12जमाहेन्से न्हङगरदङ स्य्होरी यहूदीगदे ह्रुप तसी पावलदा जाल लसी साइबारी सल्लाह लजी। ओच्छे पावलदा आसाइतेधोना तिगै चबा थुङ्बा आल भिसी घ्रान फाजी।
13चुह्रङ् लसी जाल लबा म्हिगदे बोगल न्ही भन्दा ल्हानान मुबा।
14थेनीगदे परमेश्वरला मन्दिररी पूजा लबा मुल म्हिगदेदेन यहूदी गन्बागदे मुबा ग्लारी निसी चुह्रङ् भिसी भिजी, “ङन्से पावलदा आसाइतेधोना तिगै आच भिसी घ्रान फाबा मुला।
15थेतबासेलमा ह्राङनीदेन अदालत ढिक्सी सिपाहीगदेला हाकिमदा चुह्रङ् भिसी पाङ्गो, चुला मुद्दाला बारेरी अझ ज्यना लसी छिनब लतोःला भिबा स्होसी थेदा तेःसी भउ। ओच्छे थे चुरी खना खनान ङन्से थेदा ग्यामरीन साइला।”
16तर पावलला कोनसे चुह्रङ्बा जाल लबा था याङ्सी ब्यारेक न्हङरी निसी पावलदा पाङ्सी पिन्जी।
17जमाहेन्से पावलसे कप्तानगदे न्हङला गिकदा ङ्योइसी, “चु भ्योन म्हिदा सिपाहीगदेला हाकिम मुबा ग्लारी ससी पिन्गो। तिग्दा भिसम चुसे थेदा पाङ्तोःबा ताम मुला” भिसी भिजी।
18थेतबासेलमा कप्तानसे थेदा सिपाहीगदेला हाकिम मुबा ग्लारी भोर्सी, “झ्याल्खानरी मुबा पावलसे ङादा ङ्योइसी चु भ्योन म्हिदा ह्राङ मुबा ग्लारी भोर्गो भिसी पाङ्जी। तिग्दा भिसम चुसे ह्राङदेन छ्याम तिगै ताम पाङ्बा सेम मुला रो” भिसी भिजी।