11मिनु गो सामरीया नु आ मूर्ति आन कली दोदेंशो पङा, मोदेंशो यरूसलेम नु आ मूर्ति आन कली मपाइनुङा ङा?” देंत।
12मिनु परमप्रभुमी सियोन डांडा नु यरूसलेमम पशो गेय थुमा नोले मेकोमी अस्सुर ङा ठेयब लेश्शो नु बोरशो पिप कली सजाइ गेब। यसैया ३७:३६
13मारदे हना मेकोमी “गो आं सक्तिमी पाता। गो आं तुइक्तीके नु रुप्तीक थुंमी मोदेंशो पाता। गो रागी रागी ङा सांद याक्ताक्ङ। मेकेर ङा मुर आन शोंप नु मारेइ मारेइ रोइक्ताक्ङ। गो आं ठेयब सक्तिमी मेको आन पिप आन कली लुक्च सोइक्ताक्ङमी।
14मिनु गो प्रोंइशो चिक्ब आन ग्योव़ खोदेंशो पा बाक्तीक नु मुर आन शोंप थित्ता। गो चिक्बीम प्रोंइशो ब्वोफु खुप्शो खोदेंशो पा, रागी रागी कली खुप्ताक्ङ। मिनु फ्रां हिक्शा, तेक्ब सुइ मबाक्म। मिनु सुइम मारेइ मदेंम” देंत।
15खा क्येङा खा चलेब ठेयब बाक्बा ङा?। आरा क्येङा आरा कीब ठेयब बाक्बा ङा?। मोदेंशो मदुम्त हना कोक्केमी कोक्के गुप्ब कली याम्पाइक्बा ङा?। मिनु शीमी शी कली गुप्ने चाप्बा ङा?। यसैया १०:५
16मोपतीके परमप्रभु, मुर नेल्ल आन परमप्रभु यावेमी अस्सुर ङा दोम्शो लडाइ पाइब मुर आन कली बेक्तीक रोइ सोइक्नुङ। मिनु मेको आन रां चोशो खोदेंशो पा जेश्शा नुप्ब।
17मिनु इस्राएली आन छेङछेङ मी दुम्ब। मिनु आन का ला बाक्शो परमप्रभु नाप्पाइक्ब दुम्ब। मिनु मेकोमी आन चू नु चोंक काबुमी नेक्पाइक्ब। ब्यवस्था ४:२४
18मिनु ब्वाकी ङा दारस नु फल फुल नेल्ले मुर खोदेंशो पा सोव़ना सोव़न लाइनीम। मेको आन रां नु थुं निम्फा खतम दुम्नीम। रोइ पाइब मुर ओंखां पा बेक्शा लशो खोदेंशो पा बेक्शा लाइनीम।
19मिनु मेको आ ब्वाकी ङा लीशो रवा शुश मबाक्नीम। मेको आल कामी यो हिक्शा ब्रेक्ने चाप्ब।
20मिनु मेको नाक्ती इस्राएल ङा लीशो मुरपुकी नु याकूब आ खिं ङा प्रोक्शा ब्रोंइशो मुरपुकी लेंशा, आंम कली तुप्ब गे मलाइनीम। तन्न मेकोपुकी थमा पा परमप्रभु यावे, इस्राएली आन का ला बाक्शो परमप्रभु आ नोले खोइक्नीम। यसैया ६:१३; यसैया ७:३
21मिनु का निक्शी याकूब आ मुरपुकी सक्ति पाइश्शो परमप्रभु गे लेत्नीम।
22इन इस्राएल ङा मुर समुन्द्र ङा बाल्वा खोदेंशो पा शुश बाक्तेक्म हना यो, का निक्शी ला लेत्नीम। अरु चहिं नेल्ल साइक्चा पुंइसीनीम। मिनु ठीक पतीक ठेयब दुम्ब। रोमी ९:२७
23मारदे हना परमप्रभु, मुर नेल्ल आन परमप्रभु यावेमी ङोंइती आ देंशो खोदेंशो पा रागी नेल्ल खतम सेल्ब। यसैया २८:२७
24मोपतीके परमप्रभु, मुर नेल्ल आन परमप्रभु यावेमी “सियोनम बाक्ब, आं मुरपुकी अस्सुर ङा मुर क्येङा महिनीन। इन कली इजीप्तम खोदेंशो पा कोक्केम तुप्तेक्म हना यो, महिनीन।
25मारदे हना इच्का नोले इन पर्बम आं गाइश्शो नुप्ब। मिनु अस्सुर ङा मुर आन कली गाइश्शा साइक्नुङमी” देंत।
26मुर नेल्ल आन परमप्रभु यावेमी मेको आन कली कोर्राम युक्ब। मेको ओरेब ङा सेरथे फुल्लु आ नेक्था ङा लडाइम मिदयान कली फ्रुशो खोदेंशो दुम्ब। मेकोम इजीप्तम खोदेंशो पा आ कोक्के समुन्द्र तार दिंब। न्यायाधीस ७:२५; भजन संग्रह ८३:१०; प्रस्थान १४:२६-२७
27मेना इन कली गेशो श्येत नुप्ब। मिनु इन शुर ङा जुवा दोक्शा जिक्ब।
28इन जोरी सत्रु रिम्मोन रे जाक्शो आइयाथम जाक्दीत्तेक्म। मिग्रोन लशा, मिकमाश सहरम आन मार मार वोइक्नीम।
29मिनु डांडा रे पा लशा, गिबाम बास बाक्नीम। रामाह हिंशा ख्रिंख्रि पाइब। सावल आ सहर गेबा ङा मुर प्रोक्नीम।
30गाल्लीम ङा तमीपुकी ठेयब सेंदा पा ग्रीङीन। गे लाइशाह ङा मुर नेनीन। अनाथोथ ङा मुर मेको आन कली लोव़ लेत्तीन। १सामुएल २५:४४
31मादमेनाह नु गेबीम ङा मुर ब्रोंइचा कली प्रोक्नीम।
32मेकोपुकी मुलाक्ती नोबम बाक्नीम। मिनु मेकोपुकीमी सियोन डांडा ङा तमी नु यरूसलेम आ डांडा गे आन गुइ क्युक्शा, हिंच कोंइनीम। १सामुएल २१:२
यसैया 10
यसैया 10:11-32