Text copied!
CopyCompare
परमप्रभु यावे आ लोव़ - भजन संग्रह - भजन संग्रह 119

भजन संग्रह 119:69-176

Help us?
Click on verse(s) to share them!
69ठेयब लेश्‍शो मुरपुकीमी आं पर्बमी जोल पाइनीम। गो चहिं आं थुं नेल्‍लेमी इन ब्रेक्‍शा अरेशो लोव़ पना पन बाक्‍नुङ।
70मेको आन थुं थांइशो बाक्‍ब। तन्‍न गो इन अरेशो लोव़ तुइश्‍शा ग्‍येरसीशो बाक्‍नुङ।
71गे आं कली श्‍येत जपाइक्‍तीनी, मेको रिम्‍शो बाक्‍त। मोपा इन फुल्‍लुम मुशा ब्रेक्‍शो लोव़ शेंसाक्‍यी।
72मिनु हजार हजार टुक्रा सुन चांदी क्‍येङा इन अरेशो लोव़ आं कली रिम्‍शो बाक्‍ब।
73गे आं कली सेल्‍तीनी। मिनु इन शेंशो लोव़ शेंसीचा कली रुप्‍तीक थुं गेयीनी।
74इन कली मान पा हिंबपुकी आं कली तशा ग्‍येरसीनीम। मारदे हना गो इन लोव़ ङा लां कोव़ना कोव़न बाक्‍नुङ।
75परमप्रभु यावे, इन निसाफ पतीके ठीक बाक्‍नीम। गो मेको तुइक्‍नुङ। गे आं कली इन दाक्‍शा मप्रोंइतीकेमी श्‍येत गेतीनी।
76इन गेय पाइब, आं कली इन गेना हना यो दाक्‍तीकेमी इन थोक्‍शा पशो लोव़ खोदेंशो पा लेम्‍दीनी।
77गे आं कली शिशी पाइतीनी हना, गो ब्रोंइनुङ। मारदे हना इन अरेशो लोव़ तुइश्‍शा, ग्‍येरसाक्‍यी।
78ठेयब लेश्‍शो मुर मुने दोक्‍मल। मारदे हना मेकोपुकीमी आं कली मो दिम्‍ताक्‍यीमी। गो चहिं इन अरेशा ब्रेक्‍शो लोव़ मिम्‍ना मिम्‍न बाक्‍नुङ।
79इन कली मान पा हिंब आं नेक्‍था जाक्‍मल। मोपा इन देंशो लोव़ रुप्‍मेक्‍ल।
80गो इन फुल्‍लुम मुशा ब्रेक्‍शो लोव़ पशा दोस मतङल। मोपा मुने मदोक्‍ङ‍ल।
81गो आं श्‍येतम इन प्रोंइतीक शुश माल्‍‍नुङ। मिनु गो इन लोव़ ङा लां कोव़ना कोव़न बाक्‍नुङ।
82गो इन थोक्‍शा पशो लोव़ शुश रिम्‍ना रिम्‍न बाक्‍नुङ। मिनु “आं कली गेना लेम्‍नीनी?” दे हिल्‍लो पाइनुङ।
83मारदे हना गो कुनम वोइश्‍शो कुशुल के थैलो खोदेंशो बाक्‍नुङ। मो हना यो गो इन फुल्‍लुम मुशा ब्रेक्‍शो लोव़ मप्रेंदु।
84गो, इन गेय पाइब, दोशो सम्‍म फाल्‍चा माल्‍नुङा? गे आं कली खेदा पाइब आन कली गेना निसाफ पाइनीनी?
