ܣܘܥܪ̈ܢܐ ܕܫܠܝܚ̈ܐ 16:8-30

⁸ܗ̇ܝܓܵܗ ܥܒ݂ܝܼܪܗܘܿܢ ܡ̣ܢ ܡܘܼܣܝܼܵܐ ܘܨܠܹܐ ܠܗܘܿܢ ܠܛܪܘܿܐܘܿܣ.

⁹ܒܠܲܝܠܹܐ ܦܵܘܠܘܿܣ ܚܙܹܐ ܠܹܗ ܚܸܙܘܵܐ ܕܚܲܕ ܐܢܵܫܵܐ ܡܵܩܹܕܘܿܢܵܝܵܐ، ܟܸܠܝܵܐ ܦܲܪܦܘܼܠܹܐ ܒܝܼܹܗ ܘܒܹܐܡܵܪܵܐ: ”ܬܵ‌ܐ ܠܡܵܩܹܕܘܿܢܝܼܵܐ ܘܗܲܝܸܪܲܢ.“

¹⁰ܡ̣ܢ ܒܵܬܪ ܕܚܙܹܐ ܠܹܗ ܦܵܘܠܘܿܣ ܐܵܗܵܐ ܚܸܙܘܵܐ، ܡܘܼܠܝܸܙ ܠܲܢ ܓ̰ܲܠܕܹܐ ܕܐܵܙܲܠ݇ܚ ܠܡܵܩܹܕܘܿܢܝܼܵܐ، ܣܵܒܵܒ ܩܛܝܼܥ ܠܲܢ ܕܐܲܠܵܗܵܐ ܩܸܪܝܲܢ ܝܼܗܘܵܐ ܕܡܲܟܪܸܙܲܚ ܐܸܠܵܝܗ‌ܝ.

¹¹ܘܡ̣ܢ ܛܪܘܿܐܘܿܣ ܛܪܹܐ ܠܲܢ ܘܐܙܝܼܠܔ ܠܲܢ ܬܪܘܼܨܵܐ ܠܣܵܡܘܿܬܪܵܩܹܐ، ܘܒܝܵܘܡܵܐ ܐܚܹܪܢܵܐ ܠܢܹܐܵܦܘܿܠܝܼܣ.

¹²ܘܡ̣ܢ ܬܵܡܵܐ ܐܙܝܼܠܔ ܠܲܢ ܠܦܝܼܠܝܼܦܘܿܣ، ܩܘܿܠܘܿܢܝܼܵܐ ܪܗܘܿܡܵܝܬܵ‌ܐ، ܘܡܕܝܼܢ݇ܬܵ‌ܐ ܩܲܕܡܵܝܬܵ‌ܐ ܒܐܘܼܚܕܵܢܵܐ ܕܡܵܩܹܕܘܿܢܝܼܵܐ. ܘܦܝܼܫ ܠܲܢ ܓܵܘ ܐܵܗܵܐ ܡܕܝܼܢ݇ܬܵ‌ܐ ܚܲܕܟܡܵܐ ܝܵܘܡܵܢܹ̈ܐ.

¹³ܒܝܵܘܡܵܐ ܕܫܲܒܬܵ‌ܐ ܦܠܝܼܛ ܠܲܢ ܠܒܲܕܲܪ ܡ̣ܢ ܬܲܪܥܵܐ ܕܡܕܝܼܢ݇ܬܵ‌ܐ ܠܡܲܪܙܵܐ ܕܢܲܗܪܵܐ ܐܲܝܟܵܐ ܕܚܫܝܼܒ݂ ܠܲܢ ܕܐܝܼܬ ܗܘܵܐ ܕܘܼܟܵܐ ܕܨܠܘܿܬܵ‌ܐ. ܝܬܝܼܒ݂ ܠܲܢ ܬܵܡܵܐ ܘܗܘܼܡܙܸܡ ܠܲܢ ܥܲܡ ܒܲܟ݂ܬܵܬܹ̈‌ܐ ܕܓ̰ܡܝܼܥܹܐ ܝܗܘܵܘ.

¹⁴ܚܕܵܐ ܡ̣ܢ ܐܵܢܝܼ ܒܲܟ݂ܬܵܬܹ̈‌ܐ ܠܘܼܕܝܼܵܐ ܝܗܘܵܐ، ܙܲܒܢܵܢܬܵ‌ܐ ܕܐܲܪܓܘܵܢܵܐ، ܣܵܓ݂ܕܵܢܬܵ‌ܐ ܕܐܲܠܵܗܵܐ، ܡ̣ܢ ܡܕܝܼܢ݇ܬܵ‌ܐ ܕܬܹܐܘܿܛܝܼܪܵܐ. ܐܵܗܵܐ ܦܬܝܼܚ ܠܹܗ ܠܸܒܘܼܗ̇ ܡܵܪܝܵܐ، ܘܡܘܼܨܝܸܬ ܠܵܗ̇ ܠܡܸܢܕܝܼܵܢܹ̈ܐ ܕܗܲܡܙܘܼܡܵܝ ܝܗܘܵܘ ܦܵܘܠܘܿܣ.

¹⁵ܡ̣ܢ ܒܵܬܪ ܕܥܡܝܼܕ ܠܵܗ̇ ܗ̇ܝ ܘܟܠܹܗ ܒܲܝܬܘܼܗ̇، ܦܘܼܪܦܸܠܔ ܠܵܗ̇ ܒܝܼܲܢ ܒܹܐܡܵܪܵܐ: ”ܐܸܢ ܒܸܚܫܵܒ݂ܵܐ ܝܬܘܿܢ ܕܗܘܼܡܸܢܬܵ‌ܐ ܝܘܵܢ ܒܡܵܪܲܢ، ܬܹܝܡܘܼܢ ܘܦܘܼܫܘܼܢ ܓܵܘ ܒܲܝܬ‌ܝܼ.“ ܘܪܵܒܵܐ ܩܵܡ ܡܲܠܝܸܨܵܐ ܠܲܢ.

¹⁶ܗܘܹܐ ܠܵܗ̇ ܟܲܕ ܒܹܐܙܵܠܵܐ ܝܘܲܚ ܗܘܵܘ ܠܕܘܼܟܵܐ ܕܨܠܘܿܬܵ‌ܐ، ܬܦܝܼܩ ܠܵܗ̇ ܒܝܼܲܢ ܚܕܵܐ ܚܵܡܬܵ‌ܐ ܕܐܝܼܬ ܗܘܵܐ ܠܵܗ̇ ܪܘܼܚܵܐ ܕܩܨܵܡܵܐ. ܟܹܐ ܡܲܝܬܝܵܐ ܗܘܵܐ ܪܵܒܵܐ ܙܘܼܙܹ̈ܐ ܩܵܐ ܡܵܪ̈ܵܘܵܬܘܼܗ̇ ܒܩܨܵܡܬܵ‌ܐ.

¹⁷ܐܵܗܵܐ ܒܪܵܬܵ‌ܐ ܒܹܐܬܵܝܵܐ ܝܗܘܵܐ ܒܵܬܪ ܦܵܘܠܘܿܣ ܘܒܵܬܪܲܢ ܡܲܩܘܘܼܚܹܐ ܒܹܐܡܵܪܵܐ: ”ܐܲܢܹܐ ܐܢܵܫܹ̈ܐ ܝܼܢܵܐ ܪܹ̈ܓܵܘܵܬܹ‌ܐ ܕܐܲܠܵܗܵܐ ܥܸܠܵܝܵܐ، ܘܡܲܟܪܘܼܙܹܐ ܝܢܵܐ ܐܸܠܵܘܟ݂ܘܿܢ ܐܘܼܪܚܵܐ ܕܦܘܼܪܩܵܢܵܐ.“

¹⁸ܥܒ݂ܝܼܕ ܠܵܗ̇ ܗܵܕܟ݂ܵܐ ܪܵܒܵܐ ܝܵܘܡܵܢܹ̈ܐ، ܒܚܲܪܬܵ‌ܐ ܣܩܝܼܕ ܠܹܗ ܦܵܘܠܘܿܣ ܘܕܝܼܪܹܗ ܘܐܡܝܼܪܹܗ ܠܗ̇ܝ ܪܘܼܚܵܐ: ”ܒܫܸܡܵܐ ܕܝܼܫܘܿܥ ܡܫܝܼܚܵܐ ܒܸܦܩܵܕܵܐ ܝܘܸܢ ܐܸܠܵܟ݂ܝ ܕܦܵܠܛܲܬ‌ܝ ܡܸܢܘܼܗ̇.“ ܘܒܗ̇ܝ ܥܕܵܢܵܐ ܦܠܝܼܛ ܠܵܗ̇ ܡܸܢܘܼܗ̇.

¹⁹ܐܝܼܡܲܢ ܕܚܙܹܐ ܠܗܘܿܢ ܡܵܪ̈ܵܘܵܬܘܼܗ̇ ܕܐܙܝܼܠܔ ܠܵܗ̇ ܡܸܢܘܼܗ̇ ܗܹܒ݂ܝܼ ܕܩܢܵܝܬܵ‌ܐ ܕܙܘܼܙܹ̈ܐ، ܕܒ݂ܝܼܩ ܠܗܘܿܢ ܠܦܵܘܠܘܿܣ ܘܠܫܝܼܠܵܐ ܘܓܪܝܼܫܵܝ ܠܗܘܿܢ ܠܫܘܼܩܵܐ ܩܲܕܡ ܓܘܼܪ̈ܵܢܹܐ.

²⁰ܘܟܲܕ ܡܘܼܬܝܵܝ ܠܗܘܿܢ ܠܟܸܣ ܫܲܠܝܼ̈ܛܹܐ ܐܡܝܼܪܗܘܿܢ: ”ܐܲܢܹܐ ܐܢܵܫܹ̈ܐ ܝܗܘܼܕܵܝܹ̈ܐ ܝܢܵܐ، ܘܒܸܚܒ݂ܵܛܘܼܗ̇ ܝܢܵܐ ܡܕܝܼܢ݇ܬܲܢ،

²¹”ܘܡܲܟܪܘܼܙܹܐ ܝܢܵܐ ܐܸܠܲܢ ܥܵܕܲܬܹ̈‌ܐ ܕܠܹܐ ܝܠܵܗ̇ ܩܵܢܘܿܢܵܝܬܵ‌ܐ ܐܸܠܲܢ ܕܩܲܒܠܲܚ ܠܗܘܿܢ ܘܠܵܐ ܕܥܵܒ݂ܕܲܚ ܠܗܘܿܢ، ܣܵܒܵܒ ܐܲܚܢܲܢ ܪ̈ܗܘܿܡܵܝܹܐ ܝܘܲܚ.“

²²ܨܦܝܼܚ ܠܹܗ ܥܲܠܵܝܗ‌ܝ ܟܸܢܫܵܐ ܪܵܒܵܐ، ܘܦܩܝܼܕ ܠܗܘܿܢ ܫܲܠܝܼ̈ܛܹܐ ܕܦܵܝܫܝܼ ܗܘܵܘ ܫܘܼܠܚܹܐ ܘܡܸܚܝܹܐ ܒܫܵܘܛܹ̈ܐ.

²³ܘܡ̣ܢ ܒܵܬܪ ܕܡܸܚܝܵܝ ܠܗܘܿܢ ܪܵܒܵܐ، ܕܸܪܝܵܝ ܠܗܘܿܢ ܓܵܘ ܒܹܝܬ ܐܲܣܝܼܪܹ̈ܐ، ܘܦܩܝܼܕ ܠܗܘܿܢ ܠܢܵܛܘܿܪܵܐ ܕܒܹܝܬ ܐܲܣܝܼܪܹ̈ܐ ܕܢܵܛܹܪܗܘܿܢ ܒܗܸܫܝܲܪܘܼܬܵ‌ܐ.

²⁴ܘܗ̇ܘ ܟܲܕ ܩܘܼܒܸܠܔ ܠܹܗ ܗܵܕܟ݂ܵܐ ܦܘܼܩܕܵܢܵܐ، ܕܸܪܝܵܝ ܠܹܗ ܓܵܘ ܒܲܝܬܵ‌ܐ ܓܵܘܵܝܵܐ ܕܒܹܝܬ ܐܲܣܝܼܪܹ̈ܐ، ܘܐܣܝܼܪܹܗ ܐܲܩܠܵܬܵܝ̈ܗ‌ܝ ܒܩܵܘܕܵܐ.

²⁵ܒܦܲܠܓܵܐ ܕܠܲܝܠܹܐ ܦܵܘܠܘܿܣ ܘܫܝܼܠܵܐ ܨܲܠܘܼܝܹܐ ܝܗܘܵܘ ܘܫܲܒܘܼܚܹܐ ܠܐܲܠܵܗܵܐ، ܘܐܲܣܝܼܪܹ̈ܐ ܒܸܫܡܵܥܵܝ.

²⁶ܡܸܢܫܸܠܬܵܢܹܐ ܗܘܹܐ ܠܹܗ ܪܵܘܕܵܢܵܐ ܓܘܼܪܵܐ، ܫܥܝܼܫ ܠܗܘܿܢ ܒܸܢܝܲܬܹ̈‌ܐ ܕܒܹܝܬ ܐܲܣܝܼܪܹ̈ܐ، ܦܬܝܼܚ ܠܗܘܿܢ ܟܠܵܝܗ‌ܝ ܬܲܪ̈ܥܵܢܹܐ ܘܫܪܹܐ ܠܗܘܿܢ ܐܸܣܘܼܪܹ̈ܐ ܕܟܠܵܝܗ‌ܝ ܐܲܣܝܼܪܹ̈ܐ.

²⁷ܐܝܼܡܲܢ ܕܪܥܝܼܫ ܠܹܗ ܢܵܛܘܿܪܵܐ ܕܒܹܝܬ ܐܲܣܝܼܪܹ̈ܐ ܘܚܙܹܐ ܠܹܗ ܬܲܪ̈ܥܵܢܹܐ ܦܬܝܼܚܹܐ، ܫܩܝܼܠܔ ܠܹܗ ܣܲܝܦܵܐ ܘܒܥܹܐ ܠܹܗ ܕܩܵܛܹܠܔ ܗܘܵܐ ܠܵܗ̇ ܓܵܢܹܗ، ܣܵܒܵܒ ܚܫܝܼܒ݂ ܠܹܗ ܥܪܝܼܩܹܐ ܝܗܘܵܘ ܐܲܣܝܼܪܹ̈ܐ.

²⁸ܐܝܼܢܵܐ ܦܵܘܠܘܿܣ ܩܪܹܐ ܠܹܗ ܐܸܠܹܗ ܒܩܵܠܵܐ ܪܵܡܵܐ ܘܐܡܝܼܪܹܗ: ”ܠܵܐ ܥܵܒ݂ܕܹܬ ܠܓܵܢܘܼܟ݂ ܒܝܼܫܬܵ‌ܐ. ܟܠܲܢ ܠܲܐܟ݂ܵܐ ܝܘܲܚ.“

²⁹ܛܠܝܼܒ ܠܹܗ ܢܵܛܘܿܪܵܐ ܫܪܵܓ݂ܵܐ ܘܪܚܝܼܛ ܠܹܗ ܠܓܵܘܵܐ ܟܲܕ ܪܲܬܪܘܼܬܹ‌ܐ، ܘܢܦܝܼܠܔ ܠܹܗ ܩܲܕܡ ܐܲܩܠܵܬܹ̈‌ܐ ܕܦܵܘܠܘܿܣ ܘܫܝܼܠܵܐ.

³⁰ܦܘܼܠܛܵܝ ܠܹܗ ܠܒܲܕܲܪ ܘܒܘܼܩܸܪܹܗ ܡܸܢܵܝܗ‌ܝ: ”ܡܵܪ̈ܲܝ، ܡܘܼܕܝܼ ܥܵܒ݂ܕܹܢ ܕܦܵܝܫܹܢ ܦܘܼܪܩܵܐ؟“