32गो इन शेंशो पना पन बाक्ती। मिनु गे आं रुप्तीक थुं बारपाइक्नीनी।
33परमप्रभु यावे, इन फुल्लुम मुशा ब्रेक्शो लोव़ शेंदीनी। मिनु गो मेको नोले सम्म मप्रोंइनुङ।
34गे आं कली रुप्तीक थुं गेयीनी। मिनु गो इन अरेशो लोव़ आं थुं नेल्लेमी पाइनुङ।
35इन शेंतीके लांम गाक्पाइय्यीनी। मारदे हना गो मेको कली दाक्नुङ।
36आं थुं कली इन देंशो ला मिम्पतीन। शुश क्येट चेम्तीके ममिम्पतीन।
37मरिम्शो थोव़क मकोव़पाइय्यीनी। इन दाक्चा ङा पा ब्रोंइचा गेयीनी।
38गे इन गेय पाइब कली इन थोक्शा पशो लोव़ खाप्पीन। इन थोक्शा पशो लोव़ इन कली मान पा हिंब आन कली बाक्ब।
39हिंचा ङा शुक्शी पाइक्चा पुंइसीतीक आं क्येङा ङोन वोतीन। मारदे हना इन पतीक लोव़ रिम्शो बाक्नीम।
40इन ब्रेक्शा अरेशो लोव़ शुश दाक्नुङ। इन निसाफ पतीकेमी आं कली ब्रोंइचा गेयीनी।