يَيَ 21:1-18

¹نَ قٍيٍ دَنفِ شَنبِ، عِسَ مَن نَشَ مِنِ عَ قْشِرَبِرّيٍ مَ تِبٍرِيَسِ بَا دّ رَ. عَ عَ يّتّ مَكّنّن عٍ بّ يِ كِ نّ.

²سِمْن ثِيّرِ، تٌمَسِ عٍ نَشَن شِلِمَ «فُلِ،» نَتَنَيّلِ نَشَن كٍلِ كَانَ تَا فَلِلٍ بْشِ مَ، سٍبٍدٍ شَ دِيٍ، نُن عِسَ قْشِرَبِرّ قِرِن فبّتّيٍ، نٍيٍ بِرِن نُ نَ يِرٍ كٍرٍن.

³سِمْن ثِيّرِ نَشَ عَ قَلَ عٍ بّ، «ﭑ تَن سِفَقٍ يّشّ سُشُدٍ.» عٍ نَشَ عَ قَلَ عَ بّ، «وٌن بِرِن نَ عَ رَ.» نَ كُي، عٍ نَشَ مِنِ، عٍ بَكِ كُنكُي كُي، كْنْ نَ كْي بِرِن نَ، عٍ مُ سٍسٍ سُشُ.

⁴كُيٍ تٌ نُ عِبَقٍ، عِسَ نُ تِشِ بَا دّ رَ، كْنْ عَ قْشِرَبِرّيٍ مُ نُ عَ كٌلٌن عَ عَ تَن نَن عَ رَ.

⁵عِسَ نَشَ عٍ مَشْرِن، «ﭑ مَ دِيٍ، وٌ بَرَ يّشّ ندٍ سْتْ؟» عٍ نَشَ عَ يَابِ، «عَدٍ، مُشُ مُ سٍسٍ سُشُشِ.»

⁶عَ نَشَ عَ قَلَ عٍ بّ، «وٌ يّلّ وٌلِ كُنكُي يِرٍقَنيِ مَ، وٌ عَ ندٍ سْتْمَ نّ.» عٍ تٌ عَ وٌلِ، عٍ مُ نُ نْمَ يّلّ رَتٍدٍ، بَرِ مَ يّشّ فبٌ عَ كُي.

⁷نَ كُي، عِسَ قْشِرَبِرّ، عَ نَشَن شَنُشِ، عَ نَشَ عَ قَلَ ثِيّرِ بّ، «وٌن مَرِفِ نَ عَ رَ.» سِمْن ثِيّرِ تٌ نَ مّ، عَ نَشَ دٌنمَ رَفٌرٌ عَ مَ، عَ بَفَن يٍ مَ سِفَقٍ رَ عِسَ يِرٍ.

⁸بٌورٍيٍ قَن نَشَ عَ لِ كُنكُي كُي، يّلّ نَشَن نَقٍشِ يّشّيٍ رَ، عَ شِرِشِ كُنكُي رَ. عٍ مُ نُ مَكُيَ شَرٍ دّ رَ، قٌ نْنفْن كّمّ قِرِن حْندْن.

⁹عٍ تٌ تٍ شَرٍ دّ رَ، عٍ نَشَ تّ شُرُشِ تٌ، يّشّ سَشِ عَ تّ وٌلٍ رَ، تَامِ قَن نَ نَ.

¹⁰عِسَ نَشَ عَ قَلَ عٍ بّ، «وٌ قَ يّشّ ندٍ رَ وٌ بَشِ نَشَن سُشُدٍ.»

¹¹نَ كُي سِمْن ثِيّرِ نَشَ تٍ كُنكُي كُي، عَ يّلّ بّندُن شَرٍ مَ. عَ نُ رَقٍشِ يّشّ شُنفبٍيٍ نَن نَ، عَ فُندِ كّمّ تٌنفٌ سُولِ نُن سَشَن. كْنْ هَلِ يّشّ تٌ نُ فبٌشِ يّلّ كُي نَ كِ، يّلّ مُ عِبْو.

¹²عِسَ نَشَ عَ قَلَ عٍ بّ، «وٌ قَ وٌ دّفٍ.» عَ قْشِرَبِرّيٍ مُ سُو سَ عَ مَشْرِندٍ ندٍ عَ رَ، بَرِ مَ بِرِن نُ عَ كٌلٌن مَرِفِ نَن عَ رَ.

¹³عِسَ نَشَ قَ تَامِ تٌنفٌ، عَ عَ عِتَشُن عٍ مَ، عَ مَن نَشَ يّشّ سٌ عٍ يِ رَ.

¹⁴عَ سَشَن ندٍ نَن نُ نَ كِ، عِسَ عَ يّتّ مَسٍنمَ عَ قْشِرَبِرّيٍ بّ، كَبِ عَ كٍلِ قَشّ مَ.

¹⁵عٍ تٌ فّ عٍ دّ عِبَدٍ، عِسَ نَشَ سِمْن ثِيّرِ مَشْرِن، «سِمْن، يَيَ شَ دِ، عِ ﭑ شَنُشِ دَنفِ يٍيٍ بِرِن نَ؟» عَ نَشَ عَ يَابِ، «عِيٌ، مَرِفِ. عِ تَن عَ كٌلٌن ﭑ عِ شَنُشِ كِ نَشّ.» عِسَ نَشَ عَ قَلَ عَ بّ، «مّينِ ﭑ مَ يّشّي يْرّيٍ مَ.»

¹⁶عَ مَن نَشَ فبِلٍن عَ مَشْرِن نَ عَ قِرِن ندٍ، «سِمْن، يَيَ شَ دِ، عِ ﭑ شَنُشِ؟» عَ نَشَ عَ يَابِ، «عِيٌ، مَرِفِ. عِ تَن عَ كٌلٌن ﭑ عِ شَنُشِ كِ نَشّ.» عِسَ نَشَ عَ قَلَ عَ بّ، «مّينِ ﭑ مَ يّشّييٍ مَ.»

¹⁷عَ مَن نَشَ فبِلٍن عَ مَشْرِن نَ عَ سَشَن ندٍ، «سِمْن، يَيَ شَ دِ، عِ ﭑ شَنُشِ؟» ثِيّرِ نَشَ سُننُن عِسَ تٌ عَ مَشْرِن سَنمَيَ سَشَن ندٍ، «عِ ﭑ شَنُشِ؟» عَ نَشَ عَ يَابِ، «مَرِفِ، عِ تَن قٍ بِرِن كٌلٌن. عِ تَن عَ كٌلٌن ﭑ عِ شَنُشِ كِ نَشّ.» عِسَ نَشَ عَ قَلَ عَ بّ، «مّينِ ﭑ مَ يّشّييٍ مَ.

¹⁸ﭑ شَ نْندِ يَتِ نَن قَلَ عِ بّ، عِ قٌنِكٍ تّمُي، عِ تَن نَن نُ عِ يّتّ تَفِ عِشِرِ مَ، عِ وَ سِفَقٍ دّدّ، عِ سِفَ. كْنْ عِ نَ قٌرِ، عِ عِ بّلّشّ عِتَلَمَ نّ، مِشِ فبّتّ عِ تَفِ شِرِ، عَ عِ شَنِن يِرٍ عِ مُ وَ مَ سِفَقٍ دّننَشّ.»