7तन्न गे नु इ तौपुकीम चढ़ेतीक नु फारशो वा आगा ङा कोठा ङा गेय थम रिम्शो पा पने। चढ़ेतीक गेय इन कली गेतन्नी। अरु सुइ मेकेर जाक्तेक्म हना, मेको साइक्चा पुंइसीनीम” देंत। गन्ती १:५१
8मिनु परमप्रभु यावेमी हारून कली “गो आं कली चढ़ेशो इ कली गेतन। इस्राएलीपुकीमी आं कली चढ़ेशो नेल्ल गेतन। मेको इ कली नु इ तौ आन कली चढ़ेतीक गेय पशो ङा गेना हना यो इन भाग बाक्ब। लेवी ३:२,१०; लेवी ६:९-११,१९-२२; लेवी ७:६-१०
9मिनु मी रे पा प्रोंइशा आं कली चढ़ेशो इन कली मार बाक्ब देंशा हना, मेको आं कली नेल्ल क्येङा चोव़खो चढ़ेशो अन्न चढ़ेशो बाक्त हना यो, पाप आ पर्बम चढ़ेशो बाक्त हना यो नु गारचा आ पर्बम चढ़ेशो नेल्ल इ कली नु इ तौ आन कली बाक्ब।
10मिनु मेको इन कली नेल्ल क्येङा चोव़खो जचा थोव़क बाक्ब। मेको इन दाते ङा वोंइश मुर नेल्लेमी जने चाप्नीम। मेको इन कली चोव़खो बाक्ब। लेवी ६:९; लेवी १०:१२,१४
11मिनु इस्राएलीपुकीमी क्युक्शा चढ़ेतीक चढ़ेम्तेक्म हना, मेको तिल्शो नेल्ल इ कली नु इ तमी तौ आन कली गेना हना यो इन भाग बाक्ब, दे गेतन्नी। इ खिंम ग्रांग्रा मदिशो बाक्शो सुइ सुइमी मेको जने चाप्नीम।
12मिनु मेकोपुकीमी परमप्रभु यावे कली गेशो नेल्ल क्येङा रिम्शो तेल, नेल्ल क्येङा रिम्शो अङगुर शांबु, अन्न नु रिम्शो मारेइ मारेइ गो इ कली गेतन।
13मेकोपुकीमी परमप्रभु यावे कली चढ़ेथ चाक्शो आन ङोंइती मीशो फल फुल नेल्ल इं केन दुम्ब। इ खिंमी ग्रांग्रा मदिशो बाक्शो मुर नेल्लेमी मेको जने चाप्नीम। प्रस्थान २३:१९; ब्यवस्था १८:३-४
14इस्राएलम आं कली चढ़ेशो मारेइ मारेइ इ केन बाक्ब। लेवी २७:२८
15मिनु परमप्रभु यावे कली चढ़ेशो, मुर आन ङोंइती जरमेशो, बी ब्यफ क्यारश भेडा आन ङोंइती जरमेशो नेल्ल इ केन बाक्नीम। मो दुम्त हना यो, गे मुर आ ङोंइती जरमेशो कली प्रोंइचा माल्नेवे। ग्रांग्रा दिशो बस्तु भाव आन ङोंइती जरमेशो यो प्रोंइचा माल्नेवे। प्रस्थान १३:२; प्रस्थान ३४:१९-२०
16मेको आन कली प्रोंइतीक क्येट महिना का गाप्शो कली चांदी के ५ शेकेल ताक्चा माल्नेवे। मेको ताम्बु ङा शेकेल बाक्चा माल्नीम। मेको ताम्बु ङा शेकेल का २० गेराह ङा बाक्ब। गेराह का ०.६ ग्राम बाक्ब। ताम्बु ङा शेकेल का १२ ग्राम ङा क्येट बाक्ब।लेवी २७:६,२७
17मिनु बी, भेडा क्यारश आन ङोंइती जरमेशो आन कली प्रोंइने मचाप्नीम। मेको आं केन बाक्नीम। गे मेको आन हुश चढ़ेतीकेमी ब्रुइक्चा माल्नेवे। मिनु मेको आन बोंसो चोचा माल्नेवे। मेको परमप्रभु यावे कली आ दाक्चा ब्रोव़शो रिना पाइश्शो मीम चोशा चढ़ेतीक बाक्ब।
18तन्न आन श्ये इ केन बाक्ब। मेको क्युक्शा चढ़ेशो कुथ्रु नु ग्युरा फिला खोदेंशो पा इ केन बाक्ब।
19मिनु इस्राएलीपुकीमी आं कली चढ़ेशो नेल्ल इ कली नु इ तमी तौ आन कली गेना हना यो कली गेतन्नी। मेको इ कली नु इ चच युइ आन कली परमप्रभु यावे आ ङोंइती गेना हना यो लीशो हिक्सी आ कबल पशो बाक्ब” देंत। लेवी २:१३; २इतिहास १३:५
20मिनु नोले परमप्रभु यावेमी हारून कली “गे मेको रागीम मुर आन दातेमी रू मताइनीनी। गो इस्राएली आन दातेमी इन भाग नु इन शोंप नङ। गन्ती ३५:-; ब्यवस्था १०:९; ब्यवस्था १२:१२; यहोसु १३:१४,३३; भजन संग्रह १६:५; भजन संग्रह ७३:२६; इजीकीएल ४४:२८
21गो लेवी आ मुर आन कली ग्रुम्तीक ताम्बुमी गेय पचा कली इस्राएली नेल्ल आन १० भाग ङा भाग का गेतामी। लेवी २७:३०
22मुल रे इस्राएलीपुकी ग्रुम्तीक ताम्बु आ नेक्था जाक्ने मचाप्नीम। जाक्तेक्म हना, पापम पतीकेमी बेक्नीम।
23तन्न लेवीपुकीमी ग्रुम्तीक ताम्बु ङा गेय पचा माल्नीम। मेकोपुकीमी पाप पाम्तेक्म हना, मेको आंमा कुरचा माल्नीम। मेको इन कली गेना हना यो लीब शेंतीके बाक्ब। तन्न मेकोपुकीमी इस्राएली आन दातेमी रू मताइनीम।
24मारदे हना गो लेवी आन कली इस्राएली आन परमप्रभु यावे कली चढ़ेशो १० भाग ङा भाग का गेतामी। मोपतीके गो मेको आन कली ‘गे इस्राएली आन दातेमी रू मताइनीनी’ देंती” देंत।
गन्ती 18
गन्ती 18:7-24