1पिप आ थुं परमप्रभु यावे आ गुइमी खोला ङा ब्वाक्कु खोदेंशो बाक्ब। दोथ गे लाइक्चा दाक्ता, मोथ गे लाइक्ब। भजन संग्रह ३३:१५
2मुरुमी आंम कली गेना हना यो “ठीक पाता” दे मिम्नीम। तन्न परमप्रभु यावेमी मुर आन थुं नाक्ब।
3परमप्रभु यावे आ ङोंइती मार मार चढ़ेचा क्येङा ठीक पतीके नु रिम्शो निसाफ पतीके आ दाक्शा ब्रतीक बाक्ब। १सामुएल १५:२२; होसे ६:६
4ठेयब लेश्शो नु बोरशो मुर दुम्चा, परमप्रभु यावे आ अरेशो मटीब आन छेङछेङ बाक्ब। मेको पाप बाक्ब।
5शुश गेय पाइब आन मिम्तीकेमी सोशा बोशा ग्येत्थ लां खोइक्पाइक्ब। तन्न रीब पा ममिम्थु गेय पाइब मुर प्रुङग दुम्ब।
6जोल पा शुश शोंप चेम्तीके फशेमी योल्शा जाम्शो कुन खोदेंशो बाक्ब। मोदेंशो पाइबपुकी साइक्चा पुंइसीनीम।
7परमप्रभु यावे आ अरेशो मटीब आन हुश ख्राक्श पोक्तीकेमी साइक्चा पुंइसीनीम। मारदे हना मेकोपुकीमी मार ठीक बाक्मे, मेको पचा मबित्नीम।
8दोस ताइब मुर आन लां हिरशो बाक्ब। दोस मताइब मुर आन पतीक चहिं ठीक बाक्ब।
9गेना हना यो जिचा पोक्ब मीश नु ठेयब खिंम बाक्चा क्येङा, तला ङा कुना कामी बाक्चा रिम्शो बाक्ब।
10परमप्रभु यावे आ अरेशो मटीबपुकीमी मरिम्शो ला पचा दाक्नीम। मेकोपुकीमी आन नेक्था ङा मुर आन कली यो शिशी मपाइनीम।
11शुक्शी पाइब कली सजाइ गेशोनु, मारेइ मजोक्ब मुर इच्का जोक्ब तुइक्ब दुम्नीम। मिनु जोक्ब तुइक्ब मुर आन कली शेंशोनु, आन जोक्तीके बारब। हितोपदेस १९:२५
12ठीक पाइबमी परमप्रभु यावे आ अरेशो मटीब मुर आन खिं कोव़ना कोव़न बाक्ब। मिनु परमप्रभुमी आ अरेशो मटीब आन कली खतम पोक्ब।
13सुमी प्रुङग आन पुंइशो मनेंबा, मेकोमी यो पुनानु, सुइमी यो मनेंनीम।
14ख्रुइश्शोमी मार मार गेशोनु, चुरब मुर यो मचुरनीम। मिनु वा आगामी ख्रुइश्शा गेशोमी ठेयब गाइक्तीक तेक्ब। १सामुएल २५:१८-३५
15निसाफ दुम्मेनु ठीक पाइब ग्येरसीनीम। तन्न मरिम्शो पाइबपुकी हिंनीम।
16सुइ मुर रुप्तीक लां प्रोंइतु हना, मेको बेक्शो मुर आन बाक्तीक लशा नाइक्ब।
17सुम आंम दाक्शो पना पन बाक्बा, मेको प्रुङग दुम्ब। सुमी अङगुर शांबु नु तेल दाक्बा, मेको मुर यो प्रुङग दुम्ब। हितोपदेस २३:२१
18ठीक पाइब आन पा ङा परमप्रभु यावे आ अरेशो मटीबपुकीम सजाइ ताइनीम। मिनु गेना हना यो रिम्शो पाइब आन पा ङा थमा सुइक्चा मपुंइसीब मुर सजाइ ताइनीम।
19शुश जिचा पोक्ब नु चुरब मीश नु बाक्चा क्येङा गोरशो रागीमी बाक्चा रिम्शो दुम्ब।
20जोक्ब तुइक्ब मुर आन खिंम शुश क्येट लाइब शोंप नु तेल बाक्ब। तन्न मूर्खमी आ बाक्शो नेल्ल थुम्ब।
21सु मुरुमी ठीक पतीके नु शिशी पतीके आ नोले खोइक्बा, मेको ब्रोंइशा, सोशा बोशा दुम्शा मान ताइब दुम्ब।
हितोपदेस 21
हितोपदेस 21:1-21