6मिनु मोसामी “गेपुकीमी परमप्रभु यावेमी अरेशो पचा माल्शो गेय एकोन बाक्ब। मिनु परमप्रभु यावे आ छेङछेङम इन कली तपांइसीब” देंत।
7मिनु मोसाम हारून कली “चढ़ेतीक आ नेक्था जाक्शा, इ पाप आ पर्बम चढ़ेतीक नु इ चोशा चढ़ेतीक चढ़ेवो। मिनु आंम इ पर्बम नु मुर आन पर्बम पाप क्याम्तीक गेय पावो। परमप्रभु यावेमी अरेशो खोदेंशो पा मुर आन चाक्शो चढ़ेतीक चढ़ेशा, मुर आन पर्बम पाप क्याम्तीक गेय पावो” देंत। लेवी १६:६,११,१५; हिब्रू ५:३; हिब्रू ७२७
8मिनु हारून चढ़ेतीक आ नेक्था जाक्शा, आ पाप आ पर्बम चढ़ेतीक बाछा क्योरतु।
9मिनु हारून आ तौपुकीमी मेको आ हुश चाक्तेक्म। मिनु मेकोमी आ ब्रेप्चो हुशेम ख्रुम्शा चढ़ेतीक आ ग्रोव़पुकीम ख्रेक्ताक्व। मिनु लीशो हुश कली चढ़ेतीक आ पुंम मोइक्तु।
10मिनु मेकोमी पाप आ पर्बम चढ़ेशो आ बोंसो, चिच नु आइदीम क्येप्शो बोंसो चढ़ेतीकेम चोप्तु। परमप्रभु यावेमी मोसा कली दोदेंशो पा अरेवा, मोदेंशो पा हारूनमी पाप्तु। लेवी ४:८-१२; लेवी ८:१४-१७