18गे इन मुर आन कली क्येक्क मलेत्तीन। ईख मकुरीन। तन्न इन नेक्था ङा मुर कली आंम कली खोदेंशो पा दाक्तीन। गो परमप्रभु यावे नङ। २राजा ६:२२; २इतिहास २९:९-१५; मत्ती ५:४३-४८; मत्ती २२:३९; लूका १०:२५-३७; यूहन्ना १३:३४; रोमी १३:९; गलाती ५:१४; याकूब २:८
19गे आं फुल्लु मुशा ब्रेक्शो लोव़ पने। निक्शी खाल ङा जन्तु, बस्तु भाव आन कली मब्वाइक्तीन। इन रूमी निक्शी खाल ङा वांचेर मशोक्कीन। गेपुकीमी निक्शी खाल ङा श्येले ब्वाइश्शा प्रोव़शो वा मफेक्सीन। ब्यवस्था २२:९-११
20मिनु वोंइश मुर कामी वाइलीम दुम्शो मीश आल नु इप्त हना, मेको मीश आल चहिं अरु वोंइश मुर कली गेचा चिक्शो बाक्त हना, तन्न मग्याप्थु, मप्रोंइथु बाक्त हना, मेको वोंइश मुर कली खोदील निदील पचा माल्नीम। मेको आस कली साइक्चा मदुम्ब। मारदे हना मेको मीश आल मप्रोंइशो बाक्त। प्रस्थान २१:७-११
21तन्न मेको वोंइश मुरुमी परमप्रभु यावे आ ङोंइती ग्रुम्तीक ताम्बु आ ओव़तीकेम आ दोस आ पर्बम सांड का चढ़ेचा माल्ब।
22मिनु चढ़ेबमी मेको आ दोस आ पर्बम सांड चढ़ेशा परमप्रभु यावे आ ङोंइती पाप क्याम्तीक गेय पचा माल्ब। मोपा मेको आ पाप क्याम्सीशा माफ ताइब दुम्ब। लेवी ५:१७-१८