30तन्न परमप्रभु यावेमी मेको कली बेक्शो रे सेंताक्व। प्रेरित ३:१५
31मिनु गालील रे यरूसलेम सम्म येसु नु काथा गाक्ब आन कली बेक्शो रे सेंसीशा शुश नाक्त तपांइसाक्व। मोदेंशो पा येसु कली सेंसीशो ताइबपुकीमी ‘येसु बेक्शो रे सेंचा पुंइसाक्व। मुल यो ब्रोंइशो बाक्ब। आंइ मिक्चीमी ताइतक’ दे शेंना शेंन गाक्नीम।
32परमप्रभु यावेमी इं किकी पिपी आन कली ङोंइती पशो लोव़ पाप रे प्रोंइब का सोइश्शा खाप्शो, ग्येरपाइक्तीक लोव़ इन कली शेंनीकी।
33मेको लोव़ साइ परमप्रभु यावेमी ब्रेक्पाइश्शो लोव़ नु गारब। मारदे हना भजन संग्रह कामी ‘गे आं तौ नवे। मुलाक्ती गो इ कली थीतन’ दे ब्रेक्शो बाक्ब। भजन संग्रह २:७
34लेंशा मबेक्चा ङा नु मराक्चा ङा पा बेक्शो रे सेंसीशो आ पर्बम परमप्रभुमी ‘दाऊद कली गेशो खोदेंशो पा गो इ कली आसीक गेनन’ दे ब्रेक्पाइश्शो बाक्ब। यसैया ५५:३
35मोपतीके दाऊदमी भजन संग्रह कामी ‘परमप्रभु यावे, इन योव़शो तौ कली बेक्शा लशा यो, राक्चा मगेनीनी’ दे ब्रेक्शो बाक्त। भजन संग्रह १६:१०; प्रेरित २:२७
36दाऊदमी मेको लोव़ ब्रेक्शो बाक्त हना यो, आंम पर्बम ममाइ। मारदे हना दाऊदमी परमप्रभु यावेमी गेशो सासन पने थुम्शा बेक्शा, आ किकी पिपी आन कली थिम्तीकेमी थिम्चा पुंइसीशा राक्शा लमाक्त।
37येसु चहिं बेक्शा मरा। मारदे हना परमप्रभु यावेमी मेको कली बेक्शो रे सेंताक्व।
38मोपतीके आं लोक्बपुकी, आं लोव़ रुपीने। मेको येसुमी मुर आन पाप क्याम्शा गेब, दे इन कली शेंनीकी। रोमी ८:३-४
39येसु कली थमा सुइक्ब नेल्ल आन पाप क्याम्चा पुंइसीनीम। मिनु आन पाप क्याम्चा पुंइसीशा, परमप्रभु आ ङोंइती पाप मपथु बाक्शो तांइसीनीम। मोसामी ब्रेक्शो लोव़मी इन पाप क्याम्ने मचाप्ब। मारदे हना मेको लोव़ नेल्ल टिने मचाप्तीके पापी दुम्तीनी। रोमी १०:४
40मोपतीके होस पांइसीने। साइ परमप्रभु यावे आ लोव़ पाइबमी
41‘ए, गे शुक्शी पाइबपुकी, छक लाक्चा ङा पा पुलु दुम्शा लने। मारदे हना गो इन पालामीन गेय का पाइनुङ। तन्न गे थमा मसुइक्नीनी। मिनु सुइमी इन कली शेंताक्म हना यो गे थमा मसुइक्नीनी’ ” दे पावलमी शेंदीमी बाक्त। हबकुक १:५
42मिनु ग्रुम्तीक खिं रे ग्रूशा गाक्चाम्सेनु, आस लोव़ नेंबपुकीमी “मुल जाक्शो नाइक्तीक नाक्ती लेंशा शेंचा नकी” दे पुन्मे बाक्त।
43मिनु गाक्सानु, यहूदी नु यहूदी धर्म मानेब शुशेमी मेको आस नोले खोदमे बाक्त। मेको निक्शीमी “परमप्रभु यावेमी इन कली शिशी पा ख्रीस्त कली थमा सुइक्ब सेल्तु। मुल ङा मेरे मेको थमा सुइक्तीक मप्रोनीन” दे मदसे बाक्त।
44मिनु नाइक्तीक नाक्त जाक्मेनु, सहर ङा मुर नेल्ल जाक्शा, परमप्रभु यावे आ लोव़ शेंशो नेंथ देल्मा बाक्त।
45मोपा शुश मुर देल्शो तशा, यहूदी आन थुं चोव़मे बाक्त। मिनु पावलमी लोव़ शेंदानु, मेकोपुकीमी आ लोव़ ख्रोइश्शा, जिचा पोक्ग्मे बाक्त।
46मिनु पावल नु बारनाबासमी यो महिंथु ठेयब थुं पा “अरु आन क्येङा ङोंइती इन कली परमप्रभु यावे आ लोव़ नेंपाइक्चा माल्शो। गेपुकीमी चहिं मनेंनीनी, नोफा मदाइक्नीनी, थमा मसुइक्नीनी। इन मोदेंशो पशोमी गेना हना यो ब्रोंइशा बाक्चा मताइनीनी। जाम्शा लाइनीकी, दे तुइक्तीने। मुल ङा मेरे इन कली शेंचा प्रोंइशा, अर्को रागी ङा मुर आन कली शेंथ गाक्नस्कु। प्रेरित ३:२५-२६; मत्ती १०:५-६
47आंमा शेंब दुम्शा, गाक्शो मनस्कु। परमप्रभु यावेमी आंस कली आ लोव़ शेंब सेल्तु। मिनु मेकोमी ‘गो इ कली नेल्ल रागी ङा, नेल्ल जात ङा मुर आन कली लां कोंइशा, छेङछेङ दुम्शा रुप्पाइक्चा कली सोइक्ताक्ङ’ दे ब्रेक्शो बाक्ब” देंसा बाक्त। यसैया ४९:६
प्रेरित 13
प्रेरित 13:30-47