1एको लोव़ नेल्ल रे पा गो मार मिम्ताक्ङ देंशा हना, ठीक पाइब नु जोक्ब तुइक्ब आन पतीक मारेइ मारेइ परमप्रभु आ गुइमी बाक्बाक्त। तन्न मुरुमी आंम कली दाक्तीक नु काइ मदाक्तीक ताइनीम। तन्न मेको मतुइक्बाक्तेक्म।
2मारदे हना जाम्शा लतीक नु मरिम्शो दुम्तीके मुर नेल्ल आन कली दुम्ब। ठीक पाइब नु परमप्रभु आ अरेशो मटीब, रिम्शो पाइब नु मरिम्शो पाइब, ग्रांग्रा मदिशो नु ग्रांग्रा दिशो, चढ़ेतीक चढ़ेब नु मचढ़ेब, पाप पाइब नु मपाइब नु कसम जाइब नु मजाइब, नेल्ल नोले खाल का ङा पा जाम्शा लाइनीम। उपदेसक २:१४; अय्युब ९:२२
3रागीम दुम्तीक गेय नेल्लेमी मरिम्शो पतीक बाक्ब। मेको नेल्ल बेक्शा लाइनीम। मुर नेल्ल आन थुं मरिम्शो पतीकेमी ब्रीशो बाक्ब। मिनु मेकोपुकी ब्रोंइमा सम्म आन थुं हेंथे पतीकेम ब्रीशो बाक्ब। मिनु मेको नोले मेको बेक्शोपुकी नु बाक्थ लाइनीम। उपदेसक ८:११
4तन्न ब्रोंइशा बाक्बपुकी नु बाक्ब आन के आस बाक्ब। बेक्शो गुप्स क्येङा ब्रोंइशा बाक्शो कुचुम रिम्शो बाक्ब।
5ब्रोंइशा बाक्शोपुकीम “गो बेक्नीकी” दे तुइश्शो बाक्नीम। तन्न बेक्शोपुकीम मारेइ मतुइक्नीम। मेको आन कली मारेइ इनाम मबाक्ब। मेको आन कली मिम्तीक यो जाम्शा लाइब।
6मेको आन दाक्तीके, काइ मदाक्तीक नु गेहे पतीक नेल्ल जाम्शा लत। मेकोपुकीम रागीम मार दुम्शो बाक्मे, मेको मारेइ ममिम्नीम।
7आंम इ लां गाक्को, इ जतीक थोव़क ग्येरशा जावो। ग्येरशा इ अङगुर शांबु तूङो। मारदे हना परमप्रभुमी इ पशो गेय दाक्ब। उपदेसक २:२४
8गेना हना यो रिम्शो वा फेक्शा इ ब्रोव़शो तेल ख्रेक्सो।
9परमप्रभुमी गेशो इच्का नाक्त ब्रोंइशा बाक्तीकेमी आंम दाक्शो मीश नु ग्येरशा बाक्को। मारदे हना रागीमी इ श्येत पा पशो गेय ङा भाग मेको बाक्ब। हितोपदेस ५:१८-१९
10इ ङोंइती मार गेय बाक्मे, मेको इ सक्ति नेल्लेमी पावो। मारदे हना बेक्शो मुर आन बाक्तीकेम मारेइ मिम्तीके, जोक्तीके नु तुइक्तीके मबाक्ब।
11गो रागीमी अर्को थोव़क का यो तशो बाक्नुङ। रीब पा दोरब मग्राब। सक्ति पाइश्शो लडाइ पाइबमी लडाइ मग्राब। जोक्ब तुइक्बमी जचा मताइब। शुश निप्स पाइश्शो मुरुमी क्येट मचेम्ब। जोक्ब मुरुमी मान मताइब। तन्न नेल्लेमी आन गेय पतीक ना नु रागी दोपा बाक्बा, मुर आन गेय दुम्बा देय मदुम्बा मेको ताइनीम। हितोपदेस १६:९
12मिनु हिंचा ङा श्येत गेना जाक्बा, सुइम मतुइक्नीम। शिशी मपाइब आन ग्याइलीम ङांइ रेश्शो नु ब्वारदम चिक्ब रेश्शो खोदेंशो पा मुरपुकी यो ममिम्थु हिंचा ङा श्येत जशा बेक्नीम।
13गो रागीमी जोक्तीक तुइक्तीक का यो ताता। मेको थम ठेयब बाक्त।
14साइ ङोंइती शुश मुर मबाक्शो आइक्च सहर का बाक्त। मिनु मेको कली शुश सक्ति पाइश्शो पिपमी लडाइ तोवा बाक्त। मेको सहर कली पुम्शा, गारो ङोइक्तीक यो सेला बाक्त।
उपदेसक 9
उपदेसक 9:1-14