7मिनु मुरपुकी मोसा आ बाक्तीक जाक्शा “गोपुकीम परमप्रभु यावे नु इन पर्बम मरिम्शो लोव़ पा पाप पाइतक। मेको बुस्सपुकी खेरचा, दे परमप्रभु यावे कली आंइ पर्बम पुनीन” देंतेक्म। मिनु मोसामी मेको मुर आन पर्बम पुंइतु। प्रस्थान ३२:३०-३४
8मिनु परमप्रभु यावेमी मोसा कली “गे मेको बीस पाइश्शो बुस्स खोदेंशो पा बुस्स का सेल्शा, ख्रांबा काम क्युक्को। मिनु सु बुस्सुम कोक्शो बाक्मे, मेकोमी मेको बुस्स कोव़शा, ब्रोंइब” देंत। २राजा १८:४; यूहन्ना ३:१४
9मिनु मोसाम कांसा के बुस्स का सेल्तु। मिनु मेको कली ख्रांबा काम क्युक्तु। मिनु सु सु बुस्सुमी कोक्शो बाक्मा, मेकोपुकीम कांसा के बुस्स कोव़ङमेनु, ब्रोंइतेक्म।
10मिनु इस्राएलीपुकी गाक्शा, ओबोथम बाक्तीक सेल्तेक्म।
11मिनु ओबोथ रे गाक्शा, मोआब आ पूर्ब गे ङा सांद इये-अबारीम ङा गोरशो रागीम बाक्तीक सेल्तेक्म।
12मिनु मेकोपुकी मेकेर रे गाक्शा, जेरेद ङा बेंसीम बाक्तीक सेल्तेक्म।
13मिनु मेकोपुकी मेकेर रे गाक्शा, एमोरी आन सांदम ग्रूतीक गोरशो रागीम बाक्शो अरनोन खोला आ आइक्ची हांबुम आन बाक्तीक सेल्तेक्म। मेको अरनोन खोला मोआब आ सांद बाक्ब। मेको एमोरी नु मोआबी आन दातेम बाक्ब।
14मोपतीके परमप्रभु यावे आ लडाइ ङा किताबमी दोपा ब्रेक्शो बाक्ब देंशा हना “वाहेब सहर सुफाह नु अरनोन खोला आ दिंम, यहोसु १०:१३; २सामुएल १:१८
15नु आर माइश्शो बाक्तीके सम्म लाइब लुक्च लतीक लां। मेको मोआब आ सांद सम्म लशो बाक्ब” देंशो बाक्ब।
16मिनु मेकेर रे मेकोपुकी बेयर लाम्तेक्म। मिनु परमप्रभु यावेमी मोसा कली “मुर आन कली पुक्मी। मिनु गो ब्वाक्कु गेनुङमी” देंशो कुवा मेकेर बाक्ब।
17मिनु नोले इस्राएलीपुकीम एको कुम्सो पाम्तेक्म। “कुवा, ब्वाक्कु बुक्शा ग्रूङो। मिनु मेको आ पर्बम कुम्सो पावो।
18मेको कुवा मेको ठेयब मुरपुकीम दोशो बाक्तेक्म। मिनु मुरपुकीमी मेको कुवा पिप आ सुन के कोक्केम दोशो बाक्तेक्म” दे कुम्सो पाम्तेक्म। मिनु मेकोपुकी गोरशो रागी रे ग्रूशा मत्ताना लाम्तेक्म।
19मिनु नोले मत्ताना रे नाहालीएल, नाहालीएल रे बामोथ सम्म
20बामोथ रे मोआब ङा दिंम बाक्शो बेंसी सम्म, गोरशो रागी रे तांइसीतीक इर पिस्गा डांडा सम्म लाम्तेक्म।
21मिनु नोले इस्राएलीपुकीमी एमोरी आन पिप सीहोन आ बाक्तीकेम मुर आन कली सोइश्शा ब्यवस्था २:२६-३७
22“गो आंइ कली इन रागी रे पा लचा गेने। गो रू नु अङगुर रू रे पा मलाइनीकी। गोपुकीम इन तेकोइ कुवा ङा ब्वाक्कु मतूनीकी। इन रागी मलाक्का सम्म गो पिप आ ठेयब लां रे पा लाइनीकी” देंपाइक्तेक्म।
23तन्न सीहोनमी इस्राएली आन कली आ रागी लाक्शा लचा मगेवो। मेकोम आ लडाइ पाइबपुकी खुप्शा, गोरशो रागीम इस्राएली आन कली लडाइ तोप्तु। मेकोमी याहास सम्म जाक्शा, इस्राएली नु लडाइ पाप्तु।
24मिनु इस्राएलीपुकीम मेको कली तरवारम क्योरशा साइक्तेक्म। मिनु अरनोन खोला रे यब्बोक खोला सम्म मेको आ रागी आन के सेल्तेक्म। मिनु अम्मोनी आन सांद सम्म मेकोपुकीम आन रागी सेल्तेक्म। मारदे हना, अम्मोनी आन सांद बोल्यो बाक्त।
25इस्राएलीपुकीम मेको सहर नेल्ल आन के सेल्तेक्म। मिनु मेकोपुकीम एमोरी आन सहर नेल्ल नु हेश्बोन नु मेको आ एर ओंथ ङा गाउं नेल्लेम बाक्तेक्म।
26हेश्बोन सहर एमोरी आन पिप सीहोन आ सहर बाक्त। पिप सीहोनमी मोआबी आन ङोंइती ङा पिप नु लडाइ पा मेको आ रागी अरनोन खोला सम्म आ के सेल्शो बाक्त।
27मोपतीके कुम्सो पाइबपुकीम “गेपुकी हेश्बोन सहरम जाक्कीन। मिनु मेको लेंशा सेल्सीन। सीहोन आ सहर लेंशा सेलीन।
28हेश्बोन रे मी ग्रूत। सीहोन आ सहर रे ब्रशो मी ग्रूत। मिनु मेको मीम मोआब ङा आर सहर नु अरनोन ङा डांडा दाक्तु।
29आबी आबी, मोआब, केमोश आ मुरपुकी बेक्तेक्म। एमोरी आन पिप सीहोनमी मेको आ तौ आन कली प्रोक्ब सेल्तीमी। आ तमी आन कली ग्याइक्चा पुंइसीब सेल्तीमी। न्यायाधीस ११:३४; १राजा ११:१७
30मोपा मेको आन थेरशो रू हेश्बोन रे दीबोन सम्म खतम दुम्त। मिनु मेदेबा मीम नेक्चा क्येङा ङोंइती गो मेको खतम पोक्तका” दे कुम्सो पाम्तेक्म।
गन्ती 21
गन्ती 21:7-30