11गे आंइ कली क्योरचा पुंइसीब भेडा खोदेंशो पा प्रोंइतीनी। मिनु आंइ कली रागी रागीम ब्रपाइक्तीनी।
12गे इन मुर आन कली मोशा लेयतीनी। मिनु मेको आन कली लेयशा, मारेइ ताक्चा थुं मपनी।
13आंइ नेक्था ङा मुर आन ङोंइती आंइ कली गाइश्शा, शुक्शी पाइक्चा पुंइसीब सेल्तीनी। गे मुर आन कली आंइ पर्बम तोक्शो नु मरिम्शो लोव़ पपाइक्तीनी। १कोरिन्थी १५:३१; रोमी ८:३६; भजन संग्रह ७९:४; १राजा ९:७
14गे आंइ कली रागी रागी ङा मुर आन दातेम शुक्शी पाइक्चा पुंइसीब सेल्तीनी। मुरपुकीमी आंइ कली तशा, आन पिया हिम्नीम।
15गो नाक्त किंत किंत मुने दोक्नुङ। आं मुनेमी आं कुल सुम्सीशो बाक्नुङ।
16आं कली शुक्शी पाइब, मरिम्शो लोव़ पाइब, जोरी सत्रुमी पतीके नु क्येक्क लेप्ब आन पतीके मोदेंशो दुम्शो बाक्नुङ।
17मोदेंशो दुम्त हना यो, गो इन कली मप्रेंदक। मिनु इन कबल यो मप्रोंइक।
18गो नोले मशोंइसक। इन लां रे ग्येत्थ लुक्च मपक।
19तन्न गे आंइ कली फस पोक्शा, सिवार आन बाक्तीक खोदेंशो पा छिङछिङमी सुम्तीनी।
20गो आंइ परमप्रभु आ नें प्रेंशो नकी नु अरु देवी देवता आन कली पूजा पशो नकी हना,
21मार, परमप्रभुमी मतुइक्बा ङा? मारदे हना परमप्रभुमी मुर आन थुं ङा ख्रुइश्शो नेल्ल तुइक्ब।
22मो हना यो गो इन पर्बम नाक्त रे साइक्चा पुंइसीनीकी। मिनु क्योरचा चिक्शो भेडा खोदेंशो पा हिक्सीशो बाक्नीकी। १कोरिन्थी १५:३१; रोमी ८:३६
23बोक्कीन, परमप्रभु, गे मारदे इप्नीनी? सेंसीने। आंइ कली मो पा मप्रोनीने।
24गे मारदे इन कुल ख्रुइक्नीनी? मिनु आंइ श्येत नु आंइ कली दिप्शो प्रेंनीनी?
25आंइ थुं लुक्च लशो बाक्ब। आंइ रां खपीम गोल्शो बाक्ब।
26बोक्कीन। मिनु आंइ कली वारच पने। इन गेना हना यो दाक्तीकेमी आंइ कली एको श्येत रे प्रोंइकी।
भजन संग्रह 44
भजन संग्रह 44:11-26