1कुम्सो पपाइक्ब कली दाऊद आ कुम्सो। परमप्रभु यावे, गे आं कली नाक्शा तुइश्शो बाक्नीनी। भजन संग्रह ७:१०; येरमीया १७:१०
2गे आं निश्शो बोक्शो तुइश्शो बाक्नीनी। आं मिम्शो नेल्ल तुइक्नीनी।
3गे आं गाक्शो इप्शो थमा पा तुइक्नीनी। आं पशो नेल्ल गे तुइश्शो बाक्नीनी।
4परमप्रभु यावे, गे आं ब्वाक्चा क्येङा ङोंइती आं लोव़ नेल्ल तुइक्नीनी।
5गे आं एर ओंथ नेल्ल बाक्शा, इन गुइ आं तार वोइक्तीनी।
6मेको तुइक्तीके आं कली थम ठेयब बाक्ब। मिनु गो मेको रुप्ने मचाप्नुङ।
7मिनु गो इन सोक्त क्येङा ते लशा ख्रुइक्ने चाप्नुङा ङा? गो इन ङोंइती रे ते प्रोक्ने चाप्नुङा ङा?