يَيَ 6:25-61

²⁵عٍ تٌ عِسَ لِ بَا نَاكِرِ مَ، عٍ نَشَ عَ مَشْرِن، «كَرَ مْشْ، عِ قَشِ بٍ مُن تّمُي؟»

²⁶عِسَ نَشَ عٍ يَابِ، «عَ نْندِ كِ مَ ﭑ شَ عَ قَلَ وٌ بّ، وٌ مُ ﭑ قٍنقٍ شّ ﭑ تٌ تْنشُمَ مَكَابَشِ رَبَ وٌ يَ شْرِ. وٌ ﭑ قٍنقٍ نّ وٌ تٌ لُفَشِ تَامِ رَ.

²⁷وٌ نَشَ وَلِ دُنِحَ بَلٌي شَ قٍ رَ، نَشَن بْرْ مَ. وٌ شَ وَلِ بَلٌي نَن مَ قٍ رَ نَشَن بُمَ، عَ عَبَدَن كِسِ قِ وٌ مَ. عَدَ مَ شَ دِ نَن نَ بَلٌي قِمَ وٌ مَ، بَرِ مَ بَبَ عَلَ بَرَ عَ تَن نَن مَتْنشُمَ عَ شَ مِشِ سُفَندِشِ رَ.»

²⁸نَ كُي، حَمَ نَشَ عِسَ مَشْرِن، «مُشُ لَنمَ مُشُ شَ مُنسٍ رَبَ عَلَكٌ مُشُ شَ نُ كّوَلِيٍ رَبَ عَلَ وَ مَ نَشٍيٍ شْن؟»

²⁹عِسَ نَشَ عٍ يَابِ، «عَلَ وَ مَ كّوَلِ نَشَن شْن، عَ قِندِشِ يِ نَن نَ؛ وٌ شَ دَنشَنِيَ عَ شَ شّيرَ مَ.»

³⁰عٍ مَن نَشَ عَ مَشْرِن، «عِ تْنشُمَ مَكَابَشِ مُندُن نَبَمَ مُشُ يَ شْرِ عَلَكٌ مُشُ شَ لَ عِ رَ؟ عِ قَ كّوَلِ مُندُن نَبَمَ؟

³¹مُشُ بٍنبَيٍ تَامِ ندٍ دٌن نّ فبٍنفبٍرٍنيِ مَ نَشَن فٌرٌ كٍلِقٍ كٌورٍ مَ. عَ سّبّشِ كِتَابُي كُي، ‹عَلَ نَشَ تَامِ قِ عٍ مَ بَلٌي رَ، نَشَن كٍلِ كٌورٍ مَ.›»

³²عِسَ مَن نَشَ عَ مَسٍن عٍ بّ، «ﭑ شَ عَ مَسٍن وٌ بّ عَ نْندِ كِ مَ، عَننَبِ مُنسَ مُ كٌورٍ تَامِ قِ وٌ مَ. ﭑ بَبَ نَن كٌورٍ تَامِ يَتِ قِمَ وٌ مَ.

³³بَرِ مَ تَامِ نَشَن قَتَنشِ عَلَ رَ، عَ تَن نَن فٌرٌ مَ كٍلِ كٌورٍ، عَ كِسِ قِ دُنِحَ مَ.»

³⁴نَ كُي، عٍ نَشَ عَ قَلَ عَ بّ، «مَرِفِ، مُشُ كِ نَ تَامِ رَ تّمُي بِرِن.»

³⁵عِسَ نَشَ عٍ يَابِ، «ﭑ تَن نَن نَ كِسِ تَامِ رَ. نَشَن نَ قَ ﭑ تَن مَ، عَ مُ كَامّ كٌلٌنمَ عَبَدَن. نَشَن نَ دَنشَنِيَ ﭑ تَن مَ، عَ مُ يٍ شْلِ كٌلٌنمَ سْنْن.

³⁶كْنْ عَلْ ﭑ عَ قَلَشِ وٌ بّ كِ نَشّ، هَلِ وٌ تٌ بَرَ ﭑ تٌ، وٌ مُ لَشِ ﭑ نَ.

³⁷بَبَ عَلَ مِشِ نَشَن بِرِن قِمَ ﭑ مَ، عَ قَمَ نّ ﭑ مَ، ﭑ مُ مّيمَ عٍ رَ عَبَدَن،

³⁸بَرِ مَ ﭑ كٍلِشِ كٌورٍ مَ ﭑ شّيمَ وَشْنقٍ نَن نَبَدٍ. ﭑ مُ قَشِ ﭑ يّتّ وَشْنقٍ شَ رَبَدٍ.

³⁹ﭑ شّيمَ وَ مَ نّ ﭑ شَ عَ شَ مِشِ بِرِن نَكٍلِ قَشّ مَ لْشْ دْنشْي. عَ مِشِ نَشٍيٍ قِشِ ﭑ مَ، هَلِ كٍرٍن نَشَ لْي.

⁴⁰نَ نَن قِندِشِ ﭑ بَبَ سَفٌي رَ، عَ نَشَن يٌ نَ دَنشَنِيَ عَ شَ دِ مَ، نَ كَنيِ شَ عَبَدَن كِسِ سْتْ، ﭑ مَن شَ عَ رَكٍلِ قَشّ مَ لْشْ دْنشْي مَ.»

⁴¹نَ كُي، يُوِقِيٍ نَشَ سٌ عَ مَقَلَقٍ، بَرِ مَ عَ نُ بَرَ عَ قَلَ، «ﭑ تَن نَن نَ تَامِ رَ نَشَن فٌرٌ كٍلِ كٌورٍ.»

⁴²عٍ نُ عَ قَلَمَ نّ، عٍ نَشّ، «عِسَ شَ مُ يِ كِ، يُسُقُ شَ دِ؟ وٌن مُ عَ نفَ نُن عَ بَبَ كٌلٌن؟ عَ قَ عَ قَلَمَ دِ، عَ عَ فٌرٌشِ نّ كٍلِ كٌورٍ؟»

⁴³عِسَ نَشَ عٍ يَابِ، «وٌ بَ وْيّنقٍ وٌ بٌرٍ تَفِ نَ مْولِ رَ.

⁴⁴مِشِ يٌ مُ نْمَ قَدٍ ﭑ مَ، شَ بَبَ عَلَ، نَشَن ﭑ شّيشِ، مُ عَ كَنيِ مَبّندُن ﭑ مَ. ﭑ قَن قَمَ عَ كَنيِ رَكٍلِدٍ قَشّ مَ لْشْ دْنشْي.

⁴⁵عَ سّبّشِ نَمِحْنمّيٍ شَ كِتَابُي كُي، ‹عَلَ قَمَ نّ عٍ بِرِن شَرَندٍ.› نَشَن يٌ نَ بَبَ عَلَ شُي رَ مّ، عَ عَ شَ مَسٍنيِ سُشُ، نَ كَنيِ تَن قَمَ نّ ﭑ مَ.

⁴⁶مِشِ يٌ مُ نَ نَشَن بَرَ بَبَ عَلَ تٌ، بَقٍ مِشِ رَ نَشَن قَتَنشِ عَلَ رَ. نَ كٍرٍن نَن بَرَ بَبَ عَلَ تٌ.»

⁴⁷«ﭑ شَ عَ قَلَ وٌ بّ عَ نْندِ كِ مَ، نَشَن نَ دَنشَنِيَ ﭑ مَ، عَ بَرَ عَبَدَن كِسِ سْتْ.

⁴⁸ﭑ تَن نَن نَ كِسِ تَامِ رَ.

⁴⁹وٌ بٍنبَيٍ تَامِ دٌن نّ فبٍنفبٍرٍنيِ مَ، كْنْ عٍ بِرِن نَشَ قَشَ.

⁵⁰تَامِ نَشَن فٌرٌشِ كٍلِ كٌورٍ، عَ نَ بٍ. نَشَن يٌ نَ يِ تَن دٌن، نَ كَنيِ مُ قَشَمَ.

⁵¹ﭑ تَن نَن نَ نَ كِسِ تَامِ رَ نَشَن فٌرٌشِ كٍلِ كٌورٍ. نَشَن يٌ نَ يِ تَامِ تَن دٌن، عَ كِسِمَ نّ عَبَدَن. يِ تَامِ قِندِشِ ﭑ قَتٍ نَن نَ، ﭑ نَشَن قِمَ سّرّشّ رَ عَلَكٌ دُنِحَ شَ كِسِ سْتْ.»

⁵²نَ كُي، سْنشْي نَشَ مِنِ يُوِقِيٍ تَفِ، عٍ نُ عَ قَلَ، «ثٍ، يِ شّمّ نْمَ عَ قَتٍ سُبٍ سٌدٍ وٌن يِ رَ دِ، وٌن شَ عَ دٌن؟»

⁵³عِسَ نَشَ عَ مَسٍن عٍ بّ، «ﭑ شَ عَ قَلَ وٌ بّ عَ نْندِ كِ مَ، شَ وٌ مُ عَدَ مَ شَ دِ قَتٍ سُبٍ دٌن، شَ وٌ مُ عَ وُلِ مِن، كِسِ مُ وٌ بّ.

⁵⁴نَشَن ﭑ سُبٍ دٌنمَ، عَ ﭑ وُلِ مِن، نَ كَنيِ كِسِمَ نّ عَبَدَن، ﭑ عَ رَكٍلِمَ نّ قَشّ مَ لْشْ دْنشْي.

⁵⁵ﭑ قَتٍ نَن قِندِشِ بَلٌي يَتِ رَ. ﭑ وُلِ نَن قِندِشِ مِنسٍ يَتِ رَ.

⁵⁶نَشَن ﭑ سُبٍ دٌنمَ، عَ ﭑ وُلِ مِن، ﭑ بَرَ سَبَتِ نَ كَنيِ عِ، عَ قَن بَرَ سَبَتِ ﭑ قَن عِ.

⁵⁷بَبَ عَلَ تٌ ﭑ شّيشِ، كِسِ قَتَنمَ نَشَن نَ، كِسِ نَ ﭑ قَن يِ عَ تَن سَابُي رَ. نَ مْولِ مَن نَ، نَشَن بَلٌمَ ﭑ تَن مَ، نَ كَنيِ كِسِمَ ﭑ سَابُي رَ.

⁵⁸تَامِ نَشَن فٌرٌشِ كٍلِ كٌورٍ، عَ نَ بٍ. عَ مُ لُشِ عَلْ وٌ بٍنبَيٍ تَامِ نَشَن دٌن. عٍ تَن قَشَ نّ. نَشَن يِ تَامِ تَن دٌنمَ، نَ كَنيِ كِسِمَ نّ عَبَدَن.»

⁵⁹عِسَ يِ مَسٍنيِ تِ نّ عَ نُ مِشِيٍ كَوَندِ مَ تّمُي نَشّ كَثّرّنَمُ سَلِدٍ كُي.

⁶⁰عٍ تٌ عَ شَ مَسٍنيِ مّ، عَ قْشِرَبِرّ وُيَشِ نَشَ عَ قَلَ، «يِ مَسٍنيِ تَن شْرْشْ دٍ! ندٍ نْمَ تِندٍ عَ رَ؟»

⁶¹عِسَ تٌ عَ كٌلٌن عَ عَ قْشِرَبِرّيٍ نَ يِ وْيّنيِ قَلَقٍ عٍ بٌرٍ تَفِ، عَ نَشَ عٍ مَشْرِن، «ﭑ مَ مَسٍنيِ بَرَ وٌ رَشْنْ؟