14मारदे हना अर्को रागी ङा मुर आन कली थमा सुइश्शो तशा, आं जात ङा मुर का निक्शीमी यो रुश पा थमा सुइक्नीमी कों, दे आस पा बाक्ती।” १कोरिन्थी ९:२०-२२; १तिमोथी ४:१६
15परमप्रभु यावेमी मुल इस्राएली आन कली मकोव़थु, अर्को रागी ङा मुर आन कली शिशी पा ब्रशा, नोले यहूदी आन कली यो ब्रवानु, शुश रिम्शो मदुम्बा ङा? एको दा बेक्शो रे सेंसीशो खोदेंशो ठेयब दुम्ब।
16निशो फस रे ङोंइती ङा शोब्ले परमप्रभु यावे के दुम्त हना, नेल्ल निशो फस रिम्शो दुम्ब। शाक्श रिम्शो बाक्त हना, राशी नेल्ल यो रिम्शो दुम्नीम। गन्ती १५:२०
17रिम्शो तेल रवा खोदेंशो इस्राएल रे राशी का निक्शी क्योरशा ग्रुंइशो बाक्तेक्म हना, गे रागी रागी ङा मुर ब्वाकी ङा तेल रवा खोदेंशो पा, मेको रवामी इन राशी क्येप्चा पुंइसाक्नी हना, गे मेको रवा आ शाक्श रे ताइनीनी। मेको मप्रेंदीन। एफिसी २:११-१४
18मो हना यो क्योरशा ताइश्शो राशी, दे मेको आन कली “गो इन क्येङा ठेयब दुम्तक” दे ठेयब लेश्शो लोव़ मपने। मारदे हना गेपुकी यो राशीन ननी। राशीमी शाक्श कली मतिक्ब। शाक्शम राशी कली तिक्ब, दे तुइक्तीने। यूहन्ना ४:२२
19गेपुकीमी “मेको क्योरशा ताइश्शो राशी आ पा ङा गो दुम्तय” देंतीनी।
20इन देंशो ठीक बाक्ब। मेकोपुकीमी थमा मसुदेम। मिनु परमप्रभु यावेमी मेको आन कली क्योरशा ताइक्ताक्व। इन थमा सुइश्शो तशा इन कली चहिं रिम्शो फल रवाम केप्शो खोदेंशो पा आ मुर सेल्तु। काइ ठेयब मलेत्थु, परमप्रभु यावे कली मान पा हिंशा बाक्कीन। १कोरिन्थी १०:१२
21परमप्रभु यावेमी ङोंइती ङा राशी आन कली क्योरशा ताइक्ताक्व हना, मार, गे नोले केप्शो राशी इन कली मताइक्बा ङा?
22परमप्रभु यावेमी दोदेंशो शिशी पाइबा, दोदेंशो सजाइ गेबा, दे रुपीन। साइ ङोंइती रे ङा आ लोव़ थमा मसुइक्थु मटीब आन कली ख्रोइश्शा ताइक्ताक्व। आ लोव़ मटिथु, थमा सुइक्चा प्रोंइतीनी हना, इन कली यो ख्रोइश्शा ताइक्ब, दे तुइक्तीन। गे परमप्रभु यावे कली दाक्शा, थमा सुइक्चा मप्रोंइतीनी हना ला, इन कली यो दाक्चा मप्रोंइब। यूहन्ना १५:२-४; हिब्रू ३:१४
23मेको क्योरशा ताइश्शो राशी खोदेंशो दुम्शो यहूदीपुकीमी आन थुं परमप्रभु यावे गे लेश्शा, थमा सुइक्तेक्म हना, रिम्शो फल रवाम लेंशा केप्शो खोदेंशो पा आ मुर सेल्ने चाप्ब।