1परमप्रभु आ खिं लनीनु, मूर्ख आन क्योरशा चढ़ेशो चढे़चा क्येङा परमप्रभु आ लोव़ होस पा नेंचा रिम्शो बाक्ब। मारदे हना मूर्खमी मरिम्शो पचा प्रोंइस मजोक्नीम। भजन संग्रह १५:१; यसैया ३३:१४-१६; मत्ती ५:२३-२४; १सामुएल १५:२२
2ब्वाक्चा कली मचुइक्तीन। परमप्रभु आ ङोंइती रीब पा लोव़ मपन। परमप्रभु स्वर्गमी बाक्ब। गे चहिं रागीम बाक्नीनी। मोपतीके शुश मब्वाक्कीन।
3दोपा शुश सुर्ता पतीकेम ङोमु ताइनीमी, मोपा मूर्खमी शुश लोव़ पाइब। याकूब १:१९; मत्ती ६:७
4गे परमप्रभु आ ङोंइती कसम जनीनु, मेको खाप्चा कली देश मपने। परमप्रभु मूर्ख आन कली तशा मग्येरब। गे इन कसम जशो खाप्पीन। ब्यवस्था २३:२२; १सामुएल १:११,२८; भजन संग्रह ५०:१४
5कसम जशा मखाप्चा क्येङा, कसम मजशो रिम्शो दुम्ब।