2ग्युंबे पशो मीश मुर आ वोंइश मबेक्म सम्म कानुनमी आस नाता लीब। आ वोंइश बेक्त हना, आस नाता मलीब। १कोरिन्थी ७:३९
3आ वोंइश मबेक्थु, अर्को वोंइश खोइश्शा लत हना, मेकोम आस नाता ख्रोइक्ब। तन्न आ वोंइश बेक्शा नोले अर्को वोंइश खोइक्तु हना, मेको मीश अरेशो लोव़ रे मारेइ दोस गेचा मपुंइसीब, मारदे हना मेको आ वोंइश बेक्ने थुम्शो बाक्ब।
4आं लोक्बपुकी, येसु ख्रीस्त बेक्शोमी परमप्रभु यावे आ अरेशो लोव़ टिने मचाम्सीब देंतीक थुं बेक्त, दे रुपीन। मुल बेक्शो रे सेंचा पुंइसीशो ख्रीस्त नु काथा दुम्शा, इन पशो रे पा परमप्रभु यावे कली गेय पाइनय।
5गो येसु ख्रीस्त रे ङोन बाक्यानु, परमप्रभु यावे आ अरेशो लोव़ रे पा पाप तुइश्शा यो पाप आ ग्रांग्रा दिशोमी ब्रीशा शुश मरिम्शो पाइतय। मेको आ गाल्च बेक्तीक बाक्ब। रोमी ६:२१
6तन्न मुल गो अरेशो लोव़ रे ब्रोंइशा बाक्नय। मारदे हना गो मरिम्शो पतीक आ ग्याइश्शो रे बेक्तय। मुल गो येसु ख्रीस्त आ सोक्त रे पा नक गेय पाइनय। अरेशो ब्रेक्शो लोव़ प्रोंइने थुम्तय। रोमी ८:१-२; रोमी ६:२-४
7मिनु मुल मार देंय देंशा हना, परमप्रभु यावे आ अरेशो लोव़मी पाप बाक्बा? मो देंशो ममिम्चा। परमप्रभु यावे आ अरेशो लोव़ मपढेङा सम्म गो पाप मतुइक्तु। परमप्रभु यावे आ अरेशो लोव़मी “मुर आन मार मार तशा मवलो” दे मब्रेक्शो हना, वाल्चा आ पर्बम गो मारेइ मतुइक्तु वा। प्रस्थान २०:१७
8मिनु पापम ब्रीशो आं थुंमी शुश वाल्पाइक्ती। परमप्रभु यावे आ अरेशो लोव़ मबाक्शो हना, पाप मग्रू वा, मेको बेक्त। रोमी ५:१३; १कोरिन्थी १५:५६
9अरेशो लोव़ मपढेशो नङ हना यो, पाप मतुइक्तु वा। तन्न मेको लोव़ तुइक्तु रे आं थुंमी पाप बोक्त। मिनु बेक्ती।
10परमप्रभु यावे आ अरेशो लोव़ ब्रोंइचा कली बाक्त हना यो, मेको लोव़मीन बेक्ब सेल्ती। लेवी १८:५; याकूब १:१५
रोमी 7
रोमी 7:2-10