يَيَ 5:10-33

¹⁰يُوِقِ كُنتِفِيٍ نَشَ عَ قَلَ نَ شّمّ رَيَلَنشِ بّ، «مَلَبُ لْشْي نَن تٌ، عَ مُ لَنمَ عِ شَ عِ شَ دَفِ شَنِن عِ شُن.»

¹¹كْنْ عَ تَن نَشَ عٍ يَابِ، «شّمّ نَشَن ﭑ نَيَلَنشِ، نَ نَن عَ قَلَ ﭑ بّ، ‹عِ عِ شَ دَفِ تٌنفٌ، عِ عِ حّرّ.›»

¹²عٍ نَشَ عَ مَشْرِن، «ندٍ نَ قَلَشِ عِ بّ؟»

¹³كْنْ شّمّ مُ نُ عَ كٌلٌن نَشَن عَ رَيَلَنشِ، بَرِ مَ عِسَ نُ بَرَ لْي عَ مَ حَمَ يَ مَ.

¹⁴نَ دَنفِ شَنبِ، عِسَ مَن نَشَ نَ شّمّ لِ هْرْ مْبَنشِ، عَ نَشَ عَ قَلَ عَ بّ، «يَكْسِ عِ بَرَ يَلَن، كْنْ عَ لَنمَ عِ شَ فبِلٍن يُنُبِ قْشْ رَ عَلَكٌ قٍ فبّتّ نَشَ عِ سْتْ نَشَن دَنفِ نَ قُرٍ سِنفٍ رَ.»

¹⁵شّمّ نَشَ سِفَ عَ سَ عَ قَلَ يُوِقِ كُنتِفِيٍ بّ، عَ عِسَ نَن عَ رَيَلَنشِ.

¹⁶عِسَ تٌ نَ قٍ رَبَ مَلَبُ لْشْي نّ، يُوِقِ كُنتِفِيٍ نَشَ سٌ عِسَ فٍرٍقٍ.

¹⁷عِسَ نَشَ عَ قَلَ عٍ بّ، «هَن تٌ ﭑ بَبَ نَ وَلِقٍ، ﭑ قَن نَ وَلِقٍ.»

¹⁸نَ تّمُي، يُوِقِيٍ نَشَ قٍ بِرِن نَبَ عَلَكٌ عٍ شَ عَ قَشَ، بَرِ مَ عَ نُ مَلَبُ لْشْي سّرِيّ كَنَمَ، عَ مَن نُ عَ قَلَمَ عَ عَلَ نَن عَ بَبَ رَ. نَ نَ عَ رَ عٍ بِرِن تِدٍ لَنشِ.

¹⁹نَ كُي، عِسَ نَشَ عَ مَسٍن عٍ بّ، «ﭑ شَ نْندِ يَتِ قَلَ وٌ بّ، عَلَ شَ دِ مُ نْمَ قٍقٍ رَبَدٍ عَ يّتّ رَ، قٌ عَ نَ نَشَن تٌ عَ بَبَ عَلَ رَ. عَلَ شَ دِ، عَ بَبَ عَلَ نَن قْشِ رَبَمَ.

²⁰بَرِ مَ بَبَ عَلَ عَ شَ دِ شَنُشِ نّ، عَ مَن قٍ نَشَن بِرِن نَبَمَ، عَ عَ مَسٍنمَ عَ شَ دِ بّ. عَ حَن قَمَ قٍيٍ مَسٍندٍ عَ بّ نَشٍيٍ مَكَابَ دَنفِ يٍيٍ رَ، عَلَكٌ وٌ دّ شَ عِشَرَ.

²¹بَبَ عَلَ مِشِيٍ رَكٍلِمَ قَشّ مَ كِ نَشّ، عَ عٍ رَكِسِ، عَلَ شَ دِ قَن كِسِ قِمَ عَ نَ وَ عَ قِقٍ نَشٍيٍ مَ.

²²بَبَ عَلَ حَن مُ مِشِ يٌ مَكِيتِمَ، عَ مِشِ مَكِيتِقٍ بِرِن لُشِ عَ شَ دِ نَن مَ،

²³عَلَكٌ بِرِن شَ عَلَ شَ دِ بِنيَ عَلْ عٍ بَبَ عَلَ بِنيَمَ كِ نَشّ. نَشَن يٌ مُ عَلَ شَ دِ بِنيَ، عَ مُ بَبَ عَلَ قَن بِنيَشِ نَشَن عَ شَ دِ شّيشِ دُنِحَ.»

²⁴«ﭑ شَ نْندِ قَلَ وٌ بّ، نَشَن عَ تُلِ مَتِمَ ﭑ نَ، عَ قَ لَ ﭑ شّيمَ رَ، نَ كَنيِ بَرَ كِسِ عَبَدَن. نَ كَنيِ مُ كِيتِ شْرْشْي سْتْمَ، عَ بَرَ فّ رَتَنفَدٍ يَهَننَمَ مَ، عَ بَرَ كِسِ سْتْ.

²⁵ﭑ شَ عَ قَلَ وٌ بّ عَ نْندِ كِ مَ، وَشَتِ قَقٍ عَ لِدٍ، عَ حَن بَرَ عَ لِ، قَشَمِشِيٍ عَلَ شَ دِ شُي مّمَ نّ. نَشٍيٍ نَ عَ شُي مّ، نٍيٍ كِسِمَ نّ.

²⁶بَبَ عَلَ تٌ قِندِشِ كِسِ كَنيِ رَ كِسِ سْتْمَ نَشَن نَ، عَ بَرَ عَ شَ دِ قَن قِندِ كِسِ كَنيِ رَ كِسِ سْتْمَ نَشَن نَ.

²⁷عَ مَن بَرَ نْي سٌ عَ يِ رَ عَدَ مَدِيٍ مَكِيتِقٍ مَ، بَرِ مَ عَدَ مَ شَ دِ نَن عَ رَ.

²⁸وٌ نَشَ كَابَ يِ قٍ مَ، بَرِ مَ وَشَتِ قَقٍ عَ لِدٍ، نَشٍيٍ نَ فَبُرِ كُي، عٍ بِرِن عَ شُي مّمَ نّ،

²⁹عٍ مِنِ عٍ شَ فَبُرِيٍ كُي. نَشٍيٍ قِندِ قٍ قَنيِ رَبَيٍ رَ، نٍيٍ نَ كٍلِ، عٍ كِسِ نَن سْتْمَ. كْنْ نَشٍيٍ قِندِ قٍ كٌبِ رَبَيٍ رَ، نٍيٍ تَن نَ كٍلِ، عٍ فبَلٌي نَن سْتْمَ.»

³⁰«ﭑ تَن مُ نْمَ قٍقٍ رَبَدٍ ﭑ يّتّ رَ. ﭑ عَ مّمَ بَبَ عَلَ رَ كِ نَشّ، ﭑ تَن كِيتِ سَمَ نَ كِ نّ. نَ كُي، ﭑ مَ كِيتِ تِنشِن، بَرِ مَ ﭑ مُ بِرَ مَ ﭑ يّتّ وَشْنقٍ شَ قْشْ رَ، ﭑ بِرَشِ ﭑ شّيمَ نَن وَشْنقٍ قْشْ رَ.»

³¹«شَ ﭑ سَ سٍيدٍ بَ ﭑ يّتّ بّ، عَ مُ لَنمَ.

³²بَبَ عَلَ نَن سٍيدٍ بَمَ ﭑ بّ. ﭑ قَن عَ كٌلٌن عَ تَن سٍيدٍحْشْيَ نَشَن بَمَ ﭑ مَ قٍ رَ، عَ قِندِشِ نْندِ نَن نَ.

³³وٌ تَن يَتِ بَرَ مِشِيٍ شّي يَيَ شْن، عَ قَن نَشَ سٍيدٍحْشْيَ بَ نْندِ شَ قٍ رَ.