85ठेयब लेश्‍शोपुकीमी आं कली खाल्‍टा दोम्‍तेक्‍म। मेकोपुकी इन अरेशो काइ मपाइब बाक्‍नीम।
86इन शेंतीके नेल्‍ले गेना हना यो लीनीम। मिनु मेकोपुकीमी आं कली मोशा खेदा पाइनीम। आं कली वारच पाइय्‍यीनी।
87मेकोपुकीमी आं कली रागी रे हेररा क्‍याम्‍ताक्‍यीमी। गो चहिं इन ब्रेक्‍शा अरेशो लोव़ मप्रोनु।
88इन गेना हना यो दाक्‍तीकेमी ब्रोंइपाइय्‍यीनी। मोपा गो इन देंशो टिना टिन बाक्‍नुङ।
89परमप्रभु यावे गेना हना यो बाक्‍ब। इन लोव़ स्‍वर्गम वोइश्‍शो बाक्‍ब। यसैया ४०:८
90इन मुर आन कली दाक्‍शा मप्रोंइतीके पाला पाला सम्‍म लीब। गे रागी सेल्‍शा वोइक्‍तीनी। मिनु मेको महिम्‍सीब।
91इन लोव़ पतीकेमी मेको महिम्‍सीब। मारदे हना नेल्‍लेमी इन लोव़ टीनीम।
92इन अरेशो लोव़म आं कली मग्‍येरपाइश्‍शो हना, गो आं श्‍येतम बेक्‍ङ वा। येरमीया १५:१६
93गो इन अरेशा ब्रेक्‍शो लोव़ गेनायो मप्रेंनुङ। मारदे हना गे मेको आ पतीकेमी आं कली ब्रोंइपाइक्‍तीनी।
94गो इन मुर नङ। आं कली प्रोंइयीनी। मारदे हना गो इन ब्रेक्‍शा अरेशो लोव़ माल्‍ता।
95इन अरेशो लोव़ मटीबपुकीमी आं कली साइक्‍चा कली बाप्‍शो बाक्‍नीमी। गो चहिं इन देंशो मिम्‍शा बाक्‍नुङ।
96मुरुमी नेल्‍ल क्‍येङा रिम्‍शो मारेइ सेल्‍ने मचाप्‍नीम। गो मेको तुइक्‍नुङ। तन्‍न इन शेंशो लोव़ नेल्‍ल क्‍येङा रिम्‍शो बाक्‍ब।
97गो इन अरेशो लोव़ शुश दाक्‍नुङ। गो नाक्‍त किंत किंत मेको आ पर्बम मिम्‍नुङ। भजन संग्रह १:२
98गे इन शेंशो लोव़म आं जोरी सत्रु आन क्‍येङा आं कली तुइक्‍ब सेल्‍ब। मारदे हना मेको गेना हना यो गो नु बाक्‍ब।
99मिनु आं कली शेंब आन क्‍येङा गो जोक्‍ब तुइक्‍ब दुम्‍ती। मारदे हना इन देंशो मिम्‍ना मिम्‍न बाक्‍ती।
100गो खाल्‍पा आन क्‍येङा यो जोक्‍ब तुइक्‍ब दुम्‍‍ती। मारदे हना इन ब्रेक्‍शा अरेशो लोव़ टिना टिन बाक्‍नुङ।
101गो इन लोव़ टिचा कली मरिम्‍शो लां मखोइक्‍थु बाक्‍नुङ।
102गो इन देंशो पतीक लोव़ रे ङोन मलङ। मारदे हना गे आं कली शेंताक्‍यीनी।
103इन देंशो लोव़ ब्रोव़शो बाक्‍ब। मेको खुदो क्‍येङा यो जिजी बाक्‍ब।
104इन ब्रेक्‍शा अरेशो लोव़ रे रुप्‍ब दुम्‍ती। मोपतीके गो दूली पतीक नेल्‍ल काइ मदाक्‍नुङ। भजन संग्रह ११९:२९
105इन लोव़ आं खोइली कली छेङछेङ बाक्‍ब, आं लां तचा कली रांको खोदेंशो बाक्‍ब। २पत्रुस १:१९
106गो इन निसाफ पतीक लोव़ पाइनुङ, दे कसम जशा खाप्‍ता।
107परमप्रभु यावे, गो शुश श्‍येत जाइनुङ, इन लोव़म देंशो खोदेंशो पा आं कली ब्रोंइचा गेयीनी।
