يَبُرَ 147:4-20

⁴عَلَتَلَ تُنبُييٍ كْنتِ كٌلٌن، عَ عٍ بِرِن شِلِمَ عٍ شِلِ رَ.

⁵وٌن مَرِفِ عَلَتَلَ سّنبّ فبٌ، دَن مُ نَ عَ شَ قَهَامُي مَ.

⁶عَلَتَلَ مِشِ مَفٌرٌشِ بُن تِمَ، كْنْ عَ يّتّ عِفبٌي شَ قٍ كَنَمَ.

⁷وٌ شَ بّيتِ بَ عَلَتَلَ بّ تَنتُي رَ، وٌ شَ بّيتِ بَ عَلَ بّ كْرَيٍ شُي رَ.

⁸عَ تَن نَن نُشُي رَ مِنِمَ كٌورٍ مَ، عَ تُنّ رَقَ بْشِ مَ، عَ سَنسِيٍ رَ سٌلِ فٍيَيٍ قَرِ.

⁹عَ شُرُ سٍيٍ رَبَلٌمَ، عَ دٌنسٍ قِمَ شَشَ يْرّيٍ مَ، عٍ نَ عٍ شُي رَ مِنِ تّمُي نَشّ.

¹⁰سٌي سّنبّ مُ قِندِشِ قٍقٍ رَ عَلَ بّ. شّمّ شَ سّنبّ مُ قِندِشِ قٍقٍ رَ عَلَ بّ.

¹¹عَلَ يَرَفَاشُييَ نَن نَقَنمَ عَ مَ. عَلَ وَ مَ مِشِ شْن نَشَن شَشِلِ تِشِ عَ شَ شَنُنتٍيَ رَ.

¹²دَرِ سَلَمُ، عِ شَ عَلَتَلَ مَتْشْ. سِيٌنِ، عِ شَ عَلَ تَنتُ،

¹³بَرِ مَ عَ تَن نَن عِ شَ نَادّ مَكَنتَمَ، عَ تَن نَن بَرَكّ سَمَ عِ شَ حَمَ مَ.

¹⁴عَ بْحّسَ قِمَ عِ شَ بْشِ مَ، عَ دٌنسٍ قَنيِ قِمَ عِ مَ.

¹⁵عَلَتَلَ دُنِحَ يَمَرِ مَ، عَ عَ وَشْنقٍ رَيٍنسٍنمَ مَقُرٍن مَقُرٍن.

¹⁶عَ بَلَبَلَنيِ رَفٌرٌ مَ نّ عَلْ فّسّ قُتٍ، عَ نَ رَيٍنسٍن عَلْ تّ شُبٍ.

¹⁷عَ رَفٌرٌ بْشِ مَ، ندٍ نْمَ تِدٍ نَ شِنبٍلِ يَ رَ؟

¹⁸عَ نَ عَ شُي رَ مِنِ عٍ مَ، عٍ شُنُمَ نّ، عَ نَ قٌيٍ رَقَ، بَلَبَلَنيِ مَن قِندِ مَ نّ يٍ رَ.

¹⁹عَلَتَلَ بَرَ عَننَبِ يَشُبَ رَكٌلٌن عَ شَ مَسٍنيِ رَ، عَ بَرَ عَ شَ سّرِيّ نُن عَ شَ يَامَرِيٍ مَسٍن عِسِرَيِلَ بّ.

²⁰عَ مُ نَ مْولِ رَفِرِشِ سِ فبّتّ يٌ بّ. نٍيٍ لُمَ عَلَ شَ سّرِيّيٍ كٌلٌنتَرٍيَ نَن كُي. وٌ شَ عَلَتَلَ مَتْشْ!