3गे “गो आं योव़शो नु कबल पाता। आं गेय पाइब दाऊद नु कसम जाता। मार कसम जाता देंशा हना, यसैया ५५:३; भजन संग्रह १३२:११
4गो गेना हना यो इ चच युइ रे पिप का सेल्नुङ। मिनु इ पिप दुम्तीके नेल्ल आन पाला सम्म लीपाइक्नुङ” देंतीनी। ठेयब सेंदा पा।२सामुएल ७:१६; प्रेरित २:३०
5परमप्रभु यावे, स्वर्गम बाक्ब नेल्लेमी इन छक लाक्चा ङा गेय आ पर्बम इन कली ठेयब सेल्नीम। इन मुर आन ग्रुम्तीकेमी इन दाक्शा गेनायो मप्रोंइतीके आ पर्बम इन कली ठेयब सेल्नीम।
6सरीङमी परमप्रभु यावे कली सु नु थाप्ने चाम्सीबा ङा? मिनु स्वर्गम बाक्ब आन दातेमी सु परमप्रभु यावे खोदेंशो बाक्बा ङा? १राजा २२:१९
7आंम मुर आन बुक्तीकेमी परमप्रभु कली मान पा हिंनीम। मेको आ एर ओंथ बाक्ब नेल्ल आन क्येङा मेको शुश ठेयब नु मान पा हिंचा माल्शो बाक्ब।
8परमप्रभु यावे, मुर नेल्ल आन परमप्रभु, इन खोदेंशो ठेयब सक्ति पाइश्शो सु बाक्बा ङा? इन दाक्शा मप्रोंइतीके इन एर ओंथ बाक्ब।
9गे बारशो समुन्द्र कली हुकुम पाइनीनी। मिनु मेको आन छाल बोक्मेनु गे नाइक्पाइक्नीनी। भजन संग्रह ६५:८; मत्ती ८:२६
10गे राहाब कली बेक्शो जन्तु खोदेंशो पा साइक्तीनी। इन जोरी सत्रु आन कली इन सक्तिमी एर ओंथ ब्रपाइक्तीनी। इजीप्त रागी कली राहाब यो देंनीम। भजन संग्रह ८७:४अय्युब ९:१३; अय्युब २६:१२; यसैया ३०:७; यसैया ५१:९
11सरीङ नु रागी निम्फा इन के बाक्नीस। रागी नु मेकेर बाक्शो नेल्ल इन सेल्शो बाक्नीम। भजन संग्रह २४:१
12उत्तर नु दक्खिन इन सेल्शो बाक्नीस। ताबोर नु हेरमोन इन नेंम ग्येरशा कुम्सो पाइनीस।
13गे सक्ति पाइश्शो बाक्नीनी। गे बोल्यो नु ठेयब बाक्नीनी।
14ठीक पतीक नु कुल मकोव़थु निसाफ पतीके इन राज्य ङा सक्ति बाक्ब। इन दाक्शा गेनायो मप्रोंइतीके इन ङोंइती बाक्ब।
15इन कली ग्येरशा ठेयब सेल्बपुकी ग्येरसीशो मुर बाक्नीम। मारदे हना मेकोपुकी, परमप्रभु यावे, इन ङोंइती ङा छेङछेङमी गाक्नीम।
16मेकोपुकी नाक्त रे इन नेंमी ग्येरसीनीम। मिनु इन ठीक पतीकेमी थुं नाइश्शा बाक्नीम।
17मारदे हना गे मेको आन सक्ति गेब बाक्नीनी। मिनु गो इन शिशीमी आंइ पिया पोक्शो बाक्नीकी।
18आंइ तेक्तीके, आंइ पिप इस्राएल ङा परमप्रभु यावे केन बाक्ब।
19साइ ङोंइती गे इन कली मप्रोंइब मुर आन कली कोंइतीक कोंइशा, लोव़ पाइतीनी। मिनु गे “गो लडाइ पाइब का कली सक्ति गेता। गो मुर आन दाते रे का कली ठेयब सेल्ता। १सामुएल १३:१४; १सामुएल १६:१३
20गो आं गेय पाइब, दाऊद कली थित्ता। गो मेको तारी तेल लुक्ताक्ङ।
भजन संग्रह 89
भजन संग्रह 89:3-20