होस पा गाक्तेक्म हना, ला मोदेंशो दुम्ब’ देंशो बाक्तीनी।
26मोपतीके इस्राएली आन परमप्रभु, इन गेय पाइब आं आफ दाऊद कली ‘गो पाइनुङ’ देंशो लोव़ खाप्पीन” देंमाक्त।
27मेकोमी “मार, थमा पा परमप्रभु रागीम बाक्बा ङा? कोव़ङीन, इर ङा ठेयब सरीङम ला यो गे मरिक्नीनी हना, एको आं सेल्शो खिंम दोपा रिक्नीनी ङा? यसैया ६६:१; प्रेरित १७:२४
28मो हना यो परमप्रभु यावे, आं परमप्रभु इन गेय पाइब आं प्रार्थना नु आं पुंइशो लोव़ नेनीन। मुलाक्ती इन गेय पाइबमी इन ङोंइती ठेयब सेंदा पा पुंइशो लोव़ नेनीन।
29मिनु नाक्दो नाक्ती एको खिं कली कोव़ङीन। गे ‘गो एको खिंम बाक्नुङ’ देंशो बाक्तीनी। मोपतीके इन गेय पाइब आं लोव़ नेनीन। जकरिया १२:४; प्रस्थान २:२४
30इन गेय पाइब नु इन मुर इस्राएलीम एको खिं गे कोव़शा पुंइतेक्म हना, मेको आन पुंइशो गेन। मेको आन लोव़ इर इन बाक्तीक रे नेनीन। मिनु गे मेको आन पुंइशो गेशा, माफ गेने।
31सुइ मुरुमी आ नेक्था ङा मुर आन पर्बम मरिम्शो पा कसम जपाइक्तु हना, मेकोम मेको कसम एको इन खिं ङा चढ़ेतीक आ ङोंइती जाप्तु हना,
32गे इर स्वर्गम मेको आन लोव़ नेंशा, निसाफ पने। मिनु दोस ताइब आ मरिम्शो पशो आ पियामी मोइक्तीन। मिनु ठीक पाइब कली दोस मताइब बाक्ब देंनीन। मोपा ठीक पाइब कली रिम्शो पाइब दुमीन।
33मिनु इन मुर, इस्राएलीपुकीमी पाप पशा आन जोरी सत्रु नु ब्रुशा, इन गे लेश्शा ‘गे आंइ परमप्रभु यावे बाक्नीनी’ दे एको इन खिं गे कोव़शा पुंइतेक्म हना,
34इर स्वर्ग रे मेको आन पुंइशो नेनीन। मिनु इन मुर इस्राएली आन पाप माफ गेन। मिनु मेको आन किकी पिपी आन कली गेशो रागीम लेश्शा चाक्कीन।
35मिनु इन मुरपुकीमी पाप पतीके सरीङ चोक्सीशा रेउ मयित हना, इन गेशो सजाइ तुइश्शा, ‘गे आंइ परमप्रभु यावे बाक्नीनी’ दे आन पशो पाप प्रोंइतेक्म हना, १राजा १७:१
36इर स्वर्ग रे मेको आन पुंइशो लोव़ नेंशा, इन गेय पाइब, इन मुर इस्राएली आन पाप माफ गेने। मेको आन पचा माल्शो शेंदीन। मिनु मेको आन कली गेशो रागीमी रेउ यिपतीन।
37मेको रागीम अन्काल दुम्त हना, मुर बेक्तीक रोइ जाक्त हना, बाली नाली सोव़तीक नु बुक्खी ङाइक्तीक रोइ जाक्त हना, सल्हा माले नु बुस्स जाक्तेक्म हना, मेको आन तेकोइ सहरम जोरी सत्रुम पुम्ताक्म हना, मारेइ श्येत नु मारेइ रोइ जाक्त हना,
38इन मुर इस्राएली सुइम आन थुंम श्येत जशा, एको इन खिं गे कोव़शा आन गुइ क्युक्शा पुन्मेनु, इन बाक्तीक इर स्वर्ग रे मेको आन पुंइशो नेनीन।
39गे मुर नेल्ल आन थुं तुइक्तीके, इन बाक्तीक स्वर्ग रे मेको आन लोव़ नेंशा, आन पशो कोव़शा माफ गेने। मारदे हना गे ला मुर नेल्ल आन थुं तुइक्ब बाक्नीनी। भजन संग्रह १३९:१-२
40मिनु मेकोपुकी इन कली मान पा हिंशा, आंइ किकी पिपी आन कली इन गेशो रागीम बाक्नीम।
41मिनु इन मुर इस्राएली ममाइ, तन्न अर्को रागी ङा मुर सुइमी इन कली तुइश्शा ङोन ङोन रागी रे जाक्तेक्म हना, गन्ती १५:१४-१६
42मेकोपुकीम इन ठेयब नें, इन ठेयब सक्ति नु इन वारच पतीके नेंशो बाक्तेक्म। मोदेंशो मुर जाक्शा, एको खिं गे कोव़शा पुंइतेक्म हना,
43गे मेको आन लोव़ इन बाक्तीक स्वर्ग रे नेंशा, मेको अर्को रागी ङा मुर आन पुंइशो नेल्ल गेने। मिनु इन मुर इस्राएली खोदेंशो पा रागी ङा मुर नेल्लेम इन नें तुइक्तमेक्ल। मिनु इन कली मान पा हिंमल। गे एको आं सेल्शो खिंम बाक्नीनी, दे तुइक्तमेक्ल।
44मिनु इन मुर आन जोरी सत्रु नु लडाइ पथ लाम्तेक्म हना, गे मेको आन कली तेइ सोइक्ताक्नी हना, मेकोपुकीम एको इन योव़शो सहर नु गोम इन कली सेल्शो एको खिं गे कोव़शा, पुंइतेक्म हना,
45गे स्वर्ग रे मेको आन पुंइशो नेनीन। मिनु मेको आन कली वारच पतीन।
46मेकोपुकीम पाप पाम्तेक्म हना, मारदे हना पाप मपाइब सुइ मबाक्नीम। मिनु गे इन गाइश्शोमी आन जोरी सत्रु आन गुइम गेतीनी। मिनु मेकोपुकीम मेको आन कली आन रागीम ग्याइश्शा लाइक्तेक्म हना, भजन संग्रह १४:३-४; रोमी ३:२३
47मिनु मेकोपुकीम आन कली ग्याइश्शा लाइश्शो रागीम श्येत जशा ‘गो पाप पाइतक। दूली पा काइ मरिम्शो पाइतक’ देंतेक्म हना, नेहेम्याह ९:३३; दानीएल ९:५
48मिनु मेको आन ग्याइश्शा लाइश्शो जोरी सत्रु आन रागीमी आन थुं नेल्लेम इन गे लेत्तेक्म हना, मेको आन किकी पिपी आन कली इन गेशो रागी नु इन योव़शो एको सहर नु इन नें कली मान पा आं सेल्शो खिं गे कोव़शा, इन कली पुंइतेक्म हना, दानीएल ६:११
49इन बाक्तीक इर स्वर्ग रे मेको आन पुंइशो लोव़ नेंशा, आन माल्शो गेन। मिनु मेको आन कली वारच पतीन।
50मिनु मेको इन मुर आन पाप नु हेंथे पशो नेल्ल माफ गेने। मिनु मेको आन जोरी सत्रुम शिशी पपतीन।
51मारदे हना मेकोपुकी इन खिं ङा मुर बाक्नीम। गे मेको आन कली शुश श्येत गेतीके इजीप्त रागी रे ग्रुंइशा चाक्तीनी।
52मिनु गे इन गेय पाइब नु इन मुर इस्राएली आन कली कोव़ङीन। मेको आन पुंइशो लोव़ गेना हना यो नेनीन। मिनु मेकोपुकीम इन कली ब्रेम्मानु, मेको आन ब्रेश्शो नेनीन।
53मारदे हना गे मेको आन कली इन मुर सेल्चा कली, रागी नेल्ल ङा मुर आन दाते रे योव़शा तिल्तीनी। मोपा आंइ किकी पिपी आन कली इजीप्त रे ग्रुंइशा चाक्नीनु, इन गेय पाइब मोसा कली मोदेंशो लोव़ पशो बाक्तीनी” देंमाक्त। प्रस्थान १९:५-६
54मोपा सोलोमनम परमप्रभु यावे कली प्रार्थना पा पुंइने थुमा बाक्त। मिनु मेको परमप्रभु यावे कली चढ़ेतीक आ ङोंइती रे बोक्माक्त। मेकेर सरीङ गे कोव़शा आ गुइ क्युक्शा आ पोक्च थेक्शा प्रार्थना पशो बाक्माक्त।