ܡܙܡܘܪ̈ܐ 71:2-19

²ܒܙܲܕܝܼܩܘܼܬܘܼܟ݂ ܦܲܨܹܝܬ ܠܝܼ ܘܦܲܪܩܸܬ ܠܝܼ، ܡܲܨܠܝܼ ܢܵܬܘܼܟ݂ ܐܸܠܝܼ ܘܗܲܒ݂ܠܔ ܠܝܼ ܦܘܼܪܩܵܢܵܐ.

³ܗܘܝܼ ܐܸܠܝܼ ܠܐܝܼܨܵܪܵܐ ܕܡܲܥܡܪܵܐ ܕܥܵܒ݂ܪܹܢ ܓܵܘܹܗ ܒܟܠܔ ܥܕܵܢܵܐ، ܦܩܝܼܕ ܠܘܼܟ݂ ܠܦܲܪܘܼܩܹܐ ܐܸܠܝܼ، ܒܗ̇ܝ ܕܩܵܝܝܼ ܘܚܸܣܢܝܼ ܐܲܢ݇ܬ ܝܼܘܸܬ.

⁴ܝܵܐ ܐܲܠܵܗ‌ܝܼ، ܦܲܨܝܼ ܠܝܼ ܡ̣ܢ ܐܝܼܕܵܐ ܕܪܲܫܝܼܥܵܐ، ܡ̣ܢ ܟ̰ܲܢܓܘܼܪܬܵ‌ܐ ܕܥܵܘܵܠܵܐ ܘܛܵܠܘܿܡܵܐ.

⁵ܒܗ̇ܝ ܕܐܲܢ݇ܬ ܝܼܘܸܬ ܣܲܒ݂ܪܝܼ، ܝܵܐ ܡܵܪܝܵܐ ܐܲܠܵܗܵܐ، ܬܘܼܟ݂ܠܵܢܝܼ ܡ̣ܢ ܙܥܘܿܪܘܼܬ‌ܝܼ.

⁶ܥܲܠܘܼܟ݂ ܣܢܝܼܕ ܠܝܼ ܡ̣ܢ ܒܲܛܢܵܐ، ܐܲܢ݇ܬ ܝܼܘܸܬ ܦܲܠܛܵܢܝܼ ܡ̣ܢ ܡܲܪܒܥܵܐ ܕܝܸܡܝܼ، ܐܸܠܘܼܟ݂ ܝܼܠܵܗ̇ ܬܸܫܒܘܿܚܬ‌ܝܼ ܐܲܡܝܼܢܵܐܝܼܬ.

⁷ܐܲܝܟ݂ ܕܘܼܡܵܪܵܐ ܗܘܹܐ ܠܝܼ ܠܪܵܒܵܐ، ܐܝܼܢܵܐ ܐܲܢ݇ܬ ܒܹܝܬ ܓܵܘܣܝܼ ܥܲܫܝܼܢܵܐ ܝܘܸܬ.

⁸ܡܸܠܝܵܐ ܝܠܹܗ ܦܘܼܡܝܼ ܬܸܫܒܘܿܚܬܘܼܟ݂، ܘܟܠܹܗ ܝܵܘܡܵܐ ܚܸܩܪܘܼܟ݂.

⁹ܠܵܐ ܪܲܦܹܝܬ ܠܝܼ ܒܙܲܒ݂ܢܵܐ ܕܣܲܝܒܘܼܬ‌ܝܼ، ܟܲܕ ܬܵܐܹܡ ܚܲܝܠܝܼ ܠܵܐ ܫܵܒ݂ܩܹܬ ܠܝܼ.

¹⁰ܒܗ̇ܝ ܕܗܘܼܡܙܸܡ ܠܗܘܿܢ ܕܸܫ̃ܡܸܢܝܼ̈ ܥܲܠܝܼ، ܘܢܵܛܪ̈ܵܢܹܐ ܠܓܵܢܝܼ ܥܒ݂ܝܼܕ ܠܗܘܿܢ ܡܸܠܟܵܐ ܥܲܡ ܚܕܵܕܹ̈ܐ،

¹¹ܒܹܐܡܵܪܵܐ: ”ܐܲܠܵܗܵܐ ܩܵܡ ܫܵܒܹܩ ܠܹܗ؛ ܢܦܘܿܠܘܼܢ ܒܵܬܪܹܗ ܘܕܒ݂ܘܿܩܘܼܢ ܠܹܗ، ܒܗ̇ܝ ܕܠܲܝܬ ܠܹܗ ܦܲܨܝܵܢܵܐ.“

¹²ܝܵܐ ܐܲܠܵܗܵܐ، ܠܵܐ ܪܵܚܩܹܬ ܡܸܢܝܼ، ܝܵܐ ܐܲܠܵܗ‌ܝܼ، ܡܲܠܝܸܙ ܠܗܲܝܲܪܬ‌ܝܼ.

¹³ܢܵܟ݂ܦܝܼ ܘܬܵܝܡܝܼ ܥܵܒ݂ܕܵܢܹ̈ܐ ܕܕܲܠܩܘܼܒ݂ܠܘܼܬܵ‌ܐ ܠܓܵܢܝܼ، ܠܵܒ݂ܫܝܼ ܠܵܘܡܵܐ ܘܢܟ݂ܝܼܦܬܵ‌ܐ ܛܵܥܝܵܢܹ̈ܐ ܠܒܝܼܫܬ‌ܝܼ.

¹⁴ܘܐܵܢܵܐ ܐܲܡܝܼܢܵܐܝܼܬ ܒܸܬ ܣܵܦܪܹܢ، ܘܒܸܬ ܝܵܗܒܹܢܘܼܟ݂ ܬܸܫܒܘܿܚܬܵ‌ܐ ܥܲܠܔ ܬܸܫܒܘܿܚܬܵ‌ܐ.

¹⁵ܦܘܼܡܝܼ ܒܸܬ ܗܲܩܹܐ ܙܲܕܝܼܩܘܼܬܘܼܟ݂، ܟܠܹܗ ܝܵܘܡܵܐ ܦܘܼܪܩܵܢܘܼܟ݂، ܒܗ̇ܝ ܕܠܵܐ ܝܕܝܼܥ ܠܝܼ ܡܸܢܝܵܢܵܝܗ‌ܝ.

¹⁶ܒܸܬ ܐܵܬܹܝܢ ܒܓܲܒܵܪ̈ܘܼܝܵܬܹ‌ܐ ܕܡܵܪܝܵܐ ܐܲܠܵܗܵܐ، ܒܸܬ ܡܲܕܟܸܪܸܢ ܙܲܕܝܼܩܘܼܬܵ‌ܐ ܕܕܝܼܘܼܟ݂ ܐܲܚܟ̰ܝܼ.

¹⁷ܝܵܐ ܐܲܠܵܗܵܐ، ܩܵܡ ܡܲܠܦܸܬ ܠܝܼ ܡ̣ܢ ܙܥܘܿܪܘܼܬ‌ܝܼ، ܘܗܲܠܔ ܠܲܐܟ݂ܵܐ ܡܘܼܕܸܥ ܠܝܼ ܕܘܼܡܵܪ̈ܘܼܟ݂.

¹⁸ܘܐܘܼܦ ܗܲܠܔ ܚܘܵܪܕܸܩܢܘܼܬܵ‌ܐ ܘܣܲܝܒܘܼܬܵ‌ܐ، ܝܵܐ ܐܲܠܵܗܵܐ، ܠܵܐ ܪܲܦܹܝܬ ܠܝܼ، ܗܲܠܔ ܕܡܲܕܥܸܢ ܚܲܝܠܘܼܟ݂ ܠܕܵܪܵܐ ܐܚܹܪܢܵܐ، ܓܲܒܵܪܘܼܬܘܼܟ݂ ܠܟܠܔ ܕܐܵܬܹ‌ܐ.

¹⁹ܙܲܕܝܼܩܘܼܬܘܼܟ݂، ܝܵܐ ܐܲܠܵܗܵܐ، ܗܲܠܔ ܡܪܵܘܡܵܐ ܝܠܵܗ̇، ܐܲܢ݇ܬ ܕܥܒ݂ܝܼܕ ܠܘܼܟ݂ ܦܘܼܠܚܵܢܹ̈ܐ ܓܘܼܪܹ̈ܐ، ܝܵܐ ܐܲܠܵܗܵܐ، ܡܵܢܝܼ ܝܠܹܗ ܐܲܝܟ݂ ܕܝܼܘܼܟ݂؟