3न्हङगरदङ ङनी सीदोन भिबा ग्लारी धोखजी। ओच्छे युलियससे दया लसी पावलदा थेला ह्रोगदे मुबा ग्लारी निसी तोःतेबा स्हेगदे किन्पुङ्जी।
4थेग्याम दोःसी ङनी मुबा पानी जहाज निजी, ओच्छे पानी जहाजला ङाच्छापट्टिग्याम लाबा खबासे लमा ङनी समुन्द्रला गुङरी मुबा साइप्रस भिबा ग्लाला भर लसी कुनीग्याम तबान निजी।
5जमाहेन्से किलिकियादेन पामफिलिया भिबा ग्लाला क्याम्सङपट्टिला समुन्द्ररी धोखमाहेन्से ङनी लुकिया भिबा ग्लाला माइरा भिबा शहररी धोखजी।
6थेरी कप्तान युलियससे अलेक्जेन्ड्रिया भिबा शहरग्याम इटालिया भिबा य्हुल्सारी निबा पानी जहाज गिक स्याप्जी। ओच्छे ङनी थे पानी जहाजरी क्रेःसी निजी।
7ल्हानान धिनधोना दुख नासी ङनी गोल्से गोल्से लसी क्नीडस भिबा ग्लारी धोखजी। तर लाबासे अझ ङन्दा ङाच्छा निआपुङ्बासे लमा क्रेट भिबा गङला भर लसी कुनीग्याम तबान सालमोने भिबा ग्लारी निजी।
8ल्हानान दुखसे ङनी थे ग्लाला कुनीग्याम पानी जहाज थान्बा जेबा भिबा ग्लारी खजी। थे ग्लाग्याम लासिया भिबा शहर ङामरीन मुबा।
9समुन्द्रग्याम निबारी ल्हानान लोङ्बा खबा धुइ तबासे लमा ङनी ल्हानान धिनधोना थेरीन चिजी, ओच्छे फोइथान चिसी प्रार्थना लबा धिनएनोन निसी जिन्बासे लमा पावलसे थेनीगदेदा चुह्रङ् भिसी सल्लाह पिन्जी।