30तन्न परमप्रभु यावेमी मेको कली बेक्शो रे सेंताक्व। प्रेरित ३:१५
31मिनु गालील रे यरूसलेम सम्म येसु नु काथा गाक्ब आन कली बेक्शो रे सेंसीशा शुश नाक्त तपांइसाक्व। मोदेंशो पा येसु कली सेंसीशो ताइबपुकीमी ‘येसु बेक्शो रे सेंचा पुंइसाक्व। मुल यो ब्रोंइशो बाक्ब। आंइ मिक्चीमी ताइतक’ दे शेंना शेंन गाक्नीम।
32परमप्रभु यावेमी इं किकी पिपी आन कली ङोंइती पशो लोव़ पाप रे प्रोंइब का सोइश्शा खाप्शो, ग्येरपाइक्तीक लोव़ इन कली शेंनीकी।
33मेको लोव़ साइ परमप्रभु यावेमी ब्रेक्पाइश्शो लोव़ नु गारब। मारदे हना भजन संग्रह कामी ‘गे आं तौ नवे। मुलाक्ती गो इ कली थीतन’ दे ब्रेक्शो बाक्ब। भजन संग्रह २:७
34लेंशा मबेक्चा ङा नु मराक्चा ङा पा बेक्शो रे सेंसीशो आ पर्बम परमप्रभुमी ‘दाऊद कली गेशो खोदेंशो पा गो इ कली आसीक गेनन’ दे ब्रेक्पाइश्शो बाक्ब। यसैया ५५:३
35मोपतीके दाऊदमी भजन संग्रह कामी ‘परमप्रभु यावे, इन योव़शो तौ कली बेक्शा लशा यो, राक्चा मगेनीनी’ दे ब्रेक्शो बाक्त। भजन संग्रह १६:१०; प्रेरित २:२७
36दाऊदमी मेको लोव़ ब्रेक्शो बाक्त हना यो, आंम पर्बम ममाइ। मारदे हना दाऊदमी परमप्रभु यावेमी गेशो सासन पने थुम्शा बेक्शा, आ किकी पिपी आन कली थिम्तीकेमी थिम्चा पुंइसीशा राक्शा लमाक्त।
37येसु चहिं बेक्शा मरा। मारदे हना परमप्रभु यावेमी मेको कली बेक्शो रे सेंताक्व।