7गारचा आ पर्बम चढ़ेतीके पाप आ पर्बम चढ़ेतीक खोदेंशो बाक्ब। पतीक गेय यो कान बाक्ब। मिनु तेको चढ़ेबम मेको पाप क्याम्तीक गेय पवा, मेको मेको केन दुम्ब।
8मिनु तेको चढ़ेबमी मुर आन चाक्शो चोशा चढ़ेतीक चढ़ेबा, मेको चोशा चढ़ेशो आ कुशुल यो मेको केन दुम्ब। लेवी १:६
9मिनु चुप्लुम चोशो, दिउरेमी क्येशो नु तांवाम चोशो चढ़ेशो नेल्ले मेको चढ़ेब केन दुम्ब। लेवी २:४,५,७
10तन्न अरु अन्न चढ़ेतीके तेलम ब्वाइश्शो नु मब्वाइश्शो नेल्ल हारून नु आ तौ आन कली योक्चा कली बाक्ब। लेवी २:१-३
11मिनु परमप्रभु यावे कली दुशा बाक्चा आ पर्बम चढ़ेतीके दोपा चढ़ेचा माल्ब, दे अरेशो बाक्ब देंशा हना, लेवी ३:-
12सुइमी परमप्रभु यावे कली “गे रिम्शो पाइब बाक्नीनी” दे ठेयब सेल्शा चढ़ेप्तु हना, मेकोमी तेलम निशो बोरब ओख्ती मसुप्शो बटुक, बोरब ओख्ती मसुप्शो तेल ख्रेक्शो शोब्ले नु थम रिम्शो फस के सेल्शो तेल वोइश्शो शोब्ले चढ़ेचा माल्नीम। लेवी १९:५-८; लेवी २२:२९-३०
13मेकोमी “गे रिम्शो पाइब बाक्नीनी” दे ठेयब सेल्शा नु दुशा बाक्चा आ पर्बम चढ़ेशो नु बोरब ओख्ती सुप्शो शोब्ले यो चढ़ेचा माल्ब।
14मेकोमी चढ़ेशो शोब्ले नेल्ल रे का का पा परमप्रभु यावे कली क्युक्शा चढ़ेचा माल्ब। दुशा बाक्चा आ पर्बम चढ़ेतीके आ हुश तेको चढ़ेबम ब्रुइक्बा, मेको केन दुम्ब।
15“गे रिम्शो पाइब बाक्नीनी” दे ठेयब सेल्शा नु दुशा बाक्चा आ पर्बम चढ़ेशो श्ये मेको चढ़ेशो नाक्तीन नेक्चा माल्नीम। सुनी सम्म मारेइ हेंचा मदुम्ब।
16मेको चढ़ेशो कसम जशो आ पर्बम नु ग्येरशा चढ़ेशो बाक्त हना, मेको चढ़ेशो नाक्ती ब्वचा माल्नीम। आ लीशो आ दीसा ब्वचा दुम्ब।