108परमप्रभु यावे, गो इन कली ठेयब सेल्‍शो, चढ़ेतीक खोदेंशो पा ब्रने। मिनु आं कली इन पतीक लोव़ शेंदीनी। भजन संग्रह १९:१५
109गो गेना हना यो बेक्‍चा चिक्‍शा बाक्‍ती। मो हना यो गो इन अरेशो लोव़ मप्रेंनुङ।
110इन अरेशो लोव़ मटीबपुकीमी आं कली ब्‍वारद दाइश्‍शो बाक्‍नीम। मो हना यो इन ब्रेक्‍शा अरेशो लोव़ मप्रोंइनुङ।
111इन देंशो लोव़ गेना हना यो आं शोंप बाक्‍ब। मारदे हना मेकोमी आं थुं शुश ग्‍येरपाइक्‍ब।
112गो इन फुल्‍लुम मुशा ब्रेक्‍शो लोव़ मबेक्ङा सम्‍म पाइनुङ, दे आं थुं फ्रेंशा बाक्‍ती।
113गो थुं निक्‍शी पाइश्‍शो मुर आन कली काइ मदाक्‍नुङ। मिनु इन अरेशो लोव़ दाक्‍नुङ। भजन संग्रह ३१:७; १राजा १८:२१
114गे आं ख्रुइक्‍तीक नु तेक्‍तीक बाक्‍नीनी। गो इन लोव़ ङा लां कोव़ना कोव़न बाक्‍नुङ।
115गो आं परमप्रभु आ शेंतीके पने चबुल, गे मरिम्‍शो पाइबपुकी, आं क्‍येङा ङोन लने।।
116इन थोक्‍शा पशो लोव़ खोदेंशो पा आं कली ब्रोंइचा गेयीनी। मिनु गो इन लां कोव़शा, मुने मदोक्‍ङल।
117आं कली प्रोंइचा कली वारच पाइय्‍यीनी। गो गेना हना यो इन फुल्‍लुम मुशा ब्रेक्‍शो लोव़ दाक्‍नुङ।
118इन फुल्‍लुम मुशा ब्रेक्‍शो लोव़ ङा लां रे हेंथे गाक्‍ब नेल्‍ल आन कली तिल्‍तीनी। मारदे हना मेको आन लां जोल बाक्‍त।
119रागी ङा इन अरेशो मटीब नेल्‍ल आन कली पु‍लु खोदेंशो पा फिक्‍तीनी। मोपतीके गो इन देंशो लोव़ दाक्‍नुङ। यसैया १:२५
120गो इन कली मान पा हिंशा ख्रिंख्रि पाइ‍नुङ। मिनु गो इन निसाफ पतीक मिम्‍शा हिंनुङ।
121गो ठीक निसाफ पाता। आं कली दिप्‍ब आन कली जिम्‍मा मगेयीनी।
122इन गेय पाइब कली वारच पा, रिम्‍शो पने। इन कली मटीबपुकीमी आं कली दिप्‍चा मगेने।
123गो इन प्रोंइतीक नु इन ठीक निसाफ पा पशो लोव़ कली शुश कोव़शा रिम्‍नुङ।
124इन गेय पाइब कली इन गेना हना यो दाक्‍तीकेमी वारच पने। मिनु आं कली इन फुल्‍लुम मुशा ब्रेक्‍शो लोव़ शेंदीनी।
125गो इन गेय पाइब नङ। आं कली रुप्‍तीक थुं गेयीनी। मोपा गो इन देंशो रुप्‍ने चबुल।
126परमप्रभु यावे, इन गेय पची ना दुम्‍शो बाक्‍ब। मारदे हना मुरपुकीम इन अरेशो लोव़ मटीम।
127गो सुन नु क्‍येख सुन क्‍येङा इन शेंतीके दाक्‍नुङ।
128मोपतीके गो आं लां नेल्‍लेमी इन ब्रेक्‍शा अरेशो लोव़ मिम्‍नुङ। मिनु दूली लां नेल्‍ल काइ मदाक्‍नुङ। भजन संग्रह ११९:२९
129इन देंशो लोव़ शुश रिम्‍शो बाक्‍नीम। मोपतीके गो मेको टिना टिन बाक्‍नुङ।
130इन लोव़ नेंशोनु, रुप्‍तीक थुं गेब। मतुइक्‍ब आन कली तुइक्‍ब सेल्‍ब।
131गो ब्‍वाक्‍कु तूतू दाक्‍शो खोदेंशो पा इन शेंशो लोव़ माल्‍ना माल्‍न बाक्‍नुङ।
132गे आं गे लेश्‍शा शिशी पने। इन नें दाक्‍ब आन कली शिशी पशो खोदेंशो पा आं कली यो शिशी पने।
133आं कली इन थोक्‍शा पशो लोव़ ङा लां गाक्‍पाइय्‍यीनी। मरिम्‍शो पतीकेम आं कली हुकुम पचा मगेने।
134आं कली मुर आन दिप्‍तीक रे प्रोंइयीनी। मिनु गो इन ब्रेक्‍शा अरेशो लोव़ पने चबुल।
135इन कुल इन गेय पाइब तार नां खोदेंशो पा ब्रपतीन। मिनु इन फुल्‍लुम मुशा ब्रेक्‍शो लोव़ आं कली शेंदीनी।
136गो ङाक्‍नुङ। मारदे हना मुरपुकीमी इन अरेशो लोव़ मटीम।
137परमप्रभु यावे, गे रिम्‍शो पाइब बाक्‍नीनी। मिनु इन पशो निसाफ ठीक बाक्‍नीम।
138गे इन देंशो लोव़ ठीक निसाफ पतीकेमी वोइक्‍तीनी। गो मेको कली थमा सुइक्‍नीकी।
139गो चुरना चुरन बाक्‍नुङ। मारदे हना आं कली खेदा पाइबपुकीमी इन लोव़ प्रेंताक्‍म। भजन संग्रह ६९:१०
140इन थोक्‍शा पशो लोव़ शुश रिम्‍शो बाक्‍ब। मिनु गो, इन गेय पाइबमी मेको दाक्‍नुङ।
141गो आइक्‍च बाक्‍नुङ। आं कली सुइमी महिक्‍नीम। मो हना यो गो इन ब्रेक्‍शा अरेशो लोव़ मप्रेंनुङ।
142इन निसाफ पतीके गेना हना यो ठीक बाक्‍ब। मिनु इन अरेशो लोव़ थमा लोव़ बाक्‍ब।
143गो हिंती नु श्‍येत जाइब दुम्‍ती हना यो, इन शेंतीकेम आं कली ग्‍येरपाइक्‍ब।
144इन देंशो गेना हना यो ठीक बाक्‍नीम। आं कली रुप्‍तीक थुं गेतीनी हना, गो ब्रोंइनुङ।
145गो आं थुं नेल्‍लेमी इन कली पुंइनुङ। परमप्रभु यावे आं लोव़ लेत्‍तीनी। गो इन फुल्‍लुम मुशा ब्रेक्‍शो लोव़ टिना टिन बाक्‍नुङ।
146गो इन कली “गे आं कली श्‍येत रे प्रोंइयीनी” दे पुंइनुङ। मिनु गो इन देंशो पाइनुङ।
147गो नां मदाप्‍थु बोक्‍शा, इन कली “वारच पाइय्‍यीनी” दे पुंइनुङ। गो इन लोव़ ङा लां कोव़ना कोव़न बाक्‍नुङ।
148गो इन थोक्‍शा पशो लोव़ मिम्‍चा कली नाक्‍दो सेंना सेंन बाक्‍ती।
149इन गेना हना यो दाक्‍तीकेमी आं पुंइशो नेनीन। परमप्रभु यावे, इन निसाफ पतीकेमी आं कली ब्रोंइचा गेयीनी।
150आं कली खेदा पाइबपुकी आं कली साइक्‍चा कली आं नेक्‍था जाक्‍नीम। मेकोपुकी इन अरेशो लोव़ रे ङोन बाक्‍नीम।
151तन्‍न परमप्रभु यावे, गे आं नेक्‍था बाक्‍नीनी। इन शेंशो लोव़ नेल्‍ल थमा बाक्‍ब।
152गो ङोंइती रे इन देंशो लोव़ पढेशा, मेको गेना हना यो कली सेल्‍शो बाक्‍ब, दे तुइक्‍ताक्‍ङ।
153आं श्‍येत जशो कोव़ङीन, गो श्‍येत जाइनुङ। मिनु आं कली प्रोंइयीनी। मारदे हना गो इन अरेशो लोव़ मप्रेंदु।
154गे आं निसाफ पाइब दुमीन। मिनु आं कली प्रोंइयीनी। इन थोक्‍शा पशो लोव़ खोदेंशो पा ब्रोंइचा गेयीनी।
155इन अरेशो लोव़ मटीब आन कली गे श्‍येत रे मप्रोंइनीनी। मारदे हना मेकोपुकीमी इन फुल्‍लुम मुशा ब्रेक्‍शो लोव़ पचा ममलेम।
156परमप्रभु यावे, इन शिशी ठेयब बाक्‍ब। इन निसाफ पतीक लोव़ खोदेंशो पा आं कली ब्रोंइचा गेयीनी।
157आं कली खेदा पाइब नु आं जोरी सत्रु शुश बाक्‍नीम। मो हना यो गो इन देंशो लोव़ मप्रोनु।
158मेको नोले शोंइसीशो आन कली तशा ग्रांग्रा दीती। मारदे हना मेकोपुकीमी इन शेंशो टिचा प्रोंइतेक्‍म।
159गो इन ब्रेक्‍शा अरेशो लोव़ दाक्‍नुङ, दे मिम्‍तीन। परमप्रभु यावे, इन गेना हना यो दाक्‍तीकेमी आं कली ब्रोंइचा गेयीनी।
160इन लोव़ नेल्‍ले थमा बाक्‍ब। मिनु इन निसाफ पतीक लोव़ गेना हना यो ठीक बाक्‍नीम। यूहन्‍ना १७:१७
161ठेयब मुरपुकीमी आं कली बित्‍चीम खेदा पाइनीमी। तन्‍न आं थुं इन लोव़ क्‍येङा हिंब।
162गो शुश शोंप तशा, ग्‍येरसीचा क्‍येङा इन लोव़ तशा ग्‍येरसाक्‍यी।
163दूली पतीके नु जोल पतीक काइ मदाक्‍थु, ग्रांग्रा दीनुङ। तन्‍न इन अरेशो लोव़ दाक्‍नुङ।
164गो इन निसाफ पतीक लोव़ आ पर्बम इन कली नाक्‍त किंत किंत ७ खेयप ठेयब सेल्‍नुङ।
165इन अरेशो लोव़ दाक्‍बपुकी थुं नाइश्‍शा बाक्‍चा ताइनीम। मेको आन कली मारेइ श्‍येत मदुम्‍ब।
166परमप्रभु यावे, गो इन श्‍येत रे प्रोंइतीक कली रिम्‍शा बाक्‍नुङ। मिनु इन शेंशो पाइनुङ।
167गो इन देंशो लोव़ टिना टिन बाक्‍ती। मिनु गो मेको कली थाम्‍पा दाक्‍नुङ।
168इन ब्रेक्‍शा अरेशो लोव़ नु इन देंशो लोव़ टिना टिन बाक्‍नुङ। मारदे हना आं पशो नेल्‍ल इन ङोंइती बाक्‍नीम।
169परमप्रभु यावे, आं पुंइशो लोव़ नेनीन। इन लोव़म देंशो खोदेंशो पा आं कली रुप्‍ब थुं गेयीनी।
170आं पुंइशो लोव़ नेनीन। इन थोक्‍शा पशो लोव़ खोदेंशो पा श्‍येत रे प्रोंइयीनी।
171गे आं कली इन फुल्‍लुम मुशा, ब्रेक्‍शो लोव़ शेंताक्‍यीनी। मोपतीके गो इन कली ठेयब सेल्‍ना सेल्‍न बाक्‍नुङ।
172गो इन थोक्‍शा पशो लोव़ आ पर्बम कुम्‍सो पाइ‍नुङ। मारदे हना इन शेंशो लोव़ नेल्‍ल ठीक बाक्ब।
173गे आं कली वारच पाइय्‍यीनी। मारदे हना गो इन ब्रेक्‍शा अरेशो लोव़ योव़शा, आं के सेल्‍तामी।
174परमप्रभु यावे, गो इन श्‍येत रे प्रोंइतीक कली रिम्‍नुङ। इन अरेशो लोव़ दाक्‍शा ग्‍येरसीनुङ।
175गे आं कली ब्रोंइचा गेयीनी। मिनु गो इन कली ठेयब सेल्‍नुङ। मिनु इन पतीक लोव़मी आं कली वारच पवल।
176गो जाम्‍शो भेडा खोदेंशो पा लां जाम्‍शो बाक्‍नुङ। इन गेय पाइब, आं कली माल्‍यीनी। मारदे हना गो इन शेंशो लोव़ मप्रेंनुङ। यसैया ५३:६

Read भजन संग्रह 119भजन संग्रह 119
Compare भजन संग्रह 119:69-176भजन संग्रह 119:69-176