يَيَ 21:5-23

⁵عِسَ نَشَ عٍ مَشْرِن، «ﭑ مَ دِيٍ، وٌ بَرَ يّشّ ندٍ سْتْ؟» عٍ نَشَ عَ يَابِ، «عَدٍ، مُشُ مُ سٍسٍ سُشُشِ.»

⁶عَ نَشَ عَ قَلَ عٍ بّ، «وٌ يّلّ وٌلِ كُنكُي يِرٍقَنيِ مَ، وٌ عَ ندٍ سْتْمَ نّ.» عٍ تٌ عَ وٌلِ، عٍ مُ نُ نْمَ يّلّ رَتٍدٍ، بَرِ مَ يّشّ فبٌ عَ كُي.

⁷نَ كُي، عِسَ قْشِرَبِرّ، عَ نَشَن شَنُشِ، عَ نَشَ عَ قَلَ ثِيّرِ بّ، «وٌن مَرِفِ نَ عَ رَ.» سِمْن ثِيّرِ تٌ نَ مّ، عَ نَشَ دٌنمَ رَفٌرٌ عَ مَ، عَ بَفَن يٍ مَ سِفَقٍ رَ عِسَ يِرٍ.

⁸بٌورٍيٍ قَن نَشَ عَ لِ كُنكُي كُي، يّلّ نَشَن نَقٍشِ يّشّيٍ رَ، عَ شِرِشِ كُنكُي رَ. عٍ مُ نُ مَكُيَ شَرٍ دّ رَ، قٌ نْنفْن كّمّ قِرِن حْندْن.

⁹عٍ تٌ تٍ شَرٍ دّ رَ، عٍ نَشَ تّ شُرُشِ تٌ، يّشّ سَشِ عَ تّ وٌلٍ رَ، تَامِ قَن نَ نَ.

¹⁰عِسَ نَشَ عَ قَلَ عٍ بّ، «وٌ قَ يّشّ ندٍ رَ وٌ بَشِ نَشَن سُشُدٍ.»

¹¹نَ كُي سِمْن ثِيّرِ نَشَ تٍ كُنكُي كُي، عَ يّلّ بّندُن شَرٍ مَ. عَ نُ رَقٍشِ يّشّ شُنفبٍيٍ نَن نَ، عَ فُندِ كّمّ تٌنفٌ سُولِ نُن سَشَن. كْنْ هَلِ يّشّ تٌ نُ فبٌشِ يّلّ كُي نَ كِ، يّلّ مُ عِبْو.

¹²عِسَ نَشَ عَ قَلَ عٍ بّ، «وٌ قَ وٌ دّفٍ.» عَ قْشِرَبِرّيٍ مُ سُو سَ عَ مَشْرِندٍ ندٍ عَ رَ، بَرِ مَ بِرِن نُ عَ كٌلٌن مَرِفِ نَن عَ رَ.

¹³عِسَ نَشَ قَ تَامِ تٌنفٌ، عَ عَ عِتَشُن عٍ مَ، عَ مَن نَشَ يّشّ سٌ عٍ يِ رَ.

¹⁴عَ سَشَن ندٍ نَن نُ نَ كِ، عِسَ عَ يّتّ مَسٍنمَ عَ قْشِرَبِرّيٍ بّ، كَبِ عَ كٍلِ قَشّ مَ.

¹⁵عٍ تٌ فّ عٍ دّ عِبَدٍ، عِسَ نَشَ سِمْن ثِيّرِ مَشْرِن، «سِمْن، يَيَ شَ دِ، عِ ﭑ شَنُشِ دَنفِ يٍيٍ بِرِن نَ؟» عَ نَشَ عَ يَابِ، «عِيٌ، مَرِفِ. عِ تَن عَ كٌلٌن ﭑ عِ شَنُشِ كِ نَشّ.» عِسَ نَشَ عَ قَلَ عَ بّ، «مّينِ ﭑ مَ يّشّي يْرّيٍ مَ.»

¹⁶عَ مَن نَشَ فبِلٍن عَ مَشْرِن نَ عَ قِرِن ندٍ، «سِمْن، يَيَ شَ دِ، عِ ﭑ شَنُشِ؟» عَ نَشَ عَ يَابِ، «عِيٌ، مَرِفِ. عِ تَن عَ كٌلٌن ﭑ عِ شَنُشِ كِ نَشّ.» عِسَ نَشَ عَ قَلَ عَ بّ، «مّينِ ﭑ مَ يّشّييٍ مَ.»

¹⁷عَ مَن نَشَ فبِلٍن عَ مَشْرِن نَ عَ سَشَن ندٍ، «سِمْن، يَيَ شَ دِ، عِ ﭑ شَنُشِ؟» ثِيّرِ نَشَ سُننُن عِسَ تٌ عَ مَشْرِن سَنمَيَ سَشَن ندٍ، «عِ ﭑ شَنُشِ؟» عَ نَشَ عَ يَابِ، «مَرِفِ، عِ تَن قٍ بِرِن كٌلٌن. عِ تَن عَ كٌلٌن ﭑ عِ شَنُشِ كِ نَشّ.» عِسَ نَشَ عَ قَلَ عَ بّ، «مّينِ ﭑ مَ يّشّييٍ مَ.

¹⁸ﭑ شَ نْندِ يَتِ نَن قَلَ عِ بّ، عِ قٌنِكٍ تّمُي، عِ تَن نَن نُ عِ يّتّ تَفِ عِشِرِ مَ، عِ وَ سِفَقٍ دّدّ، عِ سِفَ. كْنْ عِ نَ قٌرِ، عِ عِ بّلّشّ عِتَلَمَ نّ، مِشِ فبّتّ عِ تَفِ شِرِ، عَ عِ شَنِن يِرٍ عِ مُ وَ مَ سِفَقٍ دّننَشّ.»

¹⁹عِسَ نَ قَلَ نّ عَلَكٌ عَ شَ ثِيّرِ قَشَ كِ نَن مَسٍن، ثِيّرِ قَمَ عَلَ مَتْشْدٍ نَشَن سَابُي رَ. عَ نَ قَلَ شَنبِ، عَ نَشَ عَ قَلَ ثِيّرِ بّ، «بِرَ ﭑ قْشْ رَ.»

²⁰ثِيّرِ تٌ عَ كٌبٍ رَتٌ، عَ نَشَ عِسَ قْشِرَبِرّ تٌ عٍ قْشْ رَ، عِسَ نُ نَشَن مَشَنُشِ. سَيَمَلٍكّ دَنفِ سَلِ، عَ تَن نَن عَ مَسٌ عِسَ رَ عٍ دّفٍ تّمُي، عَ عَ مَشْرِن، «مَرِفِ، ندٍ قَمَ عِ يَنقَدٍ؟»

²¹ثِيّرِ تٌ عَ تٌ، عَ نَشَ عِسَ مَشْرِن، «مَرِفِ، نَ تَن فٌ؟»

²²عِسَ نَشَ عَ يَابِ، «شَ ﭑ وَ مَ عَ شَ سِمَيَ شَ بُ هَن ﭑ فبِلٍن تّمُي، نَ مُنسٍ قَنمَ عِ تَن مَ؟ عِ تَن شَ بِرَ ﭑ قْشْ رَ.»

²³نَ كُي، دَنشَنِيَتْي ندٍيٍ حْشْ نَشَ لُ عَ مَ عَ نَ قْشِرَبِرّ تَن مُ قَشَمَ، كْنْ عِسَ مُ نَ قَلَ. عَ عَ قَلَ نّ، «شَ ﭑ وَ مَ عَ شَ سِمَيَ شَ بُ هَن ﭑ فبِلٍن تّمُي، نَ مُنسٍ قَنمَ عِ تَن مَ؟»