يَيَ 7:5-26

⁵عٍ نَ قَلَ نّ، بَرِ مَ هَلِ عٍ تٌ قِندِشِ عَ شُنيَيٍ رَ، عٍ مُ نُ لَشِ عَ رَ.

⁶عِسَ نَشَ عَ مَسٍن عٍ بّ، «ﭑ مَ وَشَتِ مُ نُ عَ لِ سِندٍن، كْنْ وَشَتِ يٌ مُ نَ وٌ تَن شَ قٍ مَ.

⁷دُنِحَ مُ نْمَ وٌ تَن شْندٍ، كْنْ عٍ ﭑ تَن شْنمَ، بَرِ مَ ﭑ سٍيدٍحْشْيَ بَمَ عٍ شَ قٍ رَ، عَ عٍ شَ وَلِيٍ كٌبِ.

⁸وٌ تَن شَ تٍ دَرِ سَلَمُ، وٌ سَ سَلِ رَبَ نَا. ﭑ تَن مُ سِفَمَ، بَرِ مَ ﭑ مَ وَشَتِ مُ فّشِ عَ لِدٍ سِندٍن.»

⁹عَ نَ قَلَ شَنبِ، عَ نَشَ لُ فَلِلٍ.

¹⁰عَ شُنيَيٍ تٌ تٍ سَلِ رَبَدٍ دَرِ سَلَمُ، عِسَ قَن نَشَ سِفَ، كْنْ عَ فُندٌ كِ مَ.

¹¹سَلِ تٌ نُ رَبَقٍ، يُوِقِ كُنتِفِيٍ نُ عَ قٍنقٍ دَرِ سَلَمُ، عٍ نُ مَشْرِنيِ تِ، «عَ نَ مِندٍن؟»

¹²مِشِيٍ نُ وْيّن فبٍفبٍ مَكْيِكْيِمَ عٍ بٌرٍ تُلِ عِسَ شَ قٍ رَ. ندٍيٍ عَ قَلَمَ عَ مِشِ قَنيِ نَن عَ رَ، ندٍيٍ عَ قَلَمَ عَ عَ نَ حَمَ رَتَنتَنقٍ نَن تُي.

¹³كْنْ عٍ تٌ نُ فَاشُشِ يُوِقِ كُنتِفِيٍ يَ رَ، مِشِ يٌ مُ نُ سُو سَمَ عَ شَ قٍ قَلَدٍ كّنّ مَ.

¹⁴يُوِقِيٍ نُ سَلِ نَشَن نَبَقٍ، لْشُن كٍرٍن نَ عَ رَ. نَ تٌ نُ بَرَ سِفَ هَن عَ تَفِ، عِسَ نَشَ تٍ هْرْ مْبَنشِ كُي، عَ كَوَندِ تِ قْلْ.

¹⁵يُوِقِ كُنتِفِيٍ نَشَ كَابَ، عٍ نُ عَ قَلَ، «يِ شّمّ لْننِشِ يِ مْولِ رَ دِ، عَ تٌ مُ شَرَنشِ؟»

¹⁶عِسَ نَشَ عٍ يَابِ، «ﭑ كَوَندِ نَشَن تِمَ، عَ مُ كٍلِشِ ﭑ تَن شَ مَ. عَ كٍلِشِ ﭑ شّيمَ نَن مَ.

¹⁷مِشِ نَشَن وَ مَ عَلَ وَشْنقٍ رَبَقٍ، عَ نْمَ نّ عَ كٌلٌندٍ شَ يِ شَرَنيِ قَتَنشِ عَلَ نَن نَ. شَ ﭑ فبٍ فبَنسَن نَ عَ رَ، مِشِيٍ عَ كٌلٌنمَ نّ نُ.

¹⁸مِشِ نَشَن وْيّنمَ عَ يّتّ شَشِلِ مَ، عَ مَتْشْي قٍنقٍ عَ يّتّ نَن بّ. كْنْ نَشَن مَتْشْي قٍنقٍ عَ شّيمَ بّ، نْندِ قَلّ نَن نَ كَنيِ رَ، تِنشِنتَرٍيَ يٌ مُ نَشَن بْحّ مَ.

¹⁹عَننَبِ مُنسَ يَتِ نَن عَلَ شَ سّرِيّ سٌشِ وٌ يِ رَ، كْنْ وٌ مُ عَ رَتِنمّشِ. مُنقٍ رَ وٌ وَ مَ ﭑ قَشَقٍ؟»

²⁰حَمَ نَشَ عَ قَلَ، «حِننّ نَن نَ عِ قْشْ رَ! ندٍ كَتَقٍ عِ قَشَدٍ؟»

²¹عِسَ نَشَ عٍ يَابِ، «ﭑ كَابَنَكٌ كٍرٍن نَن نَبَ، عَ قَ وٌ بِرِن دّ عِشَرَ.

²²مُنسَ عَ بٍنبَيٍ شَ سّرِيّ قَلَشِ نّ وٌ بّ عَ وٌ شَ وٌ شَ دِ شّمّيٍ سُننَ. وٌ نَ رَبَمَ هَلِ مَلَبُ لْشْي.

²³شَ شّمّ سُننَمَ مَلَبُ لْشْي عَلَكٌ عَننَبِ مُنسَ شَ سّرِيّ نَشَ قَ كَنَ، وٌ شْنْمَ ﭑ تَن مَ مُنقٍ رَ، ﭑ تٌ قُرٍ مَ قَتٍ بِرِن نَيَلَن مَلَبُ لْشْي مَ؟

²⁴وٌ شَ قٍيٍ كُي مَتٌ عَ قَنيِ رَ بٍينُن وٌ شَ كِيتِ سَ. كِيتِ شَ تِنشِن.»

²⁵دَرِ سَلَمُكَ ندٍيٍ نُ عَ قَلَقٍ، «كُنتِفِيٍ مُ نَ كَتَقٍ يِ شَ قَشَدٍ؟

²⁶عَ مَتٌ، عَ تَن نَن وْيّنقٍ كّنّ مَ يِ كِ، كْنْ عٍ مُ سٍسٍ قَلَمَ عَ بّ! كَ عٍ بَرَ لَ عَ رَ، عَ عَلَ شَ مِشِ سُفَندِشِ نَ عَ رَ